ಉಗ್ರ ಹಫೀಜ್‌ ಸಂಬಂಧಿಯ ಬಂಧನ

ಲಾಹೋರ್‌: ಮುಂಬೈ ದಾಳಿ ಸಂಚುಕೋರ ಮತ್ತು ಜಮಾತ್‌-ಉದ್‌-ದವಾ (ಜೆಯುಡಿ) ಸಂಘಟನೆ ಸ್ಥಾಪಕ ಹಫೀಜ್‌ ಸಯೀದ್‌ನ ಭಾವನನ್ನು ಪೊಲೀಸರು ಬಂಧಿಸಿದ್ದಾರೆ. ಪಾಕ್‌ ಸರಕಾರದ ವಿರುದ್ಧ ವಾಗ್ದಾಳಿ ಮತ್ತು ಕೋಮುದ್ವೇಷ ಪ್ರಚೋದನೆ ಭಾಷಣದ ಆರೋಪದ ಮೇಲೆ ಅಬ್ದುಲ್‌ ರೆಹಮಾನ ಮಕ್ಕಿಯನ್ನು ಬಂಧಿಸಲಾಗಿದೆ ಎಂದು ಪೊಲೀಸರು ಹೇಳಿದ್ದಾರೆ.

ಜೆಯುಡಿನ ದತ್ತಿ ವಿಭಾಗ ಫಲಾಹ್‌-ಎ-ಇನ್ಸಾನಿಯತ್‌ (ಎಫ್‌ಐಎಫ್‌) ಪ್ರತಿಷ್ಠಾನದ ಅಂತಾರಾಷ್ಟ್ರೀಯ ವ್ಯವಹಾರಗಳ ಮುಖ್ಯಸ್ಥ ನಾಗಿರುವ ಮಕ್ಕಿಯ ಬಂಧನ, ಹಣಕಾಸು ಕಾರ್ಯಪಡೆ(ಎಫ್‌ಎಟಿಎಫ್‌) ನಿಯಮಾವಳಿಗಳ ಅನುಸಾರ ನಡೆಸಲಾಗಿದೆ. ಹಫೀಜ್‌ ಸಯೀದ್‌ನನ್ನು ಜಾಗತಿಕ ಉಗ್ರ ಎಂದು ಅಮೆರಿಕ ಸರಕಾರ 2012ರಲ್ಲಿಯೇ ಘೋಷಿಸಿದ್ದು, ಆತನ ಬಂಧನಕ್ಕೆ ನೆರವಾದವರಿಗೆ 70 ಕೋಟಿ ರೂ. ಬಹುಮಾನ ನೀಡುವುದಾಗಿ ಹೇಳಿದೆ.

ಅಂತಾರಾಷ್ಟ್ರೀಯ ಹಣಕಾಸು ನಿಧಿ, ವಿಶ್ವಸಂಸ್ಥೆ, ಎಫ್‌ಎಟಿಎಫ್‌ನಿಂದ ತೀವ್ರ ಒತ್ತಡ ಎದುರಿಸುತ್ತಿರುವ ಪಾಕಿಸ್ತಾನ ಸರಕಾರಕ್ಕೆ ತನ್ನ ನೆಲದಲ್ಲಿ ಭಯೋತ್ಪಾದನೆ ಹತ್ತಿಕ್ಕುವುದು ಅನಿವಾರ್ಯವಾಗಿದೆ. ಈ ನಿಟ್ಟಿನಲ್ಲಿ ವಿಶ್ವಸಂಸ್ಥೆ ಭದ್ರತಾ ಮಂಡಳಿ ನಿಷೇಧ ಹೇರಿರುವ ಸಂಘಟನೆಗಳ ಆಸ್ತಿಗಳನ್ನು ಮುಟ್ಟುಗೋಲು ಹಾಕಿಕೊಳ್ಳಲು ಇಮ್ರಾನ್‌ ಸರಕಾರ ಮುಂದಾಗಿದೆ.