2018ರ ಪಾಕ್‌ ಚುನಾವಣೆಯಲ್ಲಿ ಸ್ಪರ್ಧಿಸಲಿದೆ ಪಾಕ್‌ ಉಗ್ರ ಸಂಘಟನೆ

ಲಾಹೋರ್‌: ಮುಂಬಯಿ ಬ್ಲಾಸ್ಟ್‌ ಮಾಸ್ಟರ್‌ ಮೈಂಡ್‌ ಉಗ್ರ ಹಫೀಜ್‌ ಸಯೀದ್‌ನ ಸಂಘಟನೆ ಜಮಾತ್‌ ಉದ್‌ ದವಾ (ಜೆಯುಡಿ) ಮುಂದಿನ ವರ್ಷ ಪಾಕಿಸ್ತಾನದಲ್ಲಿ ನಡೆಯಲಿರುವ ಸಂಸತ್ ಚುನಾವಣೆಯಲ್ಲಿ ಸ್ಪರ್ಧಿಸಲಿದೆ ಎಂದು ಸಂಘಟನೆಯ ಸದಸ್ಯರೊಬ್ಬರು ಹೇಳಿದ್ದಾರೆ.

2008ರಲ್ಲಿ ನಡೆದ ಮುಂಬಯಿ ದಾಳಿಯಲ್ಲಿನ ಲಷ್ಕರೆ ತಯ್ಬಾದ ಅಂಗ ಸಂಸ್ಥೆ ಜಮಾತ್-ಉದ್-ದವಾದ ಮುಖ್ಯಸ್ಥ ಹಫೀಜ್ ಸಯೀದ್ ಕಳೆದ ತಿಂಗಳು ಮಿಲ್ಲಿ ಮುಸ್ಲಿಂ ಲೀಗ್ ಎಂಬ ಹೊಸ ರಾಜಕೀಯ ಪಕ್ಷವನ್ನು ಹುಟ್ಟುಹಾಕಿದ್ದರು.

ಭಾನುವಾರವಷ್ಟೇ ಪ್ರಕಟಗೊಂಡ ಪಾಕ್‌ ಉಪ ಚುನಾವಣೆಯ ಫಲಿತಾಂಶದಲ್ಲಿ ಪಾಕ್ ಮಾಜಿ ಪ್ರಧಾನಿ ನವಾಜ್ ಷರೀಫ್ ಪತ್ನಿ ಕುಲ್ಸೂಮ್ ವಿರುದ್ಧ ಜೆಯುಡಿ ಬೆಂಬಲಿತ ಅಭ್ಯರ್ಥಿ ಶೇಕ್ ಯಾಕೂಬ್ ಸ್ಪರ್ಧಿಸಿ ಮೂರನೇ ಸ್ಥಾನಕ್ಕೆ ತೃಪ್ತಿ ಪಟ್ಟಿದ್ದರು. ಈ ಫಲಿತಾಂಶ ಹೊರ ಬಂದ ಮರುದಿನವೇ 2018ರ ಸಾರ್ವತ್ರಿಕ ಚುನಾವಣೆಯಲ್ಲಿ ಜೆಯುಡಿ ತಮ್ಮ ಪಕ್ಷ ಮಿಲ್ಲಿ ಮುಸ್ಲಿಂ ಲೀಗ್ ಎಲ್ಲಾ ಕ್ಷೇತ್ರಗಳಲ್ಲಿ ಸ್ಪರ್ಧಿಸಲಿದೆ ಎಂದು ಜೆಯುಡಿ ಹೇಳಿದೆ.

ಉಪ ಚುನಾವಣೆಯಲ್ಲಿ ಮಿಲ್ಲಿ ಮುಸ್ಲಿಂ ಲೀಗ್‌ ಮೂಲಕವೇ ಯಾಕೂಬ್ ಸ್ಪರ್ಧಿಸಲು ಬಯಸಿದ್ದ. ಆದರೆ ಚುನಾವಣಾ ಆಯೋಗದಡಿ ರಾಜಕೀಯ ಪಕ್ಷವಾಗಿ ಮಿಲ್ಲಿ ಮುಸ್ಲಿಂ ಲೀಗ್‌ ನೋಂದಣಿಯಾಗದ ಹಿನ್ನೆಲೆಯಲ್ಲಿ ಈತನಿಗೆ ಸ್ಪರ್ಧಿಸಲು ಅವಕಾಶ ದೊರೆತಿರಲಿಲ್ಲ.

ಭಯೋತ್ಪದನಾ ಚಟುವಟಿಕೆಯಲ್ಲಿ ತೊಡಗೊಸಿಕೊಂಡಿರುವ ಆರೋಪದಡಿ ಪಾಕಿಸ್ತಾನ ಹಫೀಜ್‌ ಸಯೀದ್‌ ಸೇರಿ ನಾಲ್ವರನ್ನು ಪಾಕ್‌ ಪೊಲೀಸರು ಗೃಹ ಬಂಧಿಸಿದ್ದರು. 2014ರಲ್ಲಿ ಜೆಯುಡಿಯನ್ನು ಅಂತರಾಷ್ಟ್ರೀಯ ಉಗ್ರ ಸಂಘಟನೆ ಎಂದು ಅಮೆರಿಕ ಘೋಷಿಸಿತ್ತು.

hafiz saeed's jud to contest 2018 general elections in pakistan