ಪಾಕಿಸ್ತಾನದಲ್ಲಿ ನೇಣು ಬಿಗಿದ ಸ್ಥಿತಿಯಲ್ಲಿ ಹಿಂದೂ ಯುವತಿ ಶವ ಪತ್ತೆ: ಕೊಲೆ ಶಂಕೆ

ಇಸ್ಲಾಮಾಬಾದ್‌: ಶಾಲೆಯ ಪ್ರಾಂಶುಪಾಲರೊಬ್ಬರು ಇಸ್ಲಾಂಗೆ ಅವಮಾನಿಸಿದ್ದಾರೆ ಎಂದು ಆರೋಪಿಸಿ ಪಾಕ್‌ನ ಉತ್ತರ ಭಾಗದ ಸಿಂಧ್‌ ಪ್ರಾಂತ್ಯದ ಘೋಟ್ಕಿ ತಾಲೂಕಿನಲ್ಲಿಹಿಂದೂ ದೇವಾಲಯಗಳ ಮೇಲೆ ಮುಸ್ಲಿಮರು ದಾಳಿ ನಡೆಸಿದ ಬೆನ್ನಲ್ಲಿಯೇ ಅದೇ ಪ್ರಾಂತ್ಯದಲ್ಲಿಹಿಂದೂ ವಿದ್ಯಾರ್ಥಿನಿಯ ಶವ ಮಂಗಳವಾರ ಪತ್ತೆಯಾಗಿದೆ.

ಅಂತಿಮ ವರ್ಷದ ದಂತ ವೈದ್ಯಕೀಯ ಪದವಿಯ ವಿದ್ಯಾರ್ಥಿನಿಯಾಗಿದ್ದ ನಮೃತಾ ಚಂಧಾನಿ ಮೃತ ಯುವತಿ. ಈಕೆ ಲಾರ್ಕಾನದ ಆಸೀಫಾ ಮೆಡಿಕಲ್‌ ಕಾಲೇಜಿನ ಹಾಸ್ಟೆಲ್‌ನಲ್ಲಿ ನೆಲೆಸಿದ್ದರು. ಹಾಸ್ಟೆಲ್‌ನ ಕೊಠಡಿಯ ಹಾಸಿಗೆಯಲ್ಲಿಆಕೆಯ ಶವ ಪತ್ತೆಯಾಗಿದೆ. ಆಕೆಯ ಕುತ್ತಿಗೆ ಭಾಗವನ್ನು ಗಮನಿಸಿದಾಗ ಬಲವಂತವಾಗಿ ಆಕೆಗೆ ಹಗ್ಗ ಬಿಗಿಯಲಾಗಿದ್ದು, ಜೀವ ರಕ್ಷಣೆಗೆ ಆಕೆ ಪರದಾಡಿದಂತೆ ಕಾಣುತ್ತಿದೆ ಎಂದು ಮೃತ ನಮೃತಾ ಅವರ ಸಹೋದರ ಡಾ. ವಿಶಾಲ್‌ ಸುಂದರ್‌ ಅನುಮಾನ ವ್ಯಕ್ತಪಡಿಸಿದ್ದಾರೆ.

''ಆಕೆಯ ದೇಹದ ಮೇಲೆಯೂ ಕೆಲವು ಕಲೆಗಳು ಕಂಡಿವೆ. ನಾವು ಪಾಕ್‌ನಲ್ಲಿಅಲ್ಪಸಂಖ್ಯಾತರು. ನಮಗೆ ಹೆಚ್ಚು ಜನರ ನೆರವು ಬೇಕಿದೆ. ಈ ಪ್ರಕರಣದಲ್ಲಿನಿಷ್ಪಕ್ಷಪಾತ ತನಿಖೆಯಾಗಬೇಕಿದೆ,'' ಎಂದು ಅವರು ಆಗ್ರಹಿಸಿದ್ದಾರೆ.

ನಮೃತಾ ಕುತ್ತಿಗೆಗೆ ಹಗ್ಗ ಬಿಗಿಯಲಾಗಿದ್ದರೂ, ಆಕೆಯ ಶವ ಪತ್ತೆಯಾದಾಗ ಹಾಸ್ಟೆಲ್‌ನ ಕೊಠಡಿಯ ಹಾಸಿಗೆ ಮೇಲಿತ್ತು ಎಂದು ಕುಟುಂಬ ಸದಸ್ಯರು ತಿಳಿಸಿದ್ದಾರೆ.

ಹಿಂದೂ ದೇವಾಲಯಗಳ ಮೇಲೆ ದಾಳಿ ನಡೆದ ಘೋಟ್ಕಿ ತಾಲೂಕಿನ ಮಿರ್‌ಪುರ ಮಥೇಲೊ ಪಟ್ಟಣದಲ್ಲಿಆಕೆಯ ಕುಟುಂಬಸ್ಥರು ವಾಸವಾಗಿದ್ದಾರೆ. ಹಾಗಾಗಿ ನಮ್ರಿತಾ ಸಾವಿಗೂ, ದೇವಾಲಯಗಳ ಮೇಲಿನ ದಾಳಿಗೂ ನಂಟು ಇದೆ ಎಂದು ಅನುಮಾನಿಸಲಾಗಿದೆ.