ಬಾಂಗ್ಲಾದಲ್ಲಿ ಕಿಡಿಗೇಡಿಗಳಿಂದ ಶಿವ ದೇಗುಲ ಧ್ವಂಸ

ಢಾಕಾ: ಬಾಂಗ್ಲಾದೇಶದಲ್ಲಿ ಮತ್ತೊಮ್ಮೆ ಹಿಂದೂ ದೇವಾಲಯದ ಮೇಲೆ ದುಷ್ಕರ್ಮಿಗಳಿಂದ ದಾಳಿ ನಡೆದಿದೆ. ತಂಗೈಲ್‌ ಜಿಲ್ಲೆಯ ಬತ್ರಾ ಗ್ರಾಮದಲ್ಲಿರುವ ಶಿವ ದೇಗುಲವನ್ನು ಕಿಡಿಗೇಡಿಗಳು ಶುಕ್ರವಾರ ಧ್ವಂಸಗೊಳಿಸಿದ್ದಾರೆ. ದೇಗುಲದ ಭೂಮಿ ವಿವಾದ ಸಂಬಂಧ ಎರಡು ಗುಂಪುಗಳ ನಡುವೆ ಘರ್ಷಣೆ ನಡೆದಿದೆ. ಈ ವೇಳೆ ಒಂಬತ್ತು ಜನರ ಗುಂಪೊಂದು ಶಿವ ಮಂದಿರವನ್ನು ನಾಶ ಮಾಡಿ, ದೇಗುಲದ ಮಾಲೀಕರ ಕುಟುಂಬದ ಮೇಲೆ ಹಲ್ಲೆ ನಡೆಸಿದೆ.

20 ವರ್ಷಗಳ ಹಿಂದೆ ಚಿತ್ತರಂಜನ್‌ ಎನ್ನುವವರು ಜಮೀನನ್ನು ಖರೀದಿಸಿ ದೇಗುಲ ನಿರ್ಮಿಸಿದ್ದರು. ಅಂದಿನಿಂದ ಇಲ್ಲಿ ದಿನನಿತ್ಯ ಪೂಜಾ ಕಾರ್ಯ ನಡೆಯುತ್ತಿದೆ. ಗ್ರಾಮದ ಸ್ಥಳೀಯ ನಿವಾಸಿಗಳು ದೇಗುಲದ ಭೂಮಿಯನ್ನು ಬಲವಂತವಾಗಿ ವಶಕ್ಕೆ ಪಡೆಯಲು ಯತ್ನಿಸಿದ್ದಾರೆ. ಈ ವೇಳೆ ಚಿತ್ತರಂಜನ್‌ ಅವರ ಕುಟುಂಬ ಮತ್ತು ಗ್ರಾಮದ ಒಂದು ಗುಂಪಿನ ನಡುವೆ ಘರ್ಷಣೆ ಸಂಭವಿಸಿದೆ ಎಂದು ಮಾಧ್ಯಮಗಳು ವರದಿ ಮಾಡಿವೆ.