ಪ್ರತಿಭಟನೆ ಹತ್ತಿಕ್ಕಲು ಹಾಂಕಾಂಗ್‌ ಸರಕಾರಕ್ಕೆ ಚೀನಾ ಬೆಂಬಲ

ಬೀಜಿಂಗ್‌: ಗಡಿಪಾರು ಕುರಿತ ವಿವಾದಾತ್ಮಕ ತಿದ್ದುಪಡಿ ವಿಧೇಯಕಕ್ಕೆ ಮುಂದಾಗಿರುವ ಹಾಂಕಾಂಗ್‌ ಸ್ಥಳೀಯ ಸರಕಾರದ ವಿರುದ್ಧ ಜನರು ನಡೆಸುತ್ತಿರುವ ಪ್ರತಿಭಟನೆ ಒಂದು ದಂಗೆಯಲ್ಲದೇ ಮತ್ತೇನೂ ಅಲ್ಲ. ಹಾಗಾಗಿಯೇ ಅಲ್ಲಿನ ಸರಕಾರ ಉದ್ರಿಕ್ತರನ್ನು ನಿಯಂತ್ರಿಸಲು ಕಠಿಣ ಬಲ ಪ್ರಯೋಗಿಸಿತು. ಇದಕ್ಕೆ ತನ್ನ ಪೂರ್ಣ ಬೆಂಬಲವಿತ್ತು ಎಂದು ಚೀನಾ ಹೇಳಿದೆ. ವಿವಾದಿತ ಉದ್ದೇಶಿತ 'ಫುಜಿಟಿವ್‌ ಅಫೆಂಡರ್ಸ್‌ ಆ್ಯಂಡ್‌ ಮ್ಯೂಚುಯೆಲ್‌ ಲೀಗಲ್‌ ಅಸಿಸ್ಟೆನ್ಸ್‌ ಇನ್‌ ಕ್ರಿಮಿನಲ್‌ ಮ್ಯಾಟರ್ಸ್‌ ಲೆಜಿಸ್ಲೇಷನ್‌ (ತಿದ್ದುಪಡಿ) ವಿಧೇಯಕ'ದ ವಿರುದ್ಧ ಹಾಂಕಾಂಗ್‌ ಜನತೆ ಬುಧವಾರ ಭಾರಿ ಪ್ರತಿಭಟನೆ ನಡೆಸಿದ್ದರಿಂದ ಅಲ್ಲಿ ಬಿಗುವಿನ ವಾತಾವರಣ ನಿರ್ಮಾಣಗೊಂಡಿತ್ತು. ಪ್ರಕ್ಷುಬ್ಧಗೊಂಡ ಪರಿಸ್ಥಿತಿ ನಿಯಂತ್ರಣಕ್ಕೆ ಪೊಲೀಸರು ಅಶ್ರುವಾಯು ಹಾಗೂ ರಬ್ಬರ್‌ ಗುಂಡುಗಳನ್ನು ಪ್ರಯೋಗಿಸಿದ್ದರು. ಈ ರೀತಿ ಪ್ರತಿಭಟನಾಕಾರರನ್ನು ಚದುರಿಸಲು ಹಿಂಸಾತ್ಮಕ ಬಲ ಪ್ರಯೋಗಿಸಿದ್ದನ್ನು ಚೀನಾ ಸಮರ್ಥಿಸಿಕೊಂಡಿದೆ. ಇದು ಪ್ರತಿಭಟನೆಯಾಗಿರಲಿಲ್ಲ. ದಂಗೆಯಾಗಿದ್ದರಿಂದ ಅಲ್ಲಿ ಸರಕಾರ ನಿರ್ದಾಕ್ಷಿಣ್ಯ ಕ್ರಮ ಕೈಗೊಂಡಿದೆ. ಇದರಲ್ಲಿ ತಪ್ಪೇನೂ ಇಲ್ಲ ಎಂದು ಚೀನಾ ವಿದೇಶಾಂಗ ಸಚಿವಾಲಯ ಹೇಳಿದೆ.