ಹೂಸ್ಟನ್‌ ಕುಶಲೋಪರಿ

ಹ್ಯೂಸ್ಟನ್‌: ಜಗತ್ತಿನ ಎನರ್ಜಿ ವಲಯದ ರಾಜಧಾನಿ ಹ್ಯೂಸ್ಟನ್‌ ತಲುಪಿದ ಪ್ರಧಾನಿ ನರೇಂದ್ರ ಮೋದಿ, ತಮ್ಮದೇ ಶೈಲಿಯಲ್ಲಿಹ್ಯೂಸ್ಟನ್‌ ನಗರದ ಯೋಗಕ್ಷೇಮ ವಿಚಾರಿಸಿದ್ದಾರೆ.
ಅನಿವಾಸಿ ಭಾರತೀಯ ಸಮುದಾಯ ಆಯೋಜಿಸಿದ 'ಹೌಡಿ ಮೋದಿ' ಸಮಾವೇಶಕ್ಕೆ ತೆರಳುವ ಮೊದಲು, 'ಹೌಡಿ ಹೂಸ್ಟನ್‌' ಎಂದು ಟ್ವೀಟ್‌ ಮೂಲಕ ಕುಶಲೋಪರಿ ವಿಚಾರಿಸಿ ಅಲ್ಲಿನ ಜನರ ಮೆಚ್ಚುಗೆ ಗಳಿಸಿದರು. ''ಹ್ಯೂಸ್ಟನ್‌ನಲ್ಲೀಗ ಶುಭ್ರ ವಾತಾವಣವಿದೆ. ಈ ನಗರದಲ್ಲಿನಡೆಯುವ ಹಲವು ಕಾರ್ಯಕ್ರಮಗಳಲ್ಲಿಪಾಲ್ಗೊಳ್ಳಲಿರುವುದು ನನಗೆ ಖುಷಿಯುಂಟು ಮಾಡಿದೆ,'' ಎಂದು ಟ್ವೀಟ್‌ ಮಾಡಿದ್ದಾರೆ.
ಅದ್ಧೂರಿ ಸ್ವಾಗತ: ವಿಮಾನ ನಿಲ್ದಾಣದಲ್ಲಿಅಮೆರಿಕದಲ್ಲಿನ ಭಾರತದ ರಾಯಭಾರಿ ಹರ್ಷವರ್ಧನ್‌ ಶ್ರಿಂಗ್ಲಾಮತ್ತು ಅವರ ಅಮೆರಿಕದ ಸಹವರ್ತಿ ಕೆನ್‌ ಜಸ್ಟರ್‌ ಹಾಜರಿದ್ದು ಪ್ರಧಾನಿ ಮೋದಿ ಅವರನ್ನು ಬರಮಾಡಿಕೊಂಡರು. ವಿಮಾನ ನಿಲ್ದಾಣ ಮತ್ತು ಹೋಟೆಲ್‌ ಆವರಣ ಎರಡೂ ಕಡೆ ಭಾರತ ಮತ್ತು ಅಮೆರಿಕದ ಧ್ವಜ ಹಿಡಿದ ಗುಂಪುಗಳಿಂದ ಮೋದಿ ಅವರಿಗೆ ಅದ್ಧೂರಿ ಸ್ವಾಗತ ಲಭಿಸಿತು. ಅಮೆರಿಕ ಸಂಸತ್‌ ಸದಸ್ಯೆ ಹಾಗೂ ಈ ಬಾರಿಯ ಅಧ್ಯಕ್ಷೀಯ ಚುನಾವಣೆಯ ಡೆಮಾಕ್ರಟಿಕ್‌ ಪಕ್ಷದ ಆಕಾಂಕ್ಷಿ ತುಳಸಿ ಗಬ್ಬರ್ಡ್‌ ಸೇರಿದಂತೆ ಅನೇಕ ಗಣ್ಯರು ಮೋದಿ ಅವರನ್ನು ಸ್ವಾಗತಿಸಿ ಟ್ವೀಟ್‌ ಮಾಡಿದ್ದಾರೆ.