ಹಬಲ್ ಸೆರೆಹಿಡಿದ ಗುರು ಗ್ರಹದ ದೈತ್ಯ ಬಿರುಗಾಳಿಗಳ ಹೊಸ ಚಿತ್ರ ಬಿಡುಗಡೆ ಮಾಡಿದ ನಾಸಾ!

ವಾಷಿಂಗ್ಟನ್: ನಮ್ಮ ಸೌರ ಮಂಡಲದ ಅತ್ಯಂತ ದೊಡ್ಡ ಗ್ರಹ ಎಂಬ ಖ್ಯಾತಿ ಪಡೆದಿರುವ ಗುರು ಗ್ರಹದಲ್ಲಿ ಬಿರುಗಾಳಿಗಳೇನು ಹೊಸತಲ್ಲ. ಇಡೀ ಭೂಮಿಯನ್ನೇ ನುಂಗಬಲ್ಲ ಬೃಹತ್ ಬಿರುಗಾಳಿಗಳು ಗುರು ಗ್ರಹದಲ್ಲಿ ಸರ್ವೇ ಸಾಮಾನ್ಯ.

ಅದರಲ್ಲೂ ಗುರು ಗ್ರಹದ ಅತ್ಯಂತ ಜನಪ್ರಿಯ 'ದಿ ಗ್ರೇಟ್ ರೆಡ್ ಸ್ಪಾಟ್' ಭಯನಾಕ ಬಿರುಗಾಳಿಯ ಆಗರ. ಕಳೆದ 400 ವರ್ಷಗಳಿಂದಲೂ ಅಧಿಕ ಕಾಲದಿಂದ ಗುರು ಗ್ರಹಕ್ಕೆ ದೃಷ್ಟಿ ಬೊಟ್ಟು ಇಟ್ಟಂತೆ ಇರುವ ಈ ಗ್ರೇಟ್ ರೆಡ್ ಸ್ಪಾಟ್, ಗುರು ಗ್ರಹದ ಅಂದವನ್ನು ಹೆಚ್ಚಿಸಿದೆ ಎಂದರೆ ಅತಿಶೋಕ್ತಿಯಲ್ಲ.

ಶುಕ್ರ ಗ್ರಹದಲ್ಲಿ ಜೀವ ಸಂಕುಲದ ಕುರುಹು?: ಕುತೂಹಲ ಕೆರಳಿಸಿದ ಗ್ರಹದ ಮೋಡಗಳ ರಾಸಾಯನಿಕ ಪ್ರಕ್ರಿಯೆ!

ಇದೀಗ ನಾಸಾದ ಹಬಲ್ ಬಾಹ್ಯಾಕಾಶ ದೂರದರ್ಶಕ ಯಂತ್ರ ಗುರು ಗ್ರಹದ ಹೊಸ ಫೋಟೋವೊಂದನ್ನು ಸೆರೆಹಿಡಿದಿದ್ದು, ಗ್ರಹದ ಉತ್ತರ ಅಕ್ಷಾಂಶದಲ್ಲಿ ಹೊಸ ಬಿಳಿ ಬಣ್ಣದ ಚಂಡಮಾರುತವೊಂದನ್ನು ಪತ್ತೆ ಹಚ್ಚಿದೆ.


ಗಂಟೆಗೆ 350 ಮೈಲು ವೇಗದಲ್ಲಿ ಚಲಿಸುತ್ತಿರುವ ಈ ಬಿಳಿ ಬಣ್ಣದ ಚಂಡಮಾರುತವನ್ನು, ಕಳೆದ ಆಗಸ್ಟ್ 25ರಂದು ಹಬಲ್‌ನ ನೇರಳಾತೀತ, ಮತ್ತು ಅತಿಗೆಂಪು ಬೆಳಕಿನ ಕ್ಯಾಮರಾದ ಮೂಲಕ ಸೆರೆ ಹಿಡಿಯಲಾಗಿದೆ.

ನಾಸಾದ ಆ ಒಂದು ಫೋಟೋ ನೋಡಿ ಮಸಾಲೆ ದೋಸೆಯನ್ನು ನೆನಪಿಸಿಕೊಂಡ ನೆಟ್ಟಿಗರು...!

ಗುರು ಗ್ರಹದ ಈ ಭಾಗದಲ್ಲಿ ಪ್ರತಿ ಆರು ವರ್ಷಗಳಿಗೊಮ್ಮೆ ಹೊಸ ಚಂಡಮಾರುತ ಸೃಷ್ಟಿಯಾಗುವುದು ಸಾಮಾನ್ಯ ಸಂಗತಿಯಾಗಿದೆ. ಸದ್ಯದ ಫೋಟೋ ಗ್ರಹದ ಸಮಭಾಜಕ ವೃತ್ತದ ಉದ್ದಕ್ಕೂ, ಎತ್ತರದ ಬಿಳಿ ಮೋಡಗಳು ತೆರವಾಗುತ್ತಿರುವುದನ್ನು ಗುರುತಿಸಿದೆ ಎನ್ನಲಾಗಿದೆ.

ಕಳೆದ ಆಗಸ್ಟ್ 25ರಂದು ಗುರು ಗ್ರಹ ಭೂಮಿಯಿಂದ ಬರೋಬ್ಬರಿ 406 ಮಿಲಿಯನ್ ಮೈಲು ದೂರದಲ್ಲಿದ್ದಾಗ, ಹಬಲ್ ಬಾಹ್ಯಾಕಾಶ ದೂರದರ್ಶಕ ಯಂತ್ರ ಈ ಅಪರೂಪದ ಚಿತ್ರ ಸೆರೆಹಿಡಿದಿದೆ.

ಇನ್ನು ನಾಸಾದ ಹಬಲ್ ಬಾಹ್ಯಾಕಾಶ ದೂರದರ್ಶಕ ಯಂತ್ರ ಸೆರೆಹಿಡಿದಿರುವ ಈ ಚಿತ್ರದಲ್ಲಿ, ಗುರು ಗ್ರಹದ ಉಪಗ್ರಹವಾದ ಯುರೋಪಾವನ್ನು ಕೂಡ ಕಾಣಬಹುದಾಗಿದೆ.