ಉತ್ತಮ ವಾಸಯೋಗ್ಯ ನಗರ: ಹೈದರಾಬಾದ್ ಬೆಸ್ಟ್

ಲಂಡನ್: ಜಗತ್ತಿನ ಅತ್ಯುತ್ತಮ ವಾಸಯೋಗ್ಯ ನಗರಗಳ ಪಟ್ಟಿಯಲ್ಲಿ ಮೊದಲ 100 ನಗರಗಳಲ್ಲಿ ಭಾರತಕ್ಕೆ ಒಂದೂ ಸ್ಥಾನ ಸಿಕ್ಕಿಲ್ಲ. ಆದರೆ, ಭಾರತದ ಮಟ್ಟಿಗೆ ಹೇಳುವುದಾದರೆ ಹೈದರಾಬಾದ್ ನಂಬರ್ ಒನ್ ಸ್ಥಾನ ಗಳಿಸಿದೆ.

ಮರ್ಸರ್ ಕ್ವಾಲಿಟಿ ಆಫ್ ಲೈಫ್ ಎಂಬ ಅಧ್ಯಯನದ ಪ್ರಕಾರ, ಹೈದರಾಬಾದ್ ಜಾಗತಿಕವಾಗಿ 139ನೇ ಸ್ಥಾನ ಗಳಿಸಿದೆ. ಕಳೆದ ವರ್ಷಕ್ಕಿಂತಲೂ ಮುತ್ತಿನ ನಗರಿ ಒಂದು ಸ್ಥಾನ ಕುಸಿದಿದೆ. ಕಳೆದ ವರ್ಷ ನಗರಕ್ಕೆ 138ನೇ ಸ್ಥಾನ ಲಭಿಸಿತ್ತು. ಹಿನ್ನೆಡೆಗೆ ಪ್ರಾಕೃತಿಕ ವಿಕೋಪ ಹಾಗೂ ಹೆಚ್ಚಾದ ವಿದ್ಯುತ್ ಕಡಿತ ಕಾರಣ ಎನ್ನಲಾಗಿದೆ. ಕಳೆದ ವರ್ಷ ಇಲ್ಲಿ ಅತಿಯಾದ ಉಷ್ಣತೆಯ ಕಾರಣದಿಂದ 1700ಕ್ಕೂ ಹೆಚ್ಚು ಜನರು ಸಾವಿಗೀಡಾಗಿದ್ದಾರೆ.

ಬೆಂಗಳೂರಿಗೆ 145ನೇ ಸ್ಥಾನ

ಇನ್ನು ಭಾರತೀಯ ನಗರಗಳಲ್ಲಿ ಪುಣೆ 144ನೇ ಸ್ಥಾನದಲ್ಲಿದ್ದರೆ, ಬೆಂಗಳೂರು 145, ಚೆನ್ನೈ 150, ಮುಂಬಯಿ 152, ಕೋಲ್ಕತ್ತಾ 160 ಹಾಗೂ ರಾಜಧಾನಿ ದಿಲ್ಲಿ 161ನೇ ಸ್ಥಾನಕ್ಕೆ ತೃಪ್ತಿ ಪಟ್ಟುಕೊಂಡಿವೆ.

ಹೈದರಾಬಾದ್, ಪುಣೆ ಹಾಗೂ ಚೆನ್ನೈ ನಗರಗಳು ಭಾರತದಲ್ಲಿ ಹೆಚ್ಚು ಸುರಕ್ಷಿತ ನಗರಗಳು ಎಂದು ವರದಿ ತಿಳಿಸಿದೆ.

ಜಾಗತಿಕ ಮಟ್ಟದಲ್ಲಿ ವಿಯೆನ್ನಾ ನಂಬರ್ ಒನ್

ಮಧ್ಯ ಯೂರೋಪ್‌ನ ಆಸ್ಟ್ರಿಯಾದ ರಾಜಧಾನಿ ವಿಯೆನ್ನಾ, ವಾಸಯೋಗ್ಯ ನಗರಗಳ ಪೈಕಿ ವಿಶ್ವದಲ್ಲೇ ಅತ್ಯುತ್ತಮ ನಗರ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿದೆ. ಜಾಗತಿಕವಾಗಿ 280 ನಗರಗಳ ಸಾಮಾಜಿಕ- ಆರ್ಥಿಕ ಪರಿಸ್ಥಿತಿಯನ್ನು ತಾಳೆ ಹಚ್ಚಿ ನೋಡಿದ 18ನೇ ಮರ್ಸರ್ ಕ್ವಾಲಿಟಿ ಆಫ್ ಲೈಫ್ ಪಟ್ಟಿ ತಯಾರಿಸಿದೆ. ನಂತರದ ಸ್ಥಾನಗಳಲ್ಲಿ ಜ್ಯೂರಿಚ್, ಆಕ್‌ಲ್ಯಾಂಡ್, ಮ್ಯೂನಿಚ್ ಹಾಗೂ ವ್ಯಾಂಕೋವರ್‌ಗಳಿವೆ.

ಜನಪ್ರಿಯ ನಗರಗಳಾದ ಲಂಡನ್, ಪ್ಯಾರಿಸ್, ನ್ಯೂಯಾರ್ಕ್‌ಗಳು ಈ ಪಟ್ಟಿಯ ಟಾಪ್ 30ರಲ್ಲಿ ಕೂಡಾ ಸ್ಥಾನ ಪಡೆದಿಲ್ಲ ಎಂಬುದು ಗಮನಾರ್ಹ. ಜಗತ್ತಿನ ಅತಿ ಕೆಟ್ಟ ಜೀವನ ಮಟ್ಟ ಹೊಂದಿದ ನಗರ ಎಂಬ ಕುಖ್ಯಾತಿಗೆ ಬಾಗ್ದಾದ್ ಪಾತ್ರವಾಗಿದೆ.