ಶ್ವೇತಭವನದಲ್ಲಿ ಟ್ರಂಪ್‌ ಏಕಾಂಗಿ

ವಾಷಿಂಗ್ಟನ್‌: ''ನಾನು ಶ್ವೇತಭವನದಲ್ಲಿ ಒಂಟಿಯಾಗಿ ಇದ್ದೇನೆ. ಡೆಮಾಕ್ರಟಿಕ್‌ ಪಾರ್ಟಿ ಸಂಸದರು ವಾಪಸ್‌ ಬಂದು, ಗಡಿ ಭದ್ರತೆ ಬಗ್ಗೆ ಅಗತ್ಯವಾಗಿರುವ ನಿರ್ಧಾರ ಕೈಗೊಳ್ಳುತ್ತಾರೆಂದು ಕಾಯುತ್ತಿದ್ದೇನೆ,'' ಎಂದು ಕ್ರಿಸ್‌ಮಸ್‌ ದಿನದಂದು ಅಮೆರಿಕದ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌ ಬೇಸರದಿಂದ ಹೇಳಿಕೊಂಡಿದ್ದಾರೆ.

ಅಮೆರಿಕ-ಮೆಕ್ಸಿಕೋ ನಡುವೆ ಗೋಡೆ ನಿರ್ಮಾಣ ವಿಚಾರ ಟ್ರಂಪ್‌ ಸರಕಾರವನ್ನು ಅಡಕತ್ತರಿಗೆ ಸಿಲುಕಿಸಿದ್ದು, ಸತತ 4ನೇ ದಿನವೂ ಅಮೆರಿಕ ಸರಕಾರ ಭಾಗಶಃ ಸ್ತಬ್ಧಗೊಂಡಿರುವುದರಿಂದ ಸಾರ್ವಜನಿಕ ಆಡಳಿತಕ್ಕೆ ಅಡಚಣೆಯಾಗಿದೆ.

''ನಾನು ಇಲ್ಲಿ ಕಷ್ಟಪಟ್ಟು ದೇಶದ ಭದ್ರತೆಗಾಗಿ ಕೆಲಸ ಮಾಡುತ್ತಿದ್ದೇನೆ. ಆದರೆ ಡೆಮಾಕ್ರಾಟ್‌ ಸಂಸದರು ಮನೆಯಲ್ಲಿ ಕ್ರಿಸ್‌ಮಸ್‌ ಹಬ್ಬದ ಆಚರಣೆ ಸಂಭ್ರಮದಲ್ಲಿ ಮುಳುಗಿದ್ದಾರೆ,' ಎಂದು ಸರಣಿ ಟ್ವೀಟ್‌ಗಳಲ್ಲಿ ಟ್ರಂಪ್‌ ಬೇಸರ ಹೊರಹಾಕಿದ್ದಾರೆ. ಇದೇ ವೇಳೆ ಅವರು ಫ್ಲೋರಿಡಾದ 'ಮಾರ್‌ ಎ ಲೋಗೊ' ರೆಸಾರ್ಟ್‌ಗೆ ಪ್ರವಾಸ ಕಾರ್ಯಕ್ರಮವನ್ನೂ ರದ್ದುಗೊಳಿಸಿದ್ದಾರೆ.

ಬಿಕ್ಕಟ್ಟಿಗೆ ಕಾರಣವೇನು?

ಮೆಕ್ಸಿಕೋದಿಂದ ಅಕ್ರಮ ವಲಸಿಗರನ್ನು ತಡೆಯಲು ಗೋಡೆ ನಿರ್ಮಿಸಬೇಕು, ಅದಕ್ಕೆ ಅಗತ್ಯ ಹಣಕಾಸು ಹೊಂದಿಸಲು 5 ಶತಕೋಟಿ ಡಾಲರ್‌ ಹಣ ಬೇಕೆಂದು ಟ್ರಂಪ್‌ ಬೇಡಿಕೆಯಿಟ್ಟಿದ್ದಾರೆ. ಗೋಡೆ ನಿರ್ಮಾಣದ ಬಗ್ಗೆ ತಮ್ಮ ಚುನಾವಣಾ ಭರವಸೆಯ ಭಾಗವಾಗಿ ಟ್ರಂಪ್‌ ಈ ಕ್ರಮಕ್ಕೆ ಮುಂದಾಗಿದ್ದಾರೆ. ಆದರೆ, ಟ್ರಂಪ್‌ ಅವರ ಬೇಡಿಕೆಗೆ ಪ್ರತಿಪಕ್ಷದ ಡೆಮಾಕ್ರಾಟರು ಆಕ್ಷೇಪ ವ್ಯಕ್ತಪಡಿಸಿದ್ದಾರೆ. ತಡೆ ಗೋಡೆ ನಿರ್ಮಾಣದ ಜತೆಗೇ ದೇಶದ ಎಂಟು ಲಕ್ಷ ಸರಕಾರಿ ಸಿಬ್ಬಂದಿ ವೇತನ ಪಾವತಿಯ ವಿಧೇಯಕವನ್ನೂ ಸೇರಿಸಿ ಮಂಡಿಸಿದ್ದರಿಂದ ವಿಧೇಯಕ ಸಂಸತ್ತಿನಲ್ಲಿ ಅನುಮೋದನೆಯಾಗದೆ ಬಾಕಿ ಉಳಿದಿದೆ. ಹಣಕಾಸು ವೆಚ್ಚ ವಿಧೇಯಕವೇ ಅನುಮೋದನೆಯಾಗದ ಹಿನ್ನೆಲೆಯಲ್ಲಿ, ಅಮೆರಿಕದಲ್ಲಿ ಸರಕಾರ ನಡೆಸಲು ಆರ್ಥಿಕ ಮುಗ್ಗಟ್ಟು ಎದುರಾಗಿದ್ದು, ಶುಕ್ರವಾರ ರಾತ್ರಿಯಿಂದಲೇ ಸರಕಾರ ಭಾಗಶಃ ಸ್ತಬ್ಧವಾಗಿದೆ. ಸರಕಾರ ಸ್ತಬ್ಧಗೊಂಡರೂ, ಸೇನಾ ಸಿಬ್ಬಂದಿ ಸೇವೆ ಮುಂದುವರಿಸಿದ್ದಾರೆ. ಗುರುವಾರ ಸರಕಾರ ಸಭೆ ನಡೆಸಲಿದ್ದು, ಅಲ್ಲಿಯವರೆಗೂ ಇದೇ ಸ್ಥಿತಿ ಮುಂದುವರಿಯುವ ಸಾಧ್ಯತೆಯಿದೆ.