ಪಾಕಿಸ್ತಾನದಲ್ಲಿ 40 ಉಗ್ರ ಸಂಘಟನೆಗಳಿವೆ: ಕೊನೆಗೂ ಸತ್ಯ ಒಪ್ಪಿಕೊಂಡ ಇಮ್ರಾನ್ ಖಾನ್

ವಾಷಿಂಗ್ಟನ್: ಪಾಕಿಸ್ತಾನದಲ್ಲಿ ಕಳೆದ 15 ವರ್ಷಗಳಿಂದ ಈ ವರೆಗೆ ಆಡಳಿತ ಮಾಡಿದ ಸರಕಾರಗಳು ಜಗತ್ತಿನ ಮುಂದೆ ಸತ್ಯವನ್ನು ಹೇಳಿಲ್ಲ; ಪಾಕಿಸ್ತಾನದಲ್ಲಿ 40 ವಿವಿಧ ಉಗ್ರಗಾಮಿ ಸಂಘಟನೆಗಳು ಕಾರ್ಯಾಚರಿಸುತ್ತಿರುವುದು ನಿಜ ಎಂದು ಪಾಕ್ ಪ್ರಧಾನಿ ಇಮ್ರಾನ್ ಖಾನ್ ಒಪ್ಪಿಕೊಂಡಿದ್ದಾರೆ.

'ಭಯೋತ್ಪಾದನೆ ವಿರುದ್ಧ ಅಮೆರಿಕ ಸಾರಿದ ಸಮರದಲ್ಲಿ ನಾವು ಹೋರಾಡುತ್ತಿದ್ದೇವೆ. 9/11 ದಾಳಿಗೂ ಪಾಕಿಸ್ತಾನಕ್ಕೂ ಸಂಬಂಧವಿಲ್ಲ. ಅಲ್‌ ಖಾಯಿದಾ ಅಫ್ಘಾನಿಸ್ತಾನದ ಉಗ್ರ ಸಂಘಟನೆ. ಪಾಕಿಸ್ತಾನದಲ್ಲಿ ಉಗ್ರಗಾಮಿ ತಾಲಿಬಾನ್ ಸಂಘಟನೆ ಇಲ್ಲ. ಹಾಗಿದ್ದರೂ ನಾವು ಅಮೆರಿಕದ ಯುದ್ಧದಲ್ಲಿ ಭಾಗಿಯಾದೆವು. ದುರದೃಷ್ಟವಶಾತ್ ನಮ್ಮ ಪ್ರಯತ್ನಗಳೆಲ್ಲವೂ ವಿಫಲವಾದಾಗ, ನಾವು ನಮ್ಮ ಸರಕಾರಗಳನ್ನೇ ದೂಷಿಸಬೇಕಾದ ಪರಿಸ್ಥಿತಿ ಬಂದಿದೆ. ನಮ್ಮ ಸರಕಾರಗಳು ವಾಸ್ತವಿಕ ಸತ್ಯವನ್ನು ಅಮೆರಿಕದ ಮುಂದೆ ಬಿಚ್ಚಿಡಲೇ ಇಲ್ಲ' ಎಂದು ಖಾನ್ ಹೇಳಿದರು.

ಅಮೆರಿಕನ್ ಕಾಂಗ್ರೆಸ್‌ ಸದಸ್ಯರ ಪೈಕಿ ಪಾಕ್ ಪರ ಇರುವ ಗುಂಪಿನ ಅಧ್ಯಕ್ಷೆ ಶೈಲಾ ಜಾಕ್ಸನ್ ಲೀ ಆಯೋಜಿಸಿದ್ದ ಆತಿಥ್ಯದಲ್ಲಿ ಭಾಗವಹಿಸಿ ಇಮ್ರಾನ್ ಖಾನ್ ಮಾತನಾಡಿದರು. ಕೆಲವೊಂದು ವಿಷಯಗಳು ಪಾಕ್ ಸರಕಾರದ ನಿಯಂತ್ರಣದಲ್ಲಿ ಇಲ್ಲ ಎಂಬುದನ್ನು ಅವರು ಒಪ್ಪಿಕೊಂಡರು.

'ಪಾಕಿಸ್ತಾನದೊಳಗೆ 40 ವಿವಿಧ ಹೆಸರಿನ ಉಗ್ರ ಸಂಘಟನೆಗಳಿವೆ. ದಶಕಗಳ ಕಾಲ ಪಾಕ್ ಈ ಸಂಘಟನೆಗಳಿಗೆ ಆಶ್ರಯ ನೀಡಿ ಬೆಳೆಸಿದೆ. ಆದರೆ ಈಗ ಅದು ದುಬಾರಿಯಾಗಿ ಪರಿಣಮಿಸಿದೆ. ಪಾಕ್ ಅಸ್ತಿತ್ವಕ್ಕೇ ಉಗ್ರ ಸಂಘಟನೆಗಳು ಬೆದರಿಕೆಯಾಗಿ ಪರಿಣಮಿಸಿವೆ. ಹೀಗಾಗಿ ಭಯೋತ್ಪಾದನೆ ವಿರುದ್ಧ ಸಮರದಲ್ಲಿ ಅಮೆರಿಕ ಇನ್ನಷ್ಟು ಸಕ್ರಿಯವಾಗಿ ತೊಡಗಿಸಿಕೊಳ್ಳಬೇಕಿದೆ' ಎಂದು ಇಮ್ರಾನ್ ನುಡಿದರು.