ಚೀನಾದಲ್ಲಿವೆ ಇಂಟರ್ನೆಟ್‌ ನ್ಯಾಯಾಲಯಗಳು! ಆ್ಯಪ್‌ಗಳ ಮೂಲಕ ತೀರ್ಪು!

ಬೀಜಿಂಗ್‌: ಇದೇ ಮೊದಲ ಬಾರಿಗೆ ಚೀನಾದಲ್ಲಿಅಪರಾಧ ಪ್ರಕರಣಗಳ ವಿಚಾರಣೆಯನ್ನು ಕೃತಕ ಬುದ್ಧಿಮತ್ತೆ ಸಾಧನಗಳು ಆಲಿಸಿ ಕೋರ್ಟ್‌ನ ಚ್ಯಾಟಿಂಗ್‌ ಆ್ಯಪ್‌ಗಳ ಮೂಲಕ ತೀರ್ಪು ನೀಡಲಿವೆ. ' ಸೈಬರ್‌ಕೋರ್ಟ್‌' ಎಂದು ಕರೆಯಲಾಗುತ್ತಿ­ರುವ ಈ ಹೊಸ ಮಾದರಿ ನ್ಯಾಯದಾನ ವ್ಯವಸ್ಥೆ ಹ್ಯಾಂಗ್‌ಝಾವುನಲ್ಲಿದೆ.

ಸ್ಥಳೀ­ಯರು ಇದನ್ನು ಇಂಟರ್‌ನೆಟ್‌ ಕೋರ್ಟ್‌ ಎಂದು ಕರೆಯುತ್ತಿದ್ದು , ದಾವೆದಾರರು ವಿಡಿಯೊ ಚಾಟ್‌ ಮೂಲಕ ಜಡ್ಜ್‌ ಎದುರು ಹಾಜರಾ­ಗುತ್ತಾರೆ. ವಿಶೇಷವೆಂದರೆ ವಾದ-­ಪ್ರತಿವಾದ ಆಲಿಸುವ ಜಡ್ಜ್‌ ವ್ಯಕ್ತಿಯೇ ಅಲ್ಲ. ಅದೊಂದು ಕೃತಕ ಬುದ್ಧಿಮತ್ತೆ (ಎಐ) ತಂತ್ರಜ್ಞಾನ ಆಧಾರದಲ್ಲಿ ರಚಿಸಲಾದ ವ್ಯವಸ್ಥೆ. ಇದಕ್ಕೆ ಎಐ ಜಡ್ಜ್‌ ಎನ್ನುತ್ತಾರೆ.

ಆನ್‌ಲೈನ್‌ ವ್ಯಾಪಾರ ಸಂಬಂಧಿತ ವ್ಯಾಜ್ಯಗಳು, ಕೃತಿ ಸ್ವಾಮ್ಯ ಉಲ್ಲಂಘನೆ ಪ್ರಕರಣಗಳು ಹೆಚ್ಚಾಗಿ ಈಸೈಬರ್‌ಕೋರ್ಟ್‌ನಲ್ಲಿ ದಾಖಲಾಗುತ್ತಿದ್ದು ಬಹುತೇಕ ಪ್ರಕರಣಗಳಲ್ಲಿ ಕೋರ್ಟ್‌ನ ತೀರ್ಪು ಕೂಡ ಹೊರಬಿದ್ದಿದೆ. ಡಿಜಿಟಲ್‌ ಯುಗದಲ್ಲಿತ್ವರಿತ ನ್ಯಾಯದಾನ ನೀಡಲಾಗುತ್ತಿದೆ. ಯಾಕೆಂದರೆ ನ್ಯಾಯ ನಿಧಾನವಾದಷ್ಟು ತಿರಸ್ಕೃತಗೊಂಡಂತೆ ಎನ್ನುವುದು ನಮ್ಮ ಭಾವನೆ ಎಂದು ಇಂಟರ್‌ನೆಟ್‌ ಕೋರ್ಟ್‌ ಉಪಾಧ್ಯಕ್ಷ ನಿ ಡೆಫೆಂಗ್‌ ಹೇಳಿದ್ದಾರೆ.

2017ರಲ್ಲಿ ಚೀನಾ ಸರಕಾರ ಈ ಕೋರ್ಟ್‌ಗಳ ರಚನೆ ಆರಂಭಿಸಿತು. ಒಟ್ಟು 1.18 ಲಕ್ಷ ಪ್ರಕರಣಗಳು ಇಂಟರ್‌ನೆಟ್‌ ಕೋರ್ಟ್‌ಗೆ ಸಲ್ಲಿಕೆಯಾಗಿದ್ದವು. ಆ ಪೈಕಿ 88,401 ಪ್ರಕರಣಗಳ ವಿಚಾರಣೆ ಮುಗಿದಿದೆ ಎಂದಿದ್ದಾರೆ.