ಲಡಾಖ್ ಗಡಿಯಿಂದ ಸೇನೆ ಹಿಂದೆ ಸರಿಯುತ್ತಿದೆ: ಚೀನಾ ಅಧಿಕೃತ ಹೇಳಿಕೆ!

ಬೀಜಿಂಗ್: ಕಳೆದ ಒಂದು ತಿಂಗಳಿಗೂ ಅಧಿಕ ಕಾಲ ಪೂರ್ವ ಲಡಾಖ್ ಗಡಿಯಲ್ಲಿ ಬೀಡು ಬಿಟ್ಟಿದ್ದ ಸೇನೆಯನ್ನು ಹಿಂಪಡೆಯುತ್ತಿರುವುದಾಗಿ ಚೀನಾ ಅಧಿಕೃತವಾಗಿ ಘೋಷಿಸಿದೆ.

ಈ ಕುರಿತು ಮಾತನಾಡಿರುವ ಚೀನಾದ ವಿದೇಶಾಂಗ ಇಲಾಖೆ ವಕ್ತಾರೆ ಹುವಾ ಚುನ್‌ಯಿಂಗ್, ಭಾರತ-ಚೀನಾ ಉನ್ನತ ಸೇನಾ ಕಮಾಂಡರ್‌ಗಳ ಸಭೆಯಲ್ಲಿ ಕೈಗೊಂಡ ಸಕಾರಾತ್ಮಕ ಒಮ್ಮತದ ಪರಿಣಾಮವಾಗಿ ಗಡಿ ಉದ್ವಿಗ್ನತೆ ಕೊನೆಗೊಂಡಿದೆ ಎಂದು ಹೇಳಿದ್ದಾರೆ.

ಉಭಯ ಸೇನೆಗಳೂ ಗಡಿಯಿಂದ ಹಿಂದೆ ಸರಿಯಬೇಕು ಎಂಬ ಭಾರತದ ಪ್ರಸ್ತಾವನೆಯನ್ನು ಚೀನಾ ಒಪ್ಪಿಕೊಂಡಿದ್ದು, ಅದರಂತೆ ಗಡಿಯಿಂದ ಸೈನಿಕರನ್ನು ಮತ್ತು ಯುದ್ಧೋಪಕರಣಗಳನ್ನು ಹಿಂದಕ್ಕೆ ಕರೆಸಿಕೊಳ್ಳುತ್ತಿದೆ.

ಗಡಿ ಉದ್ವಿಗ್ನತೆಗೆ ಇತಿಶ್ರೀ: ಲಡಾಖ್ ಗಡಿಯಿಂದ ಹಿಂದೆ ಸರಿದ ಭಾರತ-ಚೀನಾ ಸೇನೆ!

ಇದಕ್ಕೆ ಪೂರಕವಾಗಿ ಭಾರತ ಕೂಡ ತನ್ನ ಸೇನೆಯನ್ನು ಗಡಿಯಿಂದ ಹಿಂದಕ್ಕೆ ಪಡೆದಿದ್ದು, ಗಡಿ ಉದ್ವಿಗ್ನತೆಯನ್ನು ಕೊನೆಗಾಣಿಸುವಲ್ಲಿ ಯಶಸ್ಸು ಕಾಣಲಾಗಿದೆ.


ಗಲ್ವಾನ್ ನದಿ ಪಾತ್ರದ ಪೆಟ್ರೋಲಿಂಗ್ ಪಾಯಿಂಟ್(ಗಡಿ ಗಸ್ತು)14,15 ಹಾಗೂ 17 ಸ್ಥಳಗಳಿಂದ ಉಭಯ ದೇಶಗಳೂ ತಮ್ಮ ಪಡೆಗಳನ್ನು ಹಿಂದಕ್ಕೆ ಪಡೆದಿವೆ ಎಂದು ಭಾರತೀಯ ಸೇನೆ ಕೂಡ ಸ್ಪಷ್ಟಪಡಿಸಿದೆ.

ಭಾರತ ಬಯಸಿದಂತಾಯ್ತು: ಗಡಿ ಸಮಸ್ಯೆಗೆ ಶಾಂತಿಯುತ ಪರಿಹಾರಕ್ಕೆ ಒಪ್ಪಿಗೆ!

ಕಳೆದ ಶನಿವಾರ(ಜೂನ್ 6) ನಡೆದ ಉಭಯ ದೇಶಗಳ ಉನ್ನತ ಸೇನಾ ಕಮಾಂಡರ್‌ಗಳ ಸಭೆಯಲ್ಲಿ, ಗಡಿ ಉದ್ವಿಗ್ನತೆ ಕಡಿಮೆ ಮಾಡಿ ಶಾಂತಿ ಮಾತುಕತೆಗಳಿಗೆ ಒತ್ತು ನೀಡುವ ನಿರ್ಣಯ ಕೈಗೊಳ್ಳಲಾಗಿದ್ದನ್ನು ಇಲ್ಲಿ ಸ್ಮರಿಸಬಹುದು.