ಗೂಗಲ್‌ ವಿರುದ್ಧದ ದಾವೆ ವಿಚಾರಣೆಗೆ ಭಾರತೀಯ ನ್ಯಾಯಾಧೀಶ ನೇಮಕ

ನ್ಯೂಯಾರ್ಕ್: ಗೂಗಲ್‌ ವಿರುದ್ಧ ಅಮೆರಿಕದ ಕಾನೂನು ಸಚಿವಾಲಯದ ಜತೆಗೆ 11 ರಾಜ್ಯಗಳ ಅಟಾರ್ನಿ ಜನರಲ್‌ಗಳು ಹೂಡಿರುವ ಸಿವಿಲ್‌ ಪ್ರಕರಣದ ವಿಚಾರಣೆಗೆ ಭಾರತೀಯ ಮೂಲದ ನ್ಯಾಯಾಧೀಶ ಅಮಿತ್‌ ಮೆಹ್ತಾ ಅವರನ್ನು ನೇಮಿಸಲಾಗಿದೆ.

ಸ್ಪರ್ಧಾತ್ಮಕತೆ ಬದಿಗೊತ್ತಿ ಜಾಲತಾಣದ ಶೋಧ ಮತ್ತು ಜಾಹೀರಾತು ಮಾರುಕಟ್ಟೆಯಲ್ಲಿ ತನ್ನದೇ ಪ್ರಾಬಲ್ಯ ಸಾಧಿಸಲು ಗೂಗಲ್‌ ಕಂಪನಿ ಕೆಲವು ಕಾನೂನುಬಾಹಿರ ಕ್ರಮಗಳ ಮೊರೆಹೋಗಿದೆ ಎನ್ನುವುದು ಪ್ರಮುಖ ಆರೋಪವಾಗಿದೆ. ಅರ್ಕಾನ್ಸಾಸ್‌, ಫ್ಲಾರಿಡಾ, ಜಾರ್ಜಿಯಾ, ಇಂಡಿಯಾನಾ, ಕೆಂಟಕಿ, ಲೂಸಿಯಾನಾ, ಮಿಸ್ಸಿಸಿಪಿ, ಮಿಸ್ಸೌರಿ, ಮಾಂಟನಾ, ದಕ್ಷಿಣ ಕೆರೊಲಿನಾ ಮತ್ತು ಟೆಕ್ಸಾಸ್‌ ರಾಜ್ಯದ ಅಟಾರ್ನಿ ಜನರಲ್‌ಗಳು ದಾವೆದಾರರಾಗಿದ್ದಾರೆ.

2014ರಲ್ಲಿಆಗಿನ ಅಮೆರಿಕ ಅಧ್ಯಕ್ಷ ಬರಾಕ್‌ ಒಬಾಮ ಅವರು ಕೊಲಂಬಿಯಾ ಜಿಲ್ಲಾಕೋರ್ಟ್‌ಗೆ ನ್ಯಾಯಾಧೀಶರನ್ನಾಗಿ ಅಮಿತ್‌ ಅವರನ್ನು ನೇಮಕ ಮಾಡಿದ್ದರು. ತದನಂತರ ವಾಷಿಂಗ್ಟನ್‌ ಫೆಡರಲ್‌ ಕೋರ್ಟ್‌ನಲ್ಲಿ ನ್ಯಾಯಾಧೀಶರಾಗಿ ಕಾರ್ಯನಿರ್ವಹಿಸುತ್ತಿರುವ ಅವರನ್ನು ಪ್ರಕರಣದ ವಿಚಾರಣೆ ಸಂಬಂಧ ಯಾವುದೇ ಸಾಂಪ್ರಾದಾಯಿಕ ಪದ್ಧತಿಗಳನ್ನು ಅನುಸರಿಸದೆ ನೇಮಕ ಮಾಡಲಾಗಿದೆ ಎಂದು ಸ್ಥಳೀಯ ವಾಷಿಂಗ್ಟನ್‌ ಪೋಸ್ಟ್‌ ವರದಿ ಮಾಡಿದೆ.

ಚೀನಾ, ಭಾರತದ ಗಾಳಿ ಕಲುಷಿತವಾಗಿದೆ: ಬಿಡೆನ್ ಜೊತೆಗಿನ ಮುಖಾಮುಖಿ ಚರ್ಚೆಯಲ್ಲಿ ಟ್ರಂಪ್‌ ಹೇಳಿಕೆ

ಗುಜರಾತ್‌ ಮೂಲ!
ನ್ಯಾ. ಅಮಿತ್‌ ಮೂಲತಃ ಗುಜರಾತಿನ ಪಾಟನ್‌ ಜಿಲ್ಲೆಯವರಾಗಿದ್ದು 1993ರಲ್ಲಿ ಜಾಜ್‌ರ್‍ಟೌನ್‌ ವಿಶ್ವವಿದ್ಯಾಲಯದಿಂದ ರಾಜಕೀಯ ಶಾಸ್ತ್ರ ಮತ್ತು ಅರ್ಥಶಾಸ್ತ್ರದಲ್ಲಿ ಪದವಿ ಪಡೆದಿದ್ದಾರೆ. ಬಳಿಕ ವರ್ಜಿನಿಯಾ ವಿವಿಯಲ್ಲಿ ಹೆಚ್ಚಿನ ವ್ಯಾಸಂಗ ಕೂಡ ಮಾಡಿದ್ದಾರೆ.