ಎಲ್ಲರೂ ಮೆಚ್ಚುವ ಸುರಸುಂದರಿ ಆಗಲು ಬಯಸಿದೆ ಭಾರತ: ಚೀನಾ

ಬೀಜಿಂಗ್‌: ಅಮೆರಿಕ ಜತೆ ಸೇನಾ ನೆಲೆ ಹಂಚಿಕೊಳ್ಳುವ ಭಾರತದ ನಿರ್ಧಾರ ಚೀನಾ ಕಣ್ಣನ್ನು ಕೆಂಪಗಾಗಿಸಿದ್ದು, ಅಲ್ಲಿನ ಮಾಧ್ಯಮ ಭಾರತವನ್ನು ಎಲ್ಲ ಪುರುಷರ ಮೆಚ್ಚುಗೆ ಬಯಸುವ ಸುಂದರ ಮಹಿಳೆಗೆ ಹೋಲಿಸಿದೆ.

ಅಮೆರಿಕ ಹಾಗೂ ಭಾರತ ನಡುವೆ ವಿಶ್ವಾಸದ ಕೊರತೆ ಇರುವುದರಿಂದ ಒಪ್ಪಂದ ಕುದುರಿಲ್ಲ. ಎಲ್ಲರ, ವಿಶೇಷವಾಗಿ ವಾಷಿಂಗ್ಟನ್‌ ಹಾಗೂ ಬೀಜಿಂಗ್‌ನ ಮೆಚ್ಚುಗೆಗೆ ಪಾತ್ರವಾಗಲು ಭಾರತ ಬಯಸುತ್ತದೆ. ಸೂಪರ್‌ ಪವರ್ ರಾಷ್ಟ್ರಗಳ ನಡುವೆ ನಿರ್ಣಾಯ ಪಾತ್ರವಹಿಸುವ ಮಹತ್ವಾಕಾಂಕ್ಷೆಯಿಂದಲೇ ಅಮೆರಿಕದ ಜತೆ ಒಪ್ಪಂದಕ್ಕೆ ಮುಂದಾಗಿದೆ ಎಂದು ಅದು ಹೇಳಿದೆ.

ರಕ್ಷಣಾ ಸಚಿವ ಮನೋಹರ್‌ ಪರಿಕರ್‌ ಅವರ ಮೊದಲ ಚೀನಾ ಪ್ರವಾಸ ಸೋಮವಾರ ಆರಂಭವಾಗಿದ್ದು, ಅವರ ಭೇಟಿ ಸಂದರ್ಭದಲ್ಲಿ ಸರಕಾರಿ ಸ್ವಾಮ್ಯದ ಗ್ಲೋಬಲ್‌ ಟೈಮ್ಸ್‌ ಈ ಲೇಖನ ಪ್ರಕಟಿಸಿದೆ.

'ಎಲ್ಲ ಪುರುಷರ ಮೆಚ್ಚಿಗೆ ಬಯಸುವ ಸುಂದರ ಮಹಿಳೆಯಂತೆ ಭಾರತ, ಬಲಾಡ್ಯರನ್ನು (ಅಮೆರಿಕ, ಚೀನಾ) ಮೆಚ್ಚಿಸಲು ಇಷ್ಟಪಡುವುದು, ಎಂದು 'ಭಾರತ-ಅಮೆರಿಕ ನಡುವಿನ ವ್ಯೂಹಾತ್ಮಕ ಅಪನಂಬಿಕೆಯಿಂದ ಕುದುರದ ಎಲ್‌ಎಸ್‌ಎ ಒಪ್ಪಂದ ' ಎಂಬ ಶೀರ್ಷಿಕೆಯೊಂದಿಗೆ ಪ್ರಕಟವಾಗಿರುವ ಲೇಖನದಲ್ಲಿ ಹೇಳಲಾಗಿದೆ.

ಅಮೆರಿಕದ ಎಚ್ಚರಿಕೆ:

ಸೇನಾ ನೆಲೆ ಹಂಚಿಕೊಳ್ಳುವ ಭಾರತದೊಂದಿಗೆ ಒಪ್ಪಂದ ಮಾಡಿಕೊಂಡಿರುವ ಅಮೆರಿಕ ಕಳೆದ ವಾರ ವಿವಾದಿತ ದಕ್ಷಿಣ ಚೀನಾ ಸಾಗರದಲ್ಲಿ ಶಕ್ತಿ ಪ್ರದರ್ಶನ ಮಾಡಿತ್ತು. ಈ ಭಾಗದಲ್ಲಿ ಎಗ್ಗಿಲ್ಲದೆ ನುಗ್ಗುತ್ತಿರುವ ಚೀನಾಕ್ಕೆ ಎಚ್ಚರಿಕೆ ಸಂದೇಶ ರವಾನಿಸುವುದು ಅಮೆರಿಕದ ಉದ್ದೇಶ.

ಚೀನಾ ಆಕ್ರಮಣಕಾರಿ ಪ್ರವೃತ್ತಿಗೆ ಕಡಿವಾಣ ಹಾಕುವ ದೃಷ್ಟಿಯಿಂದ, ವಿವಾದಿತ ಭಾಗದಲ್ಲಿ ಇನ್ನಷ್ಟು ಮಿಲಿಟರಿ ನೌಕೆ ನುಗ್ಗಿಸಲು ಒಬಾಮಾ ಆಡಳಿತ ನಿರ್ಧರಿಸಿದೆ. ಇದರಿಂದ ಕಂಗಟ್ಟಿರುವ ಚೀನಾ ಭಾರತದ ವಿರುದ್ಧ ಕಿಡಿಕಾರುತ್ತಿದೆ.