ಪ್ರಧಾನಿ ನರೇಂದ್ರ 'ಮೋಡಿ': ವಿಶ್ವಸಂಸ್ಥೆಯಲ್ಲಿ ವಿಶ್ವದ ವಿಶ್ವಾಸ ಗೆದ್ದ ಭಾರತ

ನ್ಯೂಯಾರ್ಕ್‌: ವಿಶ್ವಸಂಸ್ಥೆ ಸಾಮಾನ್ಯ ಅಧಿವೇಶನದಲ್ಲಿ ಪ್ರಧಾನ ನರೇಂದ್ರ ಮೋದಿ ಮಾಡಿದ ಭಾಷಣ ಹಾಗೂ ಕಳೆದ ಒಂದು ವಾರದಿಂದ ಅಮೆರಿಕ ಪ್ರವಾಸದಲ್ಲಿ ವಿಶ್ವ ಸಮುದಾಯದ ಮುಂದೆ ಪ್ರಸ್ತಾಪ ಪಡಿಸಿದ ವಿಷಯಗಳಿಂದ ಭಾರತ ಇಡೀ ವಿಶ್ವದ ಗಮನ ಸೆಳೆದಿದೆ ಮತ್ತು ವಿಶ್ವಾಸವನ್ನೂ ಗಳಿಸಿದೆ.

ಪ್ರಮುಖವಾಗಿ ಜಮ್ಮು ಕಾಶ್ಮೀರದ ವಿಷಯದಲ್ಲಿ ಪಾಕಿಸ್ತಾನದ ಕ್ಯಾತೆಯನ್ನು ಜಾಗತಿಕ ಮಟ್ಟದಲ್ಲಿಯೇ ಹೊಸಕಿ ಹಾಕಲಾಗಿದೆ.

ವಿಶ್ವ ಮಟ್ಟದಲ್ಲಿ ಜಮ್ಮು ಕಾಶ್ಮೀರವನ್ನು ಡಂಗುರ ಸಾರಲು ಪಾಕ್‌ ಪ್ರಧಾನಿ ಇಮ್ರಾನ್‌ ಖಾನ್‌ ಪ್ರಯತ್ನಿಸಿದರು. ಆದರೆ ವಿಶ್ವಸಂಸ್ಥೆಯ ಸಾಮಾನ್ಯ ಅಧಿವೇಶನದ ಭಾಷಣದಲ್ಲಿ ಮೋದಿಯವರು ಪಾಕಿಸ್ತಾನ ಹೆಸರು ಪ್ರಸ್ತಾಪಿಸದೇ ಟಾಂಗ್‌ ಕೊಟ್ಟರು.

ಜಮ್ಮು ಕಾಶ್ಮೀರಕ್ಕೆ ನೀಡಲಾಗಿದ್ದ ವಿಶೇಷ ಸ್ಥಾನಮಾನ ಸಂವಿಧಾನದ 370ನೇ ವಿಧಿಯನ್ನು ರದ್ದುಗೊಳಿಸಿದ್ದು ಏಕೆ ಮತ್ತು ಏಕೆ ಮತ್ತು ಏಕೆ ಎಂಬುದನ್ನು ವಿಶ್ವದ ನಾಯಕರ ಸಮ್ಮುಖದಲ್ಲಿ ಭಾರತ ಸ್ಪಷ್ಟಪಡಿಸಿದೆ.

ಇದು ಆಂತರಿಕ ವಿಚಾರ, ಅಭಿವೃದ್ಧಿಗಾಗಿ ಈ ಕ್ರಮ ಹಾಗೂ ಪಾಕಿಸ್ತಾನ ಜತೆಗಿನ ಸಮಸ್ಯೆಗೆ ದ್ವಿಪಕ್ಷೀಯ ಮಾತುಕತೆಯಿಂದ ಮಾತ್ರ ಪರಿಹಾರ ಸಾಧ್ಯ ಎಂಬುದನ್ನು ಸಾರಿ ಸಾರಿ ಹೇಳಿದೆ.

ಹೀಗಾಗಿ ಪಾಕಿಸ್ತಾನ ಎಷ್ಟೇ ಗಂಟಲು ಅರಚಿಕೊಂಡರೂ ವಿಶ್ವದ ಮುಂದೆ ಅದು ಕೇಳಿಸಲೇ ಇಲ್ಲ. ಪಾಕ್‌ ಪ್ರಧಾನಿ ಇಮ್ರಾನ್‌ ಖಾನ್‌ ಅಂತೂ ರಚ್ಚೆ ಹಿಡಿದವರಂತೆ ವಿಶ್ವಸಂಸ್ಥೆಯಲ್ಲಿ ಭಾಷಣ ಮಾಡಿದರು. ಇದಕ್ಕೆ ಭಾರತ ನೀಡಿದ ತಿರುಗೇಟು ಮತ್ತೊಂದು ರೀತಿಯ ಸರ್ಜಿಕಲ್‌ ಸ್ಟ್ರೈಕ್‌ ಆಗಿತ್ತು.

ನರೇಂದ್ರ ಮೋದಿ ಇಡೀ ಅಮೆರಿಕದಲ್ಲಿ ಮನೆ ಮಾತಾಗಿದ್ದರು. ಪ್ರಮುಖವಾಗಿ ನರೇಂದ್ರ ಮೋದಿ ತಮ್ಮ ಅಜೆಂಡಾವನ್ನು ಇಡೀ ವಿಶ್ವದ ಪ್ರಸ್ತುತಪಡಿಸಿ ಭಾರತಕ್ಕೆ ಜಯ ದಕ್ಕಿಸಿಕೊಟ್ಟಿದ್ದಾರೆ.

ವಿಶ್ವಸಂಸ್ಥೆಯ ಸಾಮಾನ್ಯ ಅಧಿವೇಶನಕ್ಕೆ ಈಗ ತೆರೆ ಬಿದ್ದಿದೆ. ಅದೇ ರೀತಿಯ ಪಾಕಿಸ್ತಾನದ ನಾಟಕಕ್ಕೆ ಹಾಗೂ ಅಲ್ಲಿಂದ ಹುಟ್ಟುತ್ತಿರುವ ಉಗ್ರವಾದಕ್ಕೂ ತೆರೆ ಬೀಳುವ ಸಮಯ ಕೂಡ ಬರಲಿ ಎಂದು ಆಶಿಸುವವರ ಸಂಖ್ಯೆ ಈಗ ಹೆಚ್ಚಾಗಿದೆ.