ಸಂಜಯ್‌ ಸುಬ್ರಹ್ಮಣ್ಯಂಗೆ ಡಾನ್‌ ಡೇವಿಡ್‌ ಪ್ರಶಸ್ತಿ

ಜೆರುಸಲೇಮ್‌: ಖ್ಯಾತ ಭಾರತೀಯ ಇತಿಹಾಸಕಾರ ಸಂಜಯ್‌ ಸುಬ್ರಹ್ಮಣ್ಯಂ ಅವರಿಗೆ ಇಸ್ರೇಲ್‌ನ ಪ್ರತಿಷ್ಠಿತ ಡಾನ್‌ ಡೇವಿಡ್‌ ಪ್ರಶಸ್ತಿ ಸಂದಾಯವಾಗಿದೆ.

ಆರಂಭಿಕ ಆಧುನಿಕ ಯುಗದಲ್ಲಿ ಏಷ್ಯನ್ನರು, ಯುರೋಪಿಯನ್ನರು ಹಾಗೂ ಉತ್ತರ ಮತ್ತು ದಕ್ಷಿಣ ಅಮೆರಿಕದ ಜನರ ನಡುವಿನ ಅಂತರ್‌ಸಾಂಸ್ಕೃತಿಕ ಸಂಬಂಧ ಕುರಿತು ಸಂಜಯ್‌ ಅವರ ಕೆಲಸಕ್ಕಾಗಿ ಈ ವರ್ಷದ ಪ್ರಶಸ್ತಿ ಲಭಿಸಿದೆ.

10 ಲಕ್ಷ ಡಾಲರ್‌ ಮೊತ್ತದ ಈ ಪ್ರಶಸ್ತಿಯನ್ನು ಬೃಹತ್‌ ಇತಿಹಾಸ ವಿಭಾಗದಲ್ಲಿ ಸಂಜಯ್‌ ಮತ್ತು ಚಿಕಾಗೊ ವಿಶ್ವವಿದ್ಯಾಲಯದ ಪ್ರೊ.ಕೆನ್ನೆತ್‌ ಪೊಮೆರಾನ್ಜ್‌ ಸಮನಾಗಿ ಹಂಚಿಕೊಂಡಿದ್ದಾರೆ.

ಸಂಜಯ್‌ ಅವರು ಕಾರ್ಯತಂತ್ರ ವಿಶ್ಲೇಷಕ ಕೆ.ಸುಬ್ರಹ್ಮಣ್ಯಂ ಅವರ ಮಗನಾಗಿದ್ದು, ಮಾಜಿ ವಿದೇಶಾಂಗ ಕಾರ್ಯದರ್ಶಿ ಎಸ್‌.ಜಯಶಂಕರ್‌ ಅವರ ಸಹೋದರರಾಗಿದ್ದಾರೆ.

ಹಿಂದಿನ, ಪ್ರಸ್ತುತ ಮತ್ತು ಭವಿಷ್ಯದ ಮಾನವ ಸಾಧನೆಯನ್ನು ಪ್ರತಿನಿಧಿಸುವ, ವೈಜ್ಞಾನಿಕ, ತಾಂತ್ರಿಕ ಮತ್ತು ಮಾನವಿಕ ಕ್ಷೇತ್ರಗಳಲ್ಲಿ ಅತ್ಯುತ್ತಮ ಸಾಧನೆ ಮಾಡಿದವರಿಗೆ ವಾರ್ಷಿಕವಾಗಿ ಅಂತಾರಾಷ್ಟ್ರೀಯ ಡಾನ್‌ ಡೇವಿಡ್‌ ಪ್ರಶಸ್ತಿ ನೀಡಲಾಗುತ್ತದೆ. ಪ್ರತಿ ವರ್ಷ ಮೂರು ಡಾನ್‌ ಡೇವಿಡ್‌ ಪ್ರಶಸ್ತಿ ಪ್ರದಾನ ಮಾಡಲಾಗುತ್ತದೆ.