ಬಿಸಿಲಿನ ತಾಪಕ್ಕೆ ಅಮೆರಿಕದ ಮರುಭೂಮಿಯಲ್ಲಿ ಸಾವನ್ನಪ್ಪಿದ ಭಾರತದ ಬಾಲಕಿ

ಅರಿಜೋನಾ: ಮೆಕ್ಸಿಕೋ ಗಡಿಯಿಂದ ಅಮೆರಿಕಕ್ಕೆ ವಲಸೆ ಹೋಗುತ್ತಿದ್ದ ಭಾರತೀಯ ಮೂಲ ಪರಿವಾರದ 6 ವರ್ಷದ ಮಗುವೊಂದು ಬಿಸಿಲ ಉರಿ ತಾಳಲಾರದೆ ಸಾವನ್ನಪ್ಪಿರುವ ಹೃದಯ ವಿದ್ರಾವಕ ಘಟನೆ ಬೆಳಕಿಗೆ ಬಂದಿದೆ. ಅರಿಜೋನಾ ಮರುಭೂಮಿಯಲ್ಲಿ ದುರ್ಮರಣವನ್ನಪ್ಪಿದ ಎರಡನೇ ಪ್ರಕರಣ ಇದಾಗಿದೆ . ಕೆಲ ತಿಂಗಳ ಹಿಂದೆ ಸಹ ವಲಸಿಗ ಕುಟುಂಬದ ಮಗುವೊಂದು ಬಿಸಿಲ ತಾಪಕ್ಕೆ ಸಾವನ್ನಪ್ಪಿತ್ತು.

6 ವರ್ಷದ ಬಾಲಕಿ ಗುರುಪ್ರೀತ್ ಕೌರ್ ಸೂರ್ಯಾಘಾತದಿಂದ ಸಾವನ್ನಪ್ಪಿದ್ದಾಳೆ ಎಂದು ಅಮೆರಿಕಾ ಗಡಿ ಗಸ್ತು ಪಡೆ ಅಧಿಕಾರಿಗಳು ಮತ್ತು ವೈದ್ಯರು ಖಚಿತ ಪಡಿಸಿದ್ದಾರೆ.

ಇನ್ನು ಕೆಲವೇ ದಿನಗಳಲ್ಲಿ ತನ್ನ 7ನೇ ಜನ್ಮದಿನವನ್ನು ಆಚರಿಸಿಕೊಳ್ಳಲಿದ್ದ ಬಾಲಕಿ ಅರಿಜೋನಾದ ಲ್ಯೂಕ್‌ವಿಲ್ಲೆ ಎಂಬಲ್ಲಿ ಶವವಾಗಿ ಪತ್ತೆಯಾಗಿದ್ದು, ಆ ಸಂದರ್ಭದಲ್ಲಿ ತಾಪಮಾನ 42 ಡಿಗ್ರಿ ಸೆಲ್ಸಿಯಸ್ ಇತ್ತು. ದೇಹ ಗರಿಷ್ಠ ಉಷ್ಣಾಂಶ ತಡೆದುಕೊಳ್ಳಲಾಗದ ಹಿನ್ನೆಲೆಯಲ್ಲಿ ಆಕೆ ಸಾವನ್ನಪ್ಪಿದ್ದಾಳೆ ಎಂದು ವೈದ್ಯರು ಹೇಳಿದ್ದಾರೆ.

ಬಾಲಕಿ, ಆಕೆಯ ತಾಯಿ ಸೇರಿದಂತೆ ಭಾರತೀಯ ಮೂಲದ ಐವರನ್ನು ಮಾನವ ಕಳ್ಳ ಸಾಗಣೆದಾರರು ಲ್ಯೂಕ್‌ವಿಲ್ಲೆಯಲ್ಲಿ ಇಳಿಸಿ ಹೋಗಿದ್ದರು. ಅಲ್ಲಿಂದ ಅವರು ಅಮೆರಿಕಾ ಕಡೆ ಸಾಗಿದ್ದು ಬಳಲಿದ ಮಗಳನ್ನು ನೋಡಿಕೊಳ್ಳುವಂತೆ ಮಹಿಳೆಯೊಬ್ಬರ ಬಳಿ ಬಿಟ್ಟು ನೀರು ಹುಡುಕುತ್ತಾ ತಾಯಿ ಎಲ್ಲಿಗೋ ಹೋಗಿದ್ದರು. ಆದರೆ ಮಗು ಬಿಸಿಲ ತಾಪಕ್ಕೆ ಸಾವನ್ನಪ್ಪಿದೆ.

ಮಗಳನ್ನು ಹುಡುಕುತ್ತಾ 22 ಗಂಟೆಗಳ ಕಾಲ ಸುತ್ತಾಡುತ್ತಿದ್ದ ತಾಯಿ ಈಗ ಗಸ್ತು ಅಧಿಕಾರಿಗಳ ಸುಪರ್ದಿಯಲ್ಲಿದ್ದಾರೆ.

ಕಳ್ಳ ಸಾಗಣೆದಾರರ ರಾಕ್ಷಸೀ ಕೃತ್ಯಕ್ಕೆ ಅಮಾಯಕ ವಲಸಿಗರು ಪ್ರಾಣ ಬಿಡುತ್ತಲೇ ಇದ್ದಾರೆ ಎಂದು ಗಸ್ತು ಅಧಿಕಾರಿಗಳು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.