ಜೋ ಬಿಡೆನ್‌ ಪತ್ನಿಗೆ ಭಾರತೀಯ ಮೂಲದ ಮಾಲಾ ಅಡಿಗ ನೀತಿ ನಿರ್ದೇಶಕಿ

ವಾಷಿಂಗ್ಟನ್‌: ಅಮೆರಿಕದ ನಿಯೋಜಿತ ಅಧ್ಯಕ್ಷ ಜೋ ಬಿಡೆನ್‌ ಅವರ ಪತ್ನಿ ಜಿಲ್‌ ಬಿಡೆನ್‌ ಅವರ ನೀತಿ ನಿರ್ದೇಶಕಿಯಾಗಿ ಭಾರತೀಯ ಮೂಲದ ಮಾಲಾ ಅಡಿಗ ನೇಮಕವಾಗಿದ್ದಾರೆ.

ಮಾಲಾ ಅಡಿಗ ಅವರು ಈ ಹಿಂದೆ ಜಿಲ್‌ ಬಿಡೆನ್‌ ಅವರಿಗೆ ಹಿರಿಯ ಸಲಹೆಗಾರರಾಗಿದ್ದರು. ಜೊತೆಗೆ ಬಿಡೆನ್‌-ಕಮಲಾ ಹ್ಯಾರಿಸ್‌ ಚುನಾವಣಾ ಪ್ರಚಾರದ ಹಿರಿಯ ನೀತಿ ಸಲಹೆಗಾರರಾಗಿದ್ದರು. ಇದಕ್ಕೂ ಮೊದಲು ಬಿಡೆನ್‌ ಫೌಂಡೇಷನ್‌ನಲ್ಲಿ ಉನ್ನತ ಶಿಕ್ಷಣ ಮತ್ತು ಸೇನಾ ಕುಟುಂಬಗಳ ವಿಭಾಗದ ನಿರ್ದೇಶಕಿಯೂ ಆಗಿದ್ದರು. ಇದೀಗ ಅವರು ಅಮೆರಿಕದ ನಿಯೋಜಿತ ಪ್ರಥಮ ಮಹಿಳೆ ಜಿಲ್‌ ಬಿಡೆನ್‌ ಅವರ ನೀತಿ ನಿರ್ದೇಶಕಿ ಹುದ್ದೆಗೆ ಆಯ್ಕೆಯಾಗಿದ್ದಾರೆ.

ಈ ಹಿಂದೆ ಬರಾಕ್‌ ಒಬಾಮಾ ಆಡಳಿತದಲ್ಲಿಯೂ ಅವರು ಶಿಕ್ಷಣ ಮತ್ತು ಸಾಂಸ್ಕೃತಿಕ ವ್ಯವಹಾರ ಇಲಾಖೆಯ ಉಪಸಹಾಯಕ ಕಾರ್ಯದರ್ಶಿಯಾಗಿದ್ದರು. ಇತರ ಹಲವು ಹುದ್ದೆಗಳನ್ನೂ ಅವರು ನಿಭಾಯಿಸಿದ್ದರು.

ಜೋ ಬಿಡೆನ್‌ ಸಂಪುಟದಲ್ಲಿ ಇಬ್ಬರು ಭಾರತೀಯ ಮೂಲದವರಿಗೆ ಸ್ಥಾನ?
ಇಲಿನಾಯ್ಸ್‌ ಮೂಲದ ಮಾಲಾ ಅಡಿಗ ಸಾರ್ವಜನಿಕ ಆರೋಗ್ಯ ವಿಷಯದಲ್ಲಿ ಪದವಿ ಪಡೆದಿದ್ದು, ಕಾನೂನು ಅಭ್ಯಾಸವನ್ನೂ ನಡೆಸಿದ್ದಾರೆ. ಕಾನೂನು ಸಂಸ್ಥೆಯೊಂದರಲ್ಲಿ ಉದ್ಯೋಗದಲ್ಲಿದ್ದ ಇವರು 2008ರಲ್ಲಿ ಬರಾಕ್‌ ಒಬಾಮಾ ಅವರ ಚುನಾವಣಾ ಪ್ರಚಾರದಲ್ಲಿ ಕಾಣಿಸಿಕೊಂಡಿದ್ದರು.