ಪಾಕ್‌ ಅಸೆಂಬ್ಲಿ ಚುನಾವಣೆಯಲ್ಲಿ ಭಾರತೀಯ ಮಹಿಳೆ ಸ್ಪರ್ಧೆ

ಕರಾಚಿ: ಪಾಕಿಸ್ತಾನದ ಸಿಂಧ್‌ ಪ್ರಾಂತದ ಹಿಂದೂ ಮಹಿಳೆ ಸುನಿತಾ ಪರ್ಮಾರ್‌ ಅವರು ಜುಲೈ 25ರಂದು ನಡೆಯಲಿರುವ ಪ್ರಾಂತೀಯ ಅಸೆಂಬ್ಲಿ ಚುನಾವಣೆಯಲ್ಲಿ ಸ್ಪರ್ಧಿಸಿದ್ದಾರೆ. ಇದರೊಂದಿಗೆ ಪಾಕ್‌ ಚುನಾವಣೆಯಲ್ಲಿ ಸ್ಪರ್ಧಿಸಿದ ಅಲ್ಪಸಂಖ್ಯಾತ ಸಮುದಾಯದ ಮೊದಲ ಮಹಿಳೆ ಎಂಬ ಹಿರಿಮೆ ಅವರದಾಗಲಿದೆ.

ಮೇಘವಾರ್‌ ಸಮುದಾಯದ, 31 ವರ್ಷ ಪ್ರಾಯದ ಪರ್ಮಾರ್‌ ಅವರು ಪಾಕಿಸ್ತಾನದಲ್ಲೇ ಅತೀ ಹೆಚ್ಚು ಹಿಂದೂಗಳು ನೆಲೆಸಿರುವ ತರ್ಪಾರ್ಕರ್‌ ಜಿಲ್ಲೆಯ ಸಿಂಧ್‌ ಅಸೆಂಬ್ಲಿ ಕ್ಷೇತ್ರದಲ್ಲಿ ಪಕ್ಷೇತರ ಅಭ್ಯರ್ಥಿಯಾಗಿ ಕಣಕ್ಕೆ ಇಳಿದಿದ್ದಾರೆ. ''ಹಿಂದಿನ ಸರಕಾರಗಳು ಈ ಪ್ರದೇಶದ ಜನರಿಗೆ ಏನೂ ಮಾಡಿಲ್ಲ. 21ನೇ ಶತಮಾನದಲ್ಲಿ ಕೂಡ ಇಲ್ಲಿ ಮಹಿಳೆಯರಿಗೆ ಮೂಲಭೂತ ಆರೋಗ್ಯ ಸೌಲಭ್ಯಗಳಾಗಲೀ, ವಿದ್ಯಾಭ್ಯಾಸದ ವ್ಯವಸ್ಥೆಯಾಗಲೀ ಸಿಗುತ್ತಿಲ್ಲ. ಮಹಿಳೆಯರು ದುರ್ಬಲರು ಅಥವಾ ಕೀಳು ಎಂದು ತಿಳಿದುಕೊಂಡಿದ್ದ ಕಾಲವೊಂದಿತ್ತು. ಆದರೆ, ಇದು 21ನೇ ಶತಮಾನ. ನಾವು ಸಿಂಹದ ವಿರುದ್ಧ ಹೋರಾಡುವುದಕ್ಕೂ ಸಿದ್ಧರಿದ್ದೇವೆ. ಸದ್ಯ ಚುನಾವಣೆ ಜಯಿಸುವ ಆತ್ಮವಿಶ್ವಾಸದಲ್ಲಿದ್ದೇನೆ,'' ಎಂದು ಪರ್ಮಾರ್‌ ಶುಕ್ರವಾರ ಸುದ್ದಿಗಾರರಿಗೆ ತಿಳಿಸಿದ್ದಾರೆ.