ವರ್ಷದ ಮೊಟ್ಟ ಮೊದಲ ಭಾರತದ ಉಪಗ್ರಹವನ್ನು ಫ್ರಾನ್ಸ್ ನ ಗಯಾನದಿಂದ ಯಶಸ್ವಿಯಾಗಿ ಹಾರಿಸಿದ ಇಸ್ರೋ

ಗಯಾನಾ: 2020ರ ಈ ವರ್ಷದ ಪ್ರಪ್ರಥಮ ಭಾರತದ ಉಪಗ್ರಹವನ್ನು ಫ್ರಾನ್ಸ್ನ ಫ್ರೆಂಚ್ ಗಯಾನದಿಂದ ನಸುಕಿನಲ್ಲಿ ಯಶಸ್ವಿಯಾಗಿ ಉಡಾವಣೆ ಮಾಡಲಾಗಿದೆ. ಇಂದು ಉಡಾವಣೆಗೊಂಡ ಜಿ-ಸ್ಯಾಟ್ ಸಂಪರ್ಕ ಉಪಗ್ರಹ ನಿಗದಿತ ಕಕ್ಷೆ ಸೇರುವಲ್ಲಿ ಯಶಸ್ವಿಯಾಗಿದ್ದು, ಭಾರತ ಸಂಪರ್ಕ ಕ್ಷೇತ್ರದಲ್ಲಿ ಮತ್ತೊಂದು ಮಹತ್ವದ ಹೆಜ್ಜೆ ಇಟ್ಟಿದೆ.

ಭಾರತೀಯ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆ (ಇಸ್ರೋ)ದ ಜಿ-ಸ್ಯಾಟ್ ಸಂಪರ್ಕ ಉಪಗ್ರಹವನ್ನು ಐರೋಪ್ಯ ಅಂತರಿಕ್ಷ ಸಂಸ್ಥೆಯ ಭಾರೀ ತೂಕದ ಉಡಾವಣಾ ವಾಹನ ಏರಿಯನ್-5(ವಿಎ 251) ಮೂಲಕ 2.35ರ ಮುಂಜಾವಿನಲ್ಲಿ ನಭಕ್ಕೆ ಹಾರಿಸಲಾಯ್ತು.

ನಭಕ್ಕೆ ಹಾರಿದ 38 ನಿಮಿಷಗಳ ನಂತರ ಭೂಸ್ಥಿರ ಕಕ್ಷೆಯಲ್ಲಿ ಜಿ ಸ್ಯಾಟ್-30 (GSAT30 )ಕಮ್ಯೂನಿಕೇಷನ್ ಸ್ಯಾಟಿಲೈಟ್‍ನನ್ನು ಇರಿಸುವಲ್ಲಿ ಯಶ ಕಂಡಿದ್ದು, 3 ,357 ಕೆಜಿ ತೂಕದ ಈ ಜಿಸ್ಯಾಟ್-30 ಉಪಗ್ರಹವು ಇನ್‍ಸ್ಯಾಟ್-4ಎ ಗಗನನೌಕೆಗೆ ಪರ್ಯಾಯವಾಗಿ ತನ್ನ ಕೆಲಸ ನಿರ್ವಹಿಸಲಿದೆ.

ಜಿಸ್ಯಾಟ್-30 ಉಪಗ್ರಹ ಯಶಸ್ವಿಯಾಗಿ ಉಡಾವಣೆಯಾದ ಬಳಿಕ ಅಭಿಪ್ರಾಯ ತಿಳಿಸಿರುವ ಇಸ್ರೋ ಅಧ್ಯಕ್ಷ ಕೆ. ಶಿವನ್, ಕೆಯು ಬ್ಯಾಂಡ್‌ನಲ್ಲಿ ಭಾರತದ ಮುಖ್ಯ ಪ್ರದೇಶ ಮತ್ತು ದ್ವೀಪಗಳ ಮೂಲಕ ಸಂಪರ್ಕ ವ್ಯವಸ್ಥೆಯನ್ನು ಮೇಲ್ದರ್ಜೆಗೇರಿಸಲಿದೆ. ಅಲ್ಲದೆ, ಸಿ ಬ್ಯಾಂಡ್ ಮೂಲಕ ಕೊಲ್ಲಿ,ಏಷ್ಯಾ ಮತ್ತು ಆಸ್ಟ್ರೇಲಿಯಾ ರಾಷ್ಟ್ರಗಳ ಸಂಪರ್ಕ ವ್ಯವಸ್ಥೆಗೂ ಇದು ಸಹಾಯಕವಾಗಲಿದೆ ಎಂದು ಹೇಳಿದ್ದಾರೆ. ಪ್ರಧಾನಿ ಕೂಡ ಈ ಯಶಸ್ಸಿಗೆ ಅಭಿನಂದನೆ ಸಲ್ಲಿಸಿದ್ದಾರೆ.

ಡಿಟಿಎಚ್ ಟೆಲಿಕಾಂ ಸೇವೆ ಸಂಪರ್ಕ, ಟೆಲಿವಿಷನ್ ಆಫ್ ಲಿಂಕಿಂಗ್ ಮತ್ತು ಟೆಲಿಫೋರ್ಟ್ ಸರ್ವೀಸ್‍ಗಳು, ಡಿಜಿಟಲ್ ಸ್ಯಾಟ್‍ಲೈಟ್, ನ್ಯೂಸ್ ಗ್ಯಾದರಿಂಗ್(ಡಿಎಸ್‍ಎನ್‍ಜಿ) ಹಾಗೂ ಇ-ಆಡಳಿತ ಸೌಲಭ್ಯಕ್ಕೂ ಈ ಉಪಗ್ರಹ ನೆರವಾಗಲಿದೆ.