ಸುಂಕ ಇಳಿಸುವಂತೆ ಟ್ರಂಪ್‌ ಒತ್ತಾಯ

ವಾಷಿಂಗ್ಟನ್‌:ಜಪಾನ್‌ನಲ್ಲಿ ನಡೆಯುತ್ತಿರುವ ಜಿ-20 ಶೃಂಗದಲ್ಲಿ ಪ್ರಧಾನಿ ನರೇಂದ್ರ ಮೋದಿ ಅವರೊಂದಿಗೆ ಮುಖಾಮುಖಿಯಾಗುವ ಮುನ್ನವೇ ಅಮೆರಿಕ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌, ಭಾರತ ಅಮೆರಿಕದ ಉತ್ಪನ್ನಗಳ ಮೇಲೆ ಹೇರಿರುವ ಸುಂಕ ವಿಪರೀತವಾಗಿದೆ. ಇದನ್ನು ಇಳಿಸಲೇಬೇಕು ಎಂದು ಆಗ್ರಹಿಸಿದ್ದಾರೆ.
ಟ್ವಿಟರ್‌ನಲ್ಲಿ ಅಸಮಾಧಾನ ಹೊರಹಾಕಿರುವ ಟ್ರಂಪ್‌'' ಅಮೆರಿಕ ವಿರುದ್ಧ ಹಲವು ವರ್ಷಗಳಿಂದ ಹೇರಲಾಗಿರುವ ಸುಂಕದ ಬಗ್ಗೆ ಪ್ರಧಾನಿ ಮೋದಿ ಅವರೊಂದಿಗೆ ಚರ್ಚಿಸಲು ಬಯಸುತ್ತೇನೆ. ಇತ್ತೀಚೆಗೆ ಮತ್ತೆ ನಮ್ಮ ಉತ್ಪನ್ನಗಳ ಮೇಲೆ ಸುಂಕ ಏರಿಸಲಾಗಿದೆ. ಇದು ಸ್ವೀಕಾರಾರ್ಹವಲ್ಲ'', ಎಂದಿದ್ದಾರೆ.
ವ್ಯಾಪಾರಕ್ಕೆ ಆದ್ಯತೆ ನೀಡಲಾಗಿರುವ ರಾಷ್ಟ್ರಗಳ ಪಟ್ಟಿಯಿಂದ ಭಾರತವನ್ನು ಟ್ರಂಪ್‌ ಸರ್ಕಾರ ಕಳೆದ ತಿಂಗಳು ಕೈಬಿಟ್ಟ ಹಿನ್ನೆಲೆಯಲ್ಲಿ ಸುಮಾರು 25 ಅಮೆರಿಕ ನಿರ್ಮಿತ ಉತ್ಪನ್ನಗಳ ಮೇಲಿನ ಸುಂಕವನ್ನು ಭಾರತ ಹೆಚ್ಚಿಸಿತ್ತು.
ಕೆಲದಿನಗಳ ಹಿಂದೆ ಭಾರತಕ್ಕೆ ಭೇಟಿ ನೀಡಿದ್ದ ಅಮೆರಿಕ ವಿದೇಶಾಂಗ ಸಚಿವ ಮೈಕ್‌ ಪೊಂಪಿಯೊ ಕೂಡ ಉಭೈ ರಾಷ್ಟ್ರಗಳ ನಡುವಿನ ವ್ಯಾಪಾರ ಬಿಕ್ಕಟ್ಟು ಶಮನಕ್ಕೆ ಸರಳೀಕೃತ ಸೂತ್ರವನ್ನು ಕಂಡುಕೊಳ್ಳುವ ಇಚ್ಛೆ ವ್ಯಕ್ತಪಡಿಸಿದ್ದರು. ಅಮೆರಿಕ ನಿರ್ಮಿತ ಹಾರ್ಲೆ ಡೇವಿಡ್‌ಸನ್‌ ಮೋಟಾರ್‌ಸೈಕಲ್‌ಗಳ ಮೇಲೆ ಭಾರತದ ಸುಂಕ ಹೆಚ್ಚಿದೆ ಎಂದು ಟ್ರಂಪ್‌ ಆಕ್ಷೇಪ ವ್ಯಕ್ತಪಡಿಸಿದ ಹಿನ್ನೆಲೆಯಲ್ಲಿ ಕಳೆದ ಫೆಬ್ರವರಿಯಲ್ಲಿ ಶೇ. 50ರಷ್ಟು ಸುಂಕವನ್ನು ಮೋದಿ ಸರ್ಕಾರ ಇಳಿಸಿತ್ತು.
ಸುಮಾರು 38,669 ಕೋಟಿ ರೂ. ಮೊತ್ತದವರೆಗಿನ ಉತ್ಪನ್ನಗಳನ್ನು ಸುಂಕ ರಹಿತವಾಗಿ ರಫ್ತು ಮಾಡಲು ಅನುಕೂಲ ನೀಡುವ 'ವ್ಯಾಪಾರಕ್ಕೆ ಆದ್ಯತೆಯಿರುವ ರಾಷ್ಟ್ರ' ಪಟ್ಟಿಯಿಂದ ಭಾರತವನ್ನು ಅಮೆರಿಕ ಇತ್ತೀಚೆಗೆ ತೆಗೆದು ಹಾಕಿತ್ತು. ಇದಕ್ಕೆ ಪ್ರತಿಯಾಗಿ ಅಮೆರಿಕ ಉತ್ಪನ್ನಗಳ ಮೇಲೆ ಆಮದು ಸುಂಕವನ್ನು ಭಾರತ ಶೇ.120ರಷ್ಟು ಹೆಚ್ಚಿಸಿತ್ತು. 2018ರಲ್ಲಿ ಅಮೆರಿಕ-ಭಾರತ ನಡುವೆ ಸುಮಾರು 9.81 ಲಕ್ಷ ಕೋಟಿ ರೂ. ಮೊತ್ತದ ವ್ಯಾಪಾರ ನಡೆದಿದೆ.