ಲಂಡನ್‌: ಇನ್ಫೋಸಿಸ್‌ ಸಂಸ್ಥಾಪಕರಾದ ನಾರಾಯಣಮೂರ್ತಿ ಅವರ ಅಳಿಯ ರಿಷಿ ಸುನಾಕ್‌ ಸೇರಿದಂತೆ ಭಾರತೀಯ ಮೂಲದ ಇಬ್ಬರು ಸಂಸದರು ಬ್ರಿಟನ್‌ನ ಥೆರೇಸಾ ಮೇ ಅವರ ಸಂಪುಟದಲ್ಲಿ ಸಚಿವರಾಗಿ ಸ್ಥಾನ ಪಡೆದಿದ್ದಾರೆ.
ಮಂಗಳವಾರ ಸಚಿವ ಸಂಪುಟ ಪುನಾರಚನೆ ಮಾಡಿರುವ ಥೆರೇಸಾ ಅವರು ರಿಷಿ ಮತ್ತು ಗೋವಾ ಮೂಲದ ಮತ್ತೊಬ್ಬ ಸಂಸದರಾದ ಸುಯೆಲ್ಲಾ ಫರ್ನಾಂಡಿಸ್‌ ಅವರಿಗೆ ಸ್ಥಾನ ಕಲ್ಪಿಸಿದ್ದಾರೆ.
ರಿಷಿ ಅವರಿಗೆ ಸ್ಥಳೀಯ ಆಡಳಿತ, ವಸತಿ ಹಾಗೂ ಸಮುದಾಯ ಖಾತೆಯ ಸಹಾಯಕ ಸಚಿವರ ಸ್ಥಾನ ನೀಡಲಾಗಿದೆ.
ಫರ್ನಾಂಡಿಸ್‌ ಅವರನ್ನು ಬ್ರೆಕ್ಸಿಟ್‌ ವಿಭಾಗದ ಸಹಾಯಕ ಸಚಿವರಾಗಿ ನೇಮಿಸಲಾಗಿದೆ. ಥೆರೇಸಾ ಮೇ ಅವರು ಅಧಿಕೃತ ಟ್ವಿಟರ್‌ ಖಾತೆಯಲ್ಲಿ ಈ ವಿಷಯ ಪ್ರಕಟಿಸಿದ್ದಾರೆ.
2015ರ ಚುನಾವಣೆಯಲ್ಲಿ ಉತ್ತರ ಯಾರ್ಕ್‌ಶೈರ್‌ನ ರಿಚ್‌ಮಂಡ್‌ ಕ್ಷೇತ್ರದಿಂದ ಜಯಗಳಿಸಿದ ರಿಷಿ ಅವರು 2017ರಲ್ಲಿ ಮತ್ತೆ ಮರು ಆಯ್ಕೆಗೊಂಡಿದ್ದರು.
ಈ ಇಬ್ಬರೂ ಸಂಸದರು ಬ್ರೆಕ್ಸಿಟ್‌ ವಿಚಾರದಲ್ಲಿ ಪ್ರಧಾನಿ ಥೆರೇಸಾ ಮೇ ಅವರಿಗೆ ಭಾರಿ ಬೆಂಬಲ ಸೂಚಿಸಿದ್ದರು.
37ರ ಹರೆಯದ ರಿಷಿ ಅವರು, ಆಕ್ಸ್‌ಫರ್ಡ್‌ ಮತ್ತು ಸ್ಟ್ಯಾಂಡ್‌ಫೋರ್ಡ್‌ ವಿಶ್ವವಿದ್ಯಾಲಯಗಳ ಹಳೆಯ ವಿದ್ಯಾರ್ಥಿಯಾಗಿದ್ದು, ಬೆಂಗಳೂರು ಮೂಲದ 'ಸಿಲಿಕಾನ್‌ ವ್ಯಾಲಿ' ಕಂಪನಿಯ ಸಹ ಸಂಸ್ಥಪಕರೂ ಆಗಿದ್ದಾರೆ.
ಸ್ಟ್ಯಾಂಡ್‌ಫೋರ್ಡ್‌ ವಿಶ್ವವಿದ್ಯಾಲಯದಲ್ಲಿ ನಾರಾಯಣ ಮೂರ್ತಿ ಅವರ ಪುತ್ರಿ ಅಕ್ಷತಾ ಅವರೊಂದಿಗೆ ರಿಷಿ ಪರಿಚಯವಾಗಿತ್ತು, ನಂತರ ಇವರಿಬ್ಬರೂ ವಿವಾಹವಾಗಿದ್ದರು.