ಉಷ್ಣ ವಲಯದಲ್ಲಿ ಜನಿಸಿದ ಜಗತ್ತಿನ ಮೊದಲ ಹಿಮಕರಡಿ ‘ಇನುಕಾ’ ಇನ್ನಿಲ್ಲ

ಸಿಂಗಾಪುರ: ಜಗತ್ತಿನಲ್ಲೇ ಮೊದಲ ಬಾರಿಗೆ ಉಷ್ಣ ವಲಯದಲ್ಲಿ ಜನಿಸಿದ ಗಂಡು ಹಿಮಕರಡಿ 27 ವರ್ಷದ ಇನುಕಾ ಸಿಂಗಾಪುರದ ಮೃಗಾಲಯದಲ್ಲಿ ಬುಧವಾರ ಮೃತಪಟ್ಟಿದೆ. ಸಾಮಾನ್ಯವಾಗಿ ಹಿಮ ಪ್ರದೇಶಗಳಲ್ಲಿ ವಾಸಿಸುವ ಈ ಕರಡಿಗಳು 18ರಿಂದ 20 ವರ್ಷ ಬದುಕುತ್ತವೆ. ಆದರೆ ಝೂನಲ್ಲಿ ಸಿಬ್ಬಂದಿಯ ಅಕ್ಕರೆಯ ಆರೈಕೆಯಿಂದ ಇನುಕಾ 27 ವರ್ಷ ಬದುಕಿತ್ತು.

ಸಿಂಗಾಪುರ ಝೂನ ಪ್ರಮುಖ ಆಕರ್ಷಣೆಯಾಗಿದ್ದ ಇನುಕಾ ಕೆಲ ವರ್ಷಗಳಿಂದ ಸಂಧಿವಾತ, ಹಲ್ಲಿನ ಸಮಸ್ಯೆ, ಕಿವಿ ಸೋಂಕಿನಿಂದ ಬಳಲುತ್ತಿತ್ತು. ನಡೆದಾಡಲೂ ಕಷ್ಟಪಡುತ್ತಿತ್ತು. ಆರೋಗ್ಯವಾಗಿದ್ದ ಸಂದರ್ಭದಲ್ಲಿ ಕೆಲ ಅಂತಾರಾಷ್ಟ್ರೀಯ ಸ್ಪರ್ಧೆಗಳಲ್ಲಿ ತನ್ನ ಜಾಣ್ಮೆ ಪ್ರದರ್ಶಿಸಿ ಪ್ರಶಸ್ತಿಗಳನ್ನು ಪಡೆದುಕೊಂಡಿತ್ತು. 500 ಕೆ.ಜಿ. ತೂಗುತ್ತಿದ್ದ ಇನುಕಾ ಬುಧವಾರ ಮೃತಪಟ್ಟಿದ್ದು, ಅದನ್ನು ಮೃಗಾಲಯದಲ್ಲೇ ಮಣ್ಣು ಮಾಡಲಾಗಿದೆ ಸಿಬ್ಬಂದಿ ಹೇಳಿದ್ದಾರೆ. ಸಾಕಷ್ಟು ಪ್ರವಾಸಿಗರು ಬಂದು ತಮ್ಮ ನೆಚ್ಚಿನ ಕರಡಿಗೆ ಸಂತಾಪದ ಸಂದೇಶ ಪತ್ರ ಹಾಗೂ ಹೂವುಗಳನ್ನು ಇಟ್ಟು ಹೋಗಿದ್ದಾರೆ.

ಸಿಂಗಾಪುರ ಮೃಗಾಲಯಕ್ಕೆ 1978ರಲ್ಲಿ ಕೆನಡಾದಿಂದ ಗಂಡು ಹಿಮಕರಡಿ 'ನಾನೂಕ್‌' ಹಾಗೂ ಜರ್ಮನಿಯಿಂದ 'ಶೆಬಾ' ಹೆಣ್ಣು ಕರಡಿಯನ್ನು ತಂದು ಆರೈಕೆ ಮಾಡಲಾಗುತ್ತಿತ್ತು. ಇವರಿಬ್ಬರೇ 'ಇನುಕಾ'ನ ತಂದೆ-ತಾಯಿ. 1990ರ ಡಿಸೆಂಬರ್‌ನಲ್ಲಿ ಇನುಕಾ ಹುಟ್ಟಿದ್ದ.