ನ್ಯೂಯಾರ್ಕ್‌: 4 'D' ಮೂಲಕ ಹೂಡಿಕೆದಾರರನ್ನು ಆಕರ್ಷಿಸಿದ ನರೇಂದ್ರ ಮೋದಿ

ನ್ಯೂಯಾರ್ಕ್‌: ಕಳೆದ ನಾಲ್ಕು ದಿನಗಳಿಂದ ಅಮೆರಿಕ ಪ್ರವಾಸದಲ್ಲಿ ಬಿಡುವಿಲ್ಲದ ಕಾರ್ಯಕ್ರಮದಲ್ಲಿ ಪಾಲ್ಗೊಂಡಿರುವ ಪ್ರಧಾನಮಂತ್ರಿ ನರೇಂದ್ರ ಮೋದಿ ಈಗ ಬಂಡವಾಳ ಹೂಡಿಕೆದಾರರನ್ನು ಆಕರ್ಷಿಸಲು ಮುಂದಾಗಿದ್ದಾರೆ.

ನ್ಯೂಯಾರ್ಕ್‌ನಲ್ಲಿ ಬ್ಲೂಮ್‌ಬರ್ಗ್‌ ಗ್ಲೋಬಲ್‌ ಬ್ಯುಸಿನೆಸ್‌ ಒಕ್ಕೂಟ ಆಯೋಜಿಸಿದ್ದ ಸಮಾವೇಶದಲ್ಲಿ ಉದ್ಯಮಿಗಳನ್ನು ಉದ್ದೇಶಿಸಿ ನರೇಂದ್ರ ಮೋದಿ ಭಾಷಣ ಮಾಡಿ ಮೋಡಿ ಮಾಡಿದರು.

ಭಾರತ ಈಗ ಹೂಡಿಕೆದಾರರ ಸ್ವರ್ಗವಾಗಿದೆ. ಇದಕ್ಕೆ ನಾಲ್ಕು ಪ್ರಮುಖ ಕಾರಣಗಳು ಇವೆ. ಅದು 4 'D' ಎಂದು ಮೋದಿ ಬಣ್ಣಿಸಿದರು.

4 'D' ಎಂದರೆ ಡೆಮಾಕ್ರಸಿ, ಡೆಮಾಗ್ರಫಿ, ಡಿಮ್ಯಾಂಡ್‌ ಮತ್ತು ಡಿಸೈಸೀವ್‌ನೆಸ್‌ ಎಂದು ಮೋದಿ ಬಣ್ಣಿಸಿದರು.

ಈ ಸಮಾವೇಶದ ಮೂಲಕ ಭಾರತದಲ್ಲಿನ ಅವಕಾಶಗಳು, ಸಾಧ್ಯತೆಗಳು, ದೇಶದ ಪ್ರಗತಿ, ಕುರಿತು ಜಾಗತಿಕ ಮಟ್ಟದಲ್ಲಿ ಪ್ರಸ್ತುತ ಪಡಿಸಲು ಉತ್ತಮ ವೇದಿಕೆ ದೊರೆತಂತಾಗಿದೆ ಎಂದು ಮೋದಿ ಹೇಳಿದರು.

ಮುಂದಿನ ದಿನಗಳಲ್ಲಿ ಭಾರತದಲ್ಲಿ ಮೂಲ ಸೌಕರ್ಯ ಅಭಿವೃದ್ಧಿಗೆ 1.3 ಟ್ರಿಲಿಯನ್‌ ಅಮೆರಿಕನ್‌ ಡಾಲರ್‌ ವೆಚ್ಚ ಮಾಡಲು ಯೋಜನೆ ರೂಪಿಸಿದ್ದೇವೆ. ಬಂಡವಾಲೂ ಹೂಡಿಕೆ ಮಾಡುವ ಆಸಕ್ತರು ಭಾರತಕ್ಕೆ ಬನ್ನಿ, ನಿಮಗೆ ಸ್ವಾಗತ. ಯಾವುದಾದರೂ ಕೊರತೆ ಇದೆ ಎನಿಸಿದರೆ ನಾನೇ ಖುದ್ದಾಗಿ ಸೇತುವೆಯಂತಾಗಿ ಎಲ್ಲವನ್ನೂ ಸರಿಪಡಿಸುತ್ತೇನೆ ಎಂದು ಭರವಸೆ ನೀಡಿದರು.

ಭಾರತದಲ್ಲಿ ಈಗ ಕಾರ್ಪೊರೇಟ್‌ ತೆರಿಗೆ ಕಡಿಮೆ ಮಾಡಲಾಗಿದೆ. ಭಾರತದ ಈ ನಿರ್ಧಾರಕ್ಕೆ ಜಾಗತಿಕ ನಾಯಕರು ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ ಎಂದು ಮೋದಿ ತಿಳಿಸಿದರು.

ಬಂಡವಾಳ ಹೂಡಿಕೆಗೆ ಇಡೀ ವಿಶ್ವದಲ್ಲಿ ಭಾರತದಷ್ಟು ಆಪ್ಯಾಯಮಾನ ದೇಶ ಮತ್ತೊಂದು ಸಿಗುವುದಿಲ್ಲ. ಇಲ್ಲಿ ವಿಫುಲ ಅವಕಾಶಗಳಿವೆ. ಅದಕ್ಕೆ ಮಾರ್ಗ ತೋರಿಸುವ ಜವಾಬ್ದಾರಿ ನಮ್ಮದು. ನೀವು ನಮ್ಮೊಂದಿಗೆ ಹೆಜ್ಜೆ ಇಡಬೇಕು ಎಂದು ಮೋದಿ ಹೂಡಿಕೆದಾರರನ್ನು ಆಕರ್ಷಿಸಿದರು.

ಭಾರತ ಸರಕಾರ ಕಳೆದ ಐದು ವರ್ಷದಲ್ಲಿ ಕೈಗೊಂಡ ಯೋಜನೆಗಳು ಜನರಿಗೆ ಮೆಚ್ಚುಗೆಯಾಗಿರುವುದಕ್ಕೆ ಮತ್ತೆ ನಮಗೆ ಬೆಂಬಲ ನೀಡಿ ಜನರು ಅಭೂತಪೂರ್ವ ಯಶಸ್ಸಿನೊಂದಿಗೆ ಅಧಿಕಾರ ಕೊಟ್ಟಿದ್ದಾರೆ. ಈಗ ನಾವು ಜನರಿಗೆ ಪೂರಕವಾಗುವ ಅಭಿವೃದ್ಧಿ ಯೋಜನೆಗಳನ್ನು ಕೈಗೊಳ್ಳಬೇಕಾದ ಸಮಯ ಬಂದಿದೆ ಪ್ರಧಾನಿ ಮೋದಿ ತಿಳಿಸಿದರು.