ಒಳ ಉಡುಪು ಪ್ರದರ್ಶಿಸಿ ಪ್ರತಿಭಟಿಸಿದ ಸಂಸದೆ

ಡಬ್ಲಿನ್‌: ನ್ಯಾಯಾಲಯಗಳಲ್ಲಿ ಅತ್ಯಾಚಾರ ಸಂತ್ರಸ್ತೆಯರನ್ನು ನಡೆಸಿಕೊಳ್ಳುವ ರೀತಿಯ ವಿರುದ್ಧದ ಪ್ರತಿಭಟನೆಯ ಭಾಗವಾಗಿ ಐರ್ಲೆಂಡ್‌ ಸಂಸತ್‌ನಲ್ಲಿ ಸಂಸದೆಯೊಬ್ಬರು ಮಹಿಳೆಯರ ಒಳಉಡುಪನ್ನು ಪದರ್ಶಿಸಿದ್ದಾರೆ. ಇತ್ತೀಚಿನ ಒಂದು ಅತ್ಯಾಚಾರ ಪ್ರಕರಣದಲ್ಲಿ ನ್ಯಾಯಾಧೀಶರೊಬ್ಬರು ಅತ್ಯಾಚಾರ ಸಂದರ್ಭದಲ್ಲಿ ಮಹಿಳೆ ಧರಿಸಿದ್ದ ಒಳಉಡುಪನ್ನು ಸಾಕ್ಷಿಯಾಗಿ ಪರಿಗಣಿಸಿದ್ದನ್ನು ಖಂಡಿಸಿ ಸಂಸದೆ ಟಿಡಿ ರೂತ್‌ ಕೊಪಿಂಗ್‌ ಈ ರೀತಿ ಪ್ರತಿಭಟನೆ ನಡೆಸಿದ್ದಾರೆ.

ಕೆಲುವು ದಿನಗಳ ಹಿಂದೆ 27 ವರ್ಷದ ವ್ಯಕ್ತಿ ತನ್ನ ಮೇಲೆ ಅತ್ಯಾಚಾರವೆಸಗಿದ್ದಾನೆ ಎಂದು ಆರೋಪಿಸಿ 17 ವರ್ಷದ ಯುವತಿ ದೂರು ದಾಖಲಿಸಿದ್ದಳು. ವಿಚಾರಣೆ ವೇಳೆ ಸ್ಥಳೀಯ ಕೋರ್ಟ್‌ ಒಳಉಡುಪನ್ನು ಸಾಕ್ಷಿಯಾಗಿ ಪರಿಗಣಿಸಿದೆ. ವಿಚಾರಣೆ ವೇಳೆ ಆರೋಪಿ ಪರ ವಕೀಲರು, ಘಟನೆ ನಡೆದ ಸಮಯದಲ್ಲಿ ಯುವತಿ ದಾರ ಇರುವ ಒಳಉಡುಪು ಧರಿಸಿದ್ದಳು.

ಅದನ್ನು ಬಿಗಿಯಾಗಿ ಕಟ್ಟಿದ್ದರಿಂದ ಅದನ್ನು ತೆಗೆಯಲು ಸಾಧ್ಯವಾಗಿರಲಿಲ್ಲ. ಹಾಗಾಗಿ ಯುವತಿಯ ಒಳಉಡುಪು ಪರೀಕ್ಷಿಸಬೇಕು ಎಂದು ಮನವಿ ಮಾಡಿದ್ದರು. ಈ ಹಿನ್ನೆಲೆಯಲ್ಲಿ ಒಳಉಡುಪನ್ನು ನ್ಯಾಯಾಧೀಶರು ಪರೀಕ್ಷಿಸಿದರು. ನಂತರ ಇದು ಅತ್ಯಾಚಾರವಲ್ಲ ಎಂದು ತೀರ್ಪು ನೀಡಿದರು. ನ್ಯಾಯಾಲಯದಲ್ಲಿ ಸಂತ್ರಸ್ಥ ಮಹಿಳೆಯ ಒಳಉಡುಪನ್ನು ಪ್ರದರ್ಶಿಸಿದ್ದಕ್ಕಾಗಿ ದೇಶದಾದ್ಯಂತ ಖಂಡನೆ ವ್ಯಕ್ತವಾಗಿದೆ. ಅಲ್ಲದೇ ಸಾಮಾಜಿಕ ಜಾಲತಾಣಗಳಲ್ಲಿ ಇದರ ವಿರುದ್ಧ ಅಭಿಯಾನ ಕೈಗೊಳ್ಳಲಾಗಿದೆ.

ಈ ಘಟನೆಯನ್ನು ವಿರೋಧಿಸಿ ಐರ್ಲೆಂಡ್‌ ಸಂಸತ್‌ನಲ್ಲಿ ಮಹಿಳಾ ಸಂಸದೆ ರೂತ್‌ ಕೊಪಿಂಗ್‌, ನಾನು ಸಂಸತ್‌ನಲ್ಲಿ ಮಹಿಳೆಯರ ಒಳಉಡುಪನ್ನು ಪದರ್ಶಿಸಿದ್ದು ಅನೇಕರಿಗೆ ಮುಜುಗರ ಉಂಟು ಮಾಡಿರಬಹುದು. ಆದರೆ ಇತ್ತೀಚಿನ ಒಂದು ಪ್ರಕರಣ, ಅತ್ಯಾಚಾರ ಮತ್ತು ಲೈಂಗಿಕ ಕಿರುಕುಳ ಪ್ರಕರಣವನ್ನು ದೇಶದ ನ್ಯಾಯ ವ್ಯವಸ್ಥೆ ಹೇಗೆ ಪರಿಗಣಿಸುತ್ತದೆ ಎಂಬುದಕ್ಕೆ ನಿದರ್ಶನವಾಗಿದೆ. ದೇಶದಲ್ಲಿ ಯಾವುದೇ ಪ್ರಕರಣವಿರಲಿ, ಸಂತ್ರಸ್ತ ಮಹಿಳೆಯರ ಪರ ನ್ಯಾಯೋಚಿತ ವಿಚಾರಣೆ ನಡೆಸಬೇಕು ಎಂದು ಹೇಳಿದರು.