ಆಫ್ಘನ್‌ ವಿವಾಹ ಸಮಾರಂಭದಲ್ಲಿ ಐಸಿಸ್‌ ದಾಳಿ, 63 ಬಲಿ

ಕಾಬುಲ್‌: ಸಂಭ್ರಮ ಹಾಗೂ ಸಂತೋಷ ತುಂಬಿದ್ದ ವಿವಾಹ ಸಮಾರಂಭವೊಂದನ್ನು ಗುರಿಯಾಗಿಸಿ ಐಸಿಸ್‌ ನಡೆಸಿದ ಆತ್ಮಾಹುತಿ ದಾಳಿಗೆ ಅಫಘಾನಿಸ್ತಾನ ರಾಜಧಾನಿಯಲ್ಲಿ ಭಾನುವಾರ 63 ಮಂದಿ ಬಲಿಯಾಗಿದ್ದಾರೆ.

ಶಿಯಾ ಸಮುದಾಯದವರು ಹೆಚ್ಚಾಗಿ ಸೇರಿದ್ದ ವಿವಾಹ ಸಮಾರಂಭವನ್ನು ಈ ಬಾರಿ ಐಸಿಸ್‌ ಗುರಿಯಾಗಿಸಿದೆ. ಸುಮಾರು 1200 ಜನರು ಭಾಗವಹಿಸಿದ್ದ ಸಮಾರಂಭದಲ್ಲಿ ಭದ್ರತಾ ವ್ಯವಸ್ಥೆಗೆ ಹೆಚ್ಚು ಒತ್ತು ನೀಡದಿರುವುದನ್ನು ಲಾಭವಾಗಿಸಿಕೊಂಡ ಐಸಿಸ್‌ ಉಗ್ರರು ದಾಳಿ ಸಂಚು ಹೆಣೆದಿದ್ದಾರೆ ಎಂದು ಅಫಘಾನಿಸ್ತಾನ ಪೊಲೀಸರು ಹೇಳಿದ್ದಾರೆ.

ಆಫ್ಘನ್‌ ಅಧ್ಯಕ್ಷ ಅಶ್ರಫ್‌ ಘನಿ ದಾಳಿಯನ್ನು ಅನಾಗರಿಕ ಕೃತ್ಯ ಎಂದು ಖಂಡಿಸಿದ್ದಾರೆ. ಇದೊಂದು ಮಾನವೀಯತೆ ವಿರುದ್ಧದ ಕ್ರೌರ್ಯ ಎಂದು ಅಮೆರಿಕದ ರಾಯಭಾರಿ ಜಾನ್‌ ಬೇಸ್‌ ಬೇಸರ ವ್ಯಕ್ತಪಡಿಸಿದ್ದಾರೆ.
ಅಫಘಾನಿಸ್ತಾನದಲ್ಲಿ ಅಮೆರಿಕದ ಮಿಲಿಟರಿ ಪಡೆ ನಿಯೋಜನೆ ಪ್ರಮಾಣ ತಗ್ಗಿಸಿ ಕದನವಿರಾಮ ಘೋಷಣೆ ಮೂಲಕ ಸಂಧಾನ ನೀಲಿನಕ್ಷೆ ರಚಿಸಲು ತಾಲಿಬಾನ್‌ ಮುಖಂಡರು ಮತ್ತು ಟ್ರಂಪ್‌ ಆಡಳಿತ ಒಪ್ಪಂದಕ್ಕೆ ಬಂದ ಬೆನ್ನಿಗೆ ಐಸಿಸ್‌ನಿಂದ ಈ ಭಾರಿ ದಾಳಿ ನಡೆದಿರುವುದು ಗಮನಾರ್ಹ.

ಜುಲೈ 28ರಂದು ಅಧ್ಯಕ್ಷೀಯ ಚುನಾವಣೆ ಪ್ರಚಾರವನ್ನು ಗುರಿಯಾಗಿಸಿ ಐಸಿಸ್‌ ನಡೆಸಿದ್ದ ದಾಳಿಗೆ 20 ಮಂದಿ ಬಲಿಯಾಗಿದ್ದರು.