ಭದ್ರತಾ ಪಡೆಗಳ ಜತೆ ಕಾಳಗದ ವೇಳೆ ತಮ್ಮನ್ನು ಸ್ಫೋಟಿಸಿಕೊಂಡವರೂ ನಮ್ಮವರೇ: ಐಸಿಸ್‌

ಕೊಲಂಬೊ: ಶ್ರೀಲಂಕಾದ ಸರಣಿ ಆತ್ಮಾಹುತಿ ಬಾಂಬ್‌ ದಾಳಿಯ ಹೊಣೆ ಹೊತ್ತುಕೊಂಡಿರುವ ಇಸ್ಲಾಮಿಕ್‌ ಸ್ಟೇಟ್‌ ಉಗ್ರ ಸಂಘಟನೆಯು ಭದ್ರತಾ ಪಡೆ ಜತೆಗಿನ ಕಾಳಗದಲ್ಲಿ ತಮ್ಮನ್ನು ಸ್ಫೋಟಿಸಿಕೊಂಡ ಮೂವರು ಉಗ್ರರನ್ನು ತಮ್ಮವರೆಂದು ಹೇಳಿಕೊಂಡಿದೆ.

ಶ್ರೀಲಂಕಾದ ಪೂರ್ವ ಕರಾವಳಿಯಲ್ಲಿ ಶುಕ್ರವಾರ ರಾತ್ರಿಯಿಡೀ ಉಗ್ರರ ಜತೆ ಗುಂಡಿನ ಕಾಳಗ ನಡೆದಿದ್ದು, 6 ಮಕ್ಕಳೂ ಸೇರಿದಂತೆ 15 ಶವಗಳು ಪತ್ತೆಯಾಗಿದ್ದವು. 250ಕ್ಕೂ ಹೆಚ್ಚು ಮಂದಿಯನ್ನು ಬಲಿ ತೆಗೆದುಕೊಂಡ ಈಸ್ಟರ್ ಭಾನುವಾರದ ಸರಣಿ ಸ್ಫೋಟಗಳ 6 ದಿನಗಳ ಬಳಿಕ ಈ ಘಟನೆ ನಡೆದಿತ್ತು.

ಅಮಾಕ್‌ ನ್ಯೂಸ್‌ ಏಜೆನ್ಸಿಗೆ ಹೇಳಿಕೆಯನ್ನು ನೀಡಿರುವ ಐಸಿಸ್‌ ಸಂಘಟನೆ, ತಮ್ಮನ್ನು ಸ್ಫೋಟಿಸಿಕೊಂಡು ಮತ್ತೆ 15 ಮಂದಿ ಸಾವಿಗೆ ಕಾರಣರಾದ ಉಗ್ರರು ತಮ್ಮವರು. ಅಬು ಹಮದ್‌, ಅಬು ಸುಫ್ಯಾನ್‌ ಮತ್ತು ಅಬು ಅಲ್‌ಕ್ವಾಕ ಎಂಬುದು ಅವರ ಹೆಸರು ಎಂದು ತಿಳಿಸಿದೆ. ಮದ್ದುಗುಂಡುಗಳು ಕಾಲಿಯಾಗುವ ವರೆಗೆ ಭದ್ರತಾ ಪಡೆ ಜತೆ ಕಾಳಗ ನಡೆಸಿದ್ದಾರೆ. ಮದ್ದುಗುಂಡುಗಳು ಕಾಲಿಯಾದ ನಂತರ ತಮ್ಮನ್ನು ಸ್ಫೋಟಿಸಿಕೊಂಡಿದ್ದಾರೆ ಎಂದೂ ಐಸಿಸ್‌ ಹೇಳಿಕೊಂಡಿದೆ.

ಬಟ್ಟಿಕಲೋವಾ ಪಟ್ಟಣದ ದಕ್ಷಿಣಕ್ಕಿರುವ ಅಂಪಾರಾದ ಸೈಂತಾಮರುತುವಿನಲ್ಲಿ ಶಂಕಿತ ಇಸ್ಲಾಮಿಕ್ ಉಗ್ರರು ಮತ್ತು ಸೇನಾ ಯೋಧರ ನಡುವೆ ಶುಕ್ರವಾರ ಸಂಜೆಯೇ ಗುಂಡಿನ ಕಾಳಗ ಆರಂಭವಾಗಿತ್ತು.