ಮತ್ತೆ ಬಿತ್ತು ನೇತನ್ಯಾಹು ಸರ್ಕಾರ: 2 ವರ್ಷಗಳಲ್ಲಿ 4ನೇ ಬಾರಿ ಚುನಾವಣೆಗೆ ಸಜ್ಜಾದ ಇಸ್ರೇಲ್!

ಜೆರುಸಲೇಂ: ಇಸ್ರೇಲ್ ಪ್ರಧಾನಿ ಬೆಂಜಮಿನ್ ನೇತನ್ಯಾಹು ಸರ್ಕಾರ ಮತ್ತೊಮ್ಮೆ ಪತನಗೊಂಡಿದ್ದು, ಅವಧಿಗೂ ಮುನ್ನವೇ ದೇಶದಲ್ಲಿ ಚುನಾವಣೆ ಎದುರಾಗಿದೆ.

2020ರ ಬಜೆಟ್ ಅನುಮೋದನೆಗೆ ನೀಡಲಾಗಿದ್ದ ಕಾನೂನಾತ್ಮಕ ಗಡುವು ಮುಕ್ತಾಯವಾದ ಬೆನ್ನಲ್ಲೇ ಸಂಸತ್ ವಿಸರ್ಜನೆಯಾಗಿದೆ. ಹಣಕಾಸು ಖಾತೆಯನ್ನು ನೆತನ್ಯಾಹು ಪಕ್ಷ ನಿಭಾಯಿಸಿತ್ತು ಮತ್ತು ಬಜೆಟ್ ಮಂಡಿಸಲು ನಿರಾಕರಿಸಿತ್ತು. ಈ ಹಿನ್ನೆಲೆಯಲ್ಲಿ ಸರ್ಕಾರ ತಾನಾಗಿಯೇ ಪತನಗೊಂಡಿದೆ.

ಬೆಂಜಮಿನ್ ನೆತನ್ಯಾಹು ಅವರ ಲಿಕುಡ್ ಪಾರ್ಟಿ ಮತ್ತು ಅವರ ಎದುರಾಳಿ ಬೆನ್ನಿಗಾಂಟ್ಜ್‌ ಅವರ ಬ್ಲೂ ಆ್ಯಂಡ್ ವೈಟ್ ಪಾರ್ಟಿ ಮೈತ್ರಿ ಮಾಡಿಕೊಂಡು ಸರ್ಕಾರ ರಚಿಸಿದ್ದವು.

ಫೈಜರ್ ಲಸಿಕೆ ಪಡೆದ ಬೆಂಜಮಿನ್ ನೇತನ್ಯಾಹು: ಕೊರೊನಾ ಒದ್ದೊಡಿಸಲು ಸಜ್ಜಾದ ಇಸ್ರೇಲ್!

ಆದರೆ ಕೇವಲ ಏಳು ತಿಂಗಳೊಳಗಾಗಿ ಈ ಸರ್ಕಾರ ಪತನ ಕಂಡಿದ್ದು, ಕಳೆದ ಎರಡು ವರ್ಷಗಳ ಅವಧಿಯಲ್ಲಿ ನಾಲ್ಕನೇ ಬಾರಿ ಇಸ್ರೇಲ್‌ನಲ್ಲಿ ಸಾರ್ವತ್ರಿಕ ಚುನಾವಣೆ ಎದುರಾಗಿದೆ.

ಇನ್ನು ಸರ್ಕಾರ ಪತನವಾಗಲು ಬೆನ್ನಿಗಾಂಟ್ಜ್ ಅವರೇ ಕಾರಣ ಎಂದಿರುವ ನೇತನ್ಯಾಹು, ಕೊರೊನಾ ಬಿಕ್ಕಟ್ಟಿನ ಸಂದರ್ಭದಲ್ಲಿ ಅನಗತ್ಯ ಚುನಾವಣೆಗಳಿಗೆ ದೇಶವನ್ನು ಎಳೆಯಲಾಗಿದೆ ಎಂದು ತೀವ್ರ ಆಸಮಾಧಾನ ಹೊರಹಾಕಿದ್ದಾರೆ.


ಆದರೆ ಈ ಆರೋಪವನ್ನು ನಿರಾಕರಿಸಿರುವ ಬೆನ್ನಿಗಾಂಟ್ಜ್, ಭ್ರಷ್ಟಾಚಾರದಲ್ಲೇ ಮುಳುಗಿರುವ ನೇತನ್ಯಾಹು ಅವರನ್ನು ಕಿತ್ತೊಗೆದು ಇಸ್ರೇಲ್‌ನ್ನು ಉಳಿಸಲೇಬೇಕಾಗಿದೆ ಎಂದು ಹೇಳಿದ್ದಾರೆ. ಇದು ಇಸ್ರೇಲ್ ಅಳಿವು-ಉಳಿವಿನ ಪ್ರಶ್ನೆಯಾಗಿದ್ದು, ನೇತನ್ಯಾಹು ತೊಲಗಿಸಲು ಚುನಾವಣೆ ಅನಿವಾರ್ಯ ಎಂದು ಬೆನ್ನಿಗಾಂಟ್ಜ್ ಅಭಿಪ್ರಾಯಪಟ್ಟಿದ್ದಾರೆ.

ಕೊರೊನಾ ವೈರಸ್ ಹಾವಳಿಯ ಕಾರಣಕ್ಕೆ ಏಳು ತಿಂಗಳ ಹಿಂದೆ ನೇತನ್ಯಾಹು ಜೊತೆ ಕೈಜೋಡಿಸಿ ಸರ್ಕಾರ ರಚಿಸಿದ್ದ ಬೆನ್ನಿಗಾಂಟ್ಜ್, ಇದೀಗ ನೇತನ್ಯಾಹು ವಿರುದ್ಧ ಭ್ರಷ್ಟಾಚಾರ ಆರೋಪ ಹೊರಿಸಿದ್ದಾರೆ.

ಒಂದೇ ವರ್ಷದಲ್ಲಿ 3ನೇ ಬಾರಿ ಪ್ರಧಾನಿ ಚುನಾವಣೆಗೆ ಸಾಕ್ಷಿಯಾದ ಇಸ್ರೇಲ್‌

ಸದ್ಯ ಪ್ರಧಾನಿ ಬೆಂಜಮಿನ್ ನೇತನ್ಯಾಹು ಸರ್ಕಾರ ಪತನಗೊಂಡಿದ್ದು, ಕೇವಲ ಎರುಡ ವರ್ಷಗಳ ಅವಧಿಯಲ್ಲಿ ಇಸ್ರೇಲ್ ಜನತೆ ನಾಲ್ಕನೇ ಬಾರಿ ಸಾರ್ವತ್ರಿಕ ಚುನಾವಣೆ ಎದುರಿಸಬೇಕಾದ ಪರಿಸ್ಥಿತಿ ಬಂದಿದೆ.