ಪ್ರಧಾನಿ ನೆತನ್ಯಾಹು ಹೆಗಲಿಗೆ ಮತ್ತೆ ಪಕ್ಷದ ನಾಯಕತ್ವ

ಜೆರಸಲೇಂ: ಮುಂದಿನ ವರ್ಷ ಮಾರ್ಚ್ ನಲ್ಲಿ ಎದುರಾಗಲಿರುವ ಇಸ್ರೇಲ್ ಸಾರ್ವತ್ರಿಕ ಚುನಾವಣೆಯಲ್ಲಿ ಪಕ್ಷವನ್ನು ಮುನ್ನಡೆಸಿ ಮತ್ತೊಮ್ಮೆ ಅಧಿಕಾರಕ್ಕೆ ತರುವ ಹೊಣೆಯನ್ನು ಲಿಕುಡ್‌ ಪಕ್ಷದ ಮುಖಂಡರು ಪ್ರಧಾನಿ ಬೆಂಜಮಿನ್‌ ನೆತನ್ಯಾಹು ಹೆಗಲಿಗೆ ಹೊರಿಸಿದ್ದಾರೆ.

ಶುಕ್ರವಾರ ನಡೆದ ಪಕ್ಷದ ನಾಯಕನ ಆಯ್ಕೆ ಪ್ರಕ್ರಿಯೆಯಲ್ಲಿ ಶೇ.72.5ರಷ್ಟು ಮತಗಳನ್ನು ಪಡೆಯುವ ಮೂಲಕ ನೆತನ್ಯಾಹು ಲಿಕುಡ್‌ ಪಕ್ಷದ ನಾಯಕನ ಸ್ಥಾನ ಗಿಟ್ಟಿಸಿಕೊಂಡಿದ್ದಾರೆ. ನೆತನ್ಯಾಹು ವಿರುದ್ಧ ಸ್ಪರ್ಧಿಸಿದ್ದ ಗಿಡಿಯೊನ್‌ ಸಾರ್‌ ಶೇ.27.5ರಷ್ಟು ಮತಗಳನ್ನು ಮಾತ್ರ ಪಡೆದಿದ್ದಾರೆ.

ನಾಯಕನ ಸ್ಥಾನಕ್ಕೆ ಆಯ್ಕೆಯಾದ ಬಳಿಕ ಟ್ವೀಟ್‌ ಮಾಡಿ ಪ್ರತಿಕ್ರಿಯಿಸಿರುವ ನೆತನ್ಯಾಹು ಅವರು, ''ದೊಡ್ಡ ಜಯ! ಲಿಕುಡ್‌ ಪಕ್ಷದ ಮುಖಂಡರು, ಕಾರ್ಯಕರ್ತರಿಗೆ ಧನ್ಯವಾದ. ದೇವರ ದಯೆ ಮತ್ತು ನಿಮ್ಮ ಬೆಂಬಲದಿಂದ ಮತ್ತೊಮ್ಮೆ ಪಕ್ಷವನ್ನು ಪ್ರಚಂಡ ಬಹುಮತದೊಂದಿಗೆ ಅಧಿಕಾರಕ್ಕೆ ತರುತ್ತೇನೆ. ನಾವು ಇಸ್ರೇಲ್‌ಅನ್ನು ಮುನ್ನಡೆಸಲಿದ್ದೇವೆ,'' ಎಂದು ವಿಶ್ವಾಸ ವ್ಯಕ್ತಪಡಿಸಿದ್ದಾರೆ. ಸತತ 14 ವರ್ಷಗಳಿಂದ ಲಿಕುಡ್‌ ಪಕ್ಷವನ್ನು ನೆತನ್ಯಾಹು ಮುನ್ನಡೆಸುತ್ತಿದ್ದಾರೆ. ಮಾ.2ಕ್ಕೆ ಇಸ್ರೇಲ್‌ನಲ್ಲಸಾರ್ವತ್ರಿಕ ಚುನಾವಣೆ ನಡೆಯಲಿದೆ.