ಈ ವಿಶ್ವವಿದ್ಯಾಲಯದಲ್ಲಿ ಫೆಬ್ರವರಿ 14 ಪ್ರೇಮಿಗಳ ದಿನವಲ್ಲ, ಸಹೋದರಿಯರ ದಿನ

ಕರಾಚಿ: ಫೆಬ್ರವರಿ 14ನ್ನು ಜಗತ್ತು ಪ್ರೇಮಿಗಳ ದಿನವನ್ನಾಗಿ ಆಚರಿಸಿದರೆ, ಪಾಕಿಸ್ತಾನದ ಈ ವಿಶ್ವವಿದ್ಯಾಲಯದಲ್ಲಿ ಸಂಪೂರ್ಣ ಭಿನ್ನವಾಗಿ ಆಚರಿಸಲಾಗುತ್ತದೆ.

ಹೌದು ಫೈಸಲಾಬಾದ್‌ನ ಕೃಷಿ ವಿಶ್ವವಿದ್ಯಾಲಯದಲ್ಲಿ ಫೆಬ್ರವರಿ 14ನ್ನು ಸಹೋದರಿಯರ ದಿನವನ್ನಾಗಿ ಆಚರಿಸಲು ಕರೆ ನೀಡಲಾಗಿದೆ.

ಆಚರಣೆಯ ಭಾಗವಾಗಿ ವಿದ್ಯಾರ್ಥಿನಿಯರು, ಪುರುಷ ವಿದ್ಯಾರ್ಥಿಗಳಿಂದ ಉಡುಗೊರೆಯಾಗಿ ಸ್ಕಾರ್ವ್ಸ್ ಮತ್ತು ಬಟ್ಟೆಗಳನ್ನು ಪಡೆಯುತ್ತಾರೆ.


ಈ ಬಗ್ಗೆ ಪ್ರತಿಕ್ರಿಯಿಸಿರುವ ಫೈಸಲಾಬಾದ್ ವಿವಿಯ ಉಪ ಕುಲಪತಿ ಜಾಫರ್ ಇಕ್ಬಾಲ್ ರಾಂಧವ್ ಅವರು, "ಪಾಕಿಸ್ತಾನದ ಸಂಸ್ಕೃತಿ ಮತ್ತು ಇಸ್ಲಾಂ ಧರ್ಮಕ್ಕನುಸಾರವಾಗಿ ನಾವು ಈ ದಿನವನ್ನು ಆಚರಿಸುವ ಪ್ರಯತ್ನಕ್ಕೆ ಕೈ ಹಾಕಿದ್ದೇವೆ. ಈ ಮೂಲಕ ಪಾಕಿಸ್ತಾನದಲ್ಲಿ ಸಹೋದರಿಯರನ್ನು ಎಷ್ಟು ಪ್ರೀತಿಸುತ್ತಾರೆ ಎಂದು ಎಲ್ಲರಿಗೂ ಗೊತ್ತಾಗಲಿದೆ. ಮಹಿಳಾ ಸಬಲೀಕರಣವನ್ನು ಉತ್ತೇಜಿಸಲು ಇದೊಂದು ಉತ್ತಮ ಅವಕಾಶ ಎಂದಿದ್ದಾರೆ.

ಮಹಿಳೆಯರಿಗೆ ನಾವು ಹೆಚ್ಚಿನ ಪ್ರಾಶಸ್ತ್ಯ ನೀಡುತ್ತೇವೆ. ಇದು ಲಿಂಗ ಸಂಬಲೀಕರಣದ ಯುಗ. ಪಾಶ್ಚಾತ್ಯ ಚಿಂತನೆಯು ಉತ್ತೇಜಿಸಲ್ಪಟ್ಟಿದೆ. ಆದರೆ ಉತ್ತಮ ಲಿಂಗ ಸಬಲೀಕರಣ ಮತ್ತು ಕೆಲಸದ ವಿಭಜನೆ ನಮ್ಮ ಧರ್ಮ ಮತ್ತು ಸಂಸ್ಕೃತಿಯಲ್ಲಿದೆ ಎಂದು ಅವರು ಹೇಳಿದ್ದಾರೆ.


ಪಾಕಿಸ್ತಾನದಲ್ಲಿ ಪ್ರೇಮಿಗಳ ದಿನಕ್ಕೆ ಅಡ್ಡಿಯಾಗುತ್ತಿರುವುದು ಇದೇ ಮೊದಲಲ್ಲ. 2017 ಮತ್ತು 2018ರಲ್ಲಿ ಕೂಡ ಇಸ್ಲಾಮಾಬಾದ್ ಹೈ ಕೋರ್ಟ್ ಪ್ರೇಮಿಗಳ ದಿನಾಚರಣೆಯ ಮೇಲೆ ನಿಷೇಧ ಹೇರಿತ್ತು ಮತ್ತು ಈ ದಿನಕ್ಕೆ ಸಂಬಂಧಿಸಿದಂತೆ ಕಾರ್ಯಕ್ರಮ ಪ್ರಸಾರ ಮಾಡುವುದನ್ನು ತಕ್ಷಣ ನಿಲ್ಲಿಸುವಂತೆ ಮುದ್ರಣ ಮತ್ತು ವಿದ್ಯುನ್ಮಾನ ಮಾಧ್ಯಮಕ್ಕೆ ಸೂಚನೆ ನೀಡಿತ್ತು.