ಎಲೆಕ್ಟೊರಲ್ ಕಾಲೇಜ್‌ನಲ್ಲಿ ಜೋ ಬಿಡೆನ್‌ಗೆ ಭರ್ಜರಿ ಜಯ, ‌ಅಧ್ಯಕ್ಷೀಯ ಹಾದಿ ಸುಗಮ

ವಾಷಿಂಗ್ಟನ್‌: ಅಮೆರಿಕದ ನೂತನ ಅಧ್ಯಕ್ಷರಾಗಿ ಜೋ ಬಿಡೆನ್‌ ಅವರ ಗೆಲುವನ್ನು ಎಲೆಕ್ಟೊರಲ್‌ ಕಾಲೇಜ್‌ ಸೋಮವಾರ ದೃಢಪಡಿಸಿದೆ. ಒಟ್ಟು 538 ಸದಸ್ಯರಿರುವ ಎಲೆಕ್ಟೊರಲ್‌ ಕಾಲೇಜಿನಲ್ಲಿ 270ಕ್ಕೂ ಅಧಿಕ ಮತಗಳನ್ನು ಬಿಡೆನ್‌ ಗಳಿಸಿದ್ದಾರೆ.

ಈ ಬಗ್ಗೆ ತಮ್ಮ ತವರು ರಾಜ್ಯ ಡೆಲಾವೇರ್‌ನ ವಿಲ್ಮಿಂಗ್ಟನ್‌ ನಗರದಲ್ಲಿ ಸುದ್ದಿಗಾರರಿಗೆ ಪ್ರತಿಕ್ರಿಯಿಸಿರುವ ಬಿಡೆನ್‌, "ಅಮೆರಿಕದ ಪ್ರಜಾಪ್ರಭುತ್ವವನ್ನು ಕೆಲವು ತಿಂಗಳಿಂದ ಪರೀಕ್ಷಿಸಿ, ಬೆದರಿಸಿ, ಇಕ್ಕಟ್ಟಿಗೆ ಸಿಕ್ಕಿಸಲು ಯತ್ನಿಸಲಾಯಿತು. ಆದರೆ ಅದಕ್ಕೆ ಬಗ್ಗದೇ ಬಹಳ ಸದೃಢವಾಗಿದ್ದೇನೆ ಎಂದು ಪ್ರಜಾಪ್ರಭುತ್ವ ಪ್ರತ್ಯುತ್ತರ ನೀಡಿ ಬಲವಾಗಿ ನಿಂತಿತು. ಫಲಿತಾಂಶವನ್ನು ತಿರುಚಲು ನಿರ್ಗಮಿತ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌ ಮಾಡಿದ ಯತ್ನಗಳೆಲ್ಲ ಜನರ ಅಭಿಲಾಷೆ ಎದುರು ವಿಫಲಗೊಂಡವು. ಅಮೆರಿಕದ ಆತ್ಮ, ಅಸ್ಮಿತೆಯ ಹೋರಾಟದಲ್ಲಿ ಪ್ರಜಾಪ್ರಭುತ್ವಕ್ಕೆ ಜಯ ಸಿಕ್ಕಿದೆ. ಒಗ್ಗಟ್ಟಿಗಾಗಿ ಮತ್ತು ಚೇತರಿಕೆಗಾಗಿ ಮುಂದೆ ಸಾಗೋಣ,’’ ಎಂದು ಹೇಳಿದ್ದಾರೆ.

ಈ ಮೂಲಕ ಜ.20ರಂದು ಅಮೆರಿಕದ 46ನೇ ಅಧ್ಯಕ್ಷರಾಗಿ ಅಧಿಕಾರದ ಚುಕ್ಕಾಣಿ ಹಿಡಿಯುವ ಬಿಡೆನ್‌ ಅವರ ಹಾದಿ ಸಾಂವಿಧಾನಿಕವಾಗಿ ಸುಗಮಗೊಂಡಿದೆ. ಜ.6 ರಂದು ಅಮೆರಿಕದ ಸಂಸತ್ತಿನಲ್ಲಿ ನಡೆಯುವ ಜಂಟಿ ಅಧಿವೇಶನದಲ್ಲಿ ಅಧ್ಯಕ್ಷರಾಗಿ ಬಿಡೆನ್‌ ಅವರ ಹೆಸರನ್ನು ಅಧಿಕೃತವಾಗಿ ಘೋಷಣೆ ಮಾಡಲಾಗುವುದು. ನವೆಂಬರ್‌ನಲ್ಲಿ ಹೊರಬಿದ್ದ ಅಧ್ಯಕ್ಷೀಯ ಚುನಾವಣೆ ಫಲಿತಾಂಶದಲ್ಲಿ ಬಿಡೆನ್‌ 306 ಮತಗಳನ್ನು ಪಡೆದು, ಟ್ರಂಪ್‌ (232 ಮತಗಳು) ಅವರನ್ನು ಹಿಂದಿಕ್ಕಿದ್ದರು.