ಬೀಜಿಂಗ್‌
ಬಂಧಿತ ನೊಬೆಲ್‌ ಶಾಂತಿ ಪ್ರಶಸ್ತಿ ಪುರಸ್ಕೃತ ಲಿ ಕ್ಸಿಯಾಬೋ ಅವರಿಗೆ ಅಂತಿಮ ಹಂತದ ಕ್ಯಾನ್ಸರ್‌ ಇರುವುದು ಕಳೆದ ತಿಂಗಳು ಪತ್ತೆಯಾದ ಹಿನ್ನೆಲೆಯಲ್ಲಿ, ಚೀನಾ ಸರಕಾರವು ಅವರಿಗೆ ವೈದ್ಯಕೀಯ ಪೆರೋಲ್‌ ನೀಡಿದೆ.
ತಮ್ಮ 11 ವರ್ಷಗಳ ಶಿಕ್ಷೆಯ ಅವಧಿಯಲ್ಲಿ 8 ವರ್ಷಗಳನ್ನು ಜೈಲಿನಲ್ಲಿ ಪೂರೈಸಿರುವ 61 ವರ್ಷದ ಲಿ ಅವರಿಗೆ ಶೆನ್ಯಾಂಗ್‌ ನಗರದ ಆಸ್ಪತ್ರೆಯಲ್ಲಿ ಚಿಕಿತ್ಸೆ ನೀಡಲಾಗುತ್ತಿದೆ ಎಂದು ಲಿ ಪರ ವಕೀಲ ಮೊ ಶಾವೋಪಿಂಗ್‌ ತಿಳಿಸಿದ್ದಾರೆ.
ಏಕಪಕ್ಷೀಯ ಕಮ್ಯುನಿಸ್ಟ್‌ ಸರಕಾರ ಹೊಂದಿರುವ ಚೀನಾದಲ್ಲಿ ಮಾನವ ಹಕ್ಕುಗಳ ರಕ್ಷ ಣೆ ಕುರಿತು ದನಿಯೆತ್ತಿದ್ದು ಹಾಗೂ ಪ್ರಜಾಪ್ರಭುತ್ವದ ಸುಧಾರಣೆಗಳಿಗಾಗಿ ಆಗ್ರಹಿಸಿದ್ದಕ್ಕಾಗಿ ಲಿಗೆ 2008ರಲ್ಲಿ ಶಿಕ್ಷೆ ವಿಧಿಸಲಾಗಿತ್ತು.
ವರ್ಷದ ಬಳಿಕ ಅವರಿಗೆ ನೊಬೆಲ್‌ ಶಾಂತಿ ಪ್ರಶಸ್ತಿ ಒಲಿಯಿತಾದರೂ, ಚೀನಾ ಸರಕಾರ ಅವರನ್ನು ಬಿಡುಗಡೆ ಮಾಡಿರಲಿಲ್ಲ. ಓಸ್ಲೋದಲ್ಲಿ ನಡೆದ ಸಮಾರಂಭದಲ್ಲಿ ಖಾಲಿ ಕುರ್ಚಿಯೇ ಲಿಯನ್ನು ಪ್ರತಿನಿಧಿಸಿತ್ತು.
ಲಿಗೆ ಶಾಂತಿ ನೊಬೆಲ್‌ ಬಂದಿದ್ದನ್ನು ವಿರೋಧಿಸಿದ್ದ ಚೀನಾ ಸರಕಾರ, ತನ್ನ ಆಂತರಿಕ ವಿಷಯಗಳಲ್ಲಿ ವಿದೇಶಿ ಸಂಸ್ಥೆಯ ಮೂಗು ತೂರಿಸುವಿಕೆ ಸಹಿಸುವುದಿಲ್ಲ ಎಂದಿತ್ತು. ಇದೇ ಕಾರಣಕ್ಕಾಗಿ ಓಸ್ಲೋ ಹಾಗೂ ಬೀಜಿಂಗ್‌ ನಡುವೆ ರಾಜತಾಂತ್ರಿಕ ಸಂಬಂಧಗಳು 2016ರ ಡಿಸೆಂಬರ್‌ವರೆಗೆ ನಿಂತುಹೋಗಿದ್ದವು.
ಲಿ ಬೆಂಬಲಿಗರು, ಅವರ ಆರೋಗ್ಯದ ಬಗ್ಗೆ ಆತಂಕ ವ್ಯಕ್ತಪಡಿಸಿದ್ದು, ಸರಕಾರ ಅವರನ್ನು ನಡೆಸಿಕೊಳ್ಳುತ್ತಿರುವ ರೀತಿಯನ್ನು ಖಂಡಿಸುತ್ತಲೇ ಬಂದಿದ್ದಾರೆ. ಅವರ ಬಿಡುಗಡೆಗಾಗಿ ಅಂತಾರಾಷ್ಟ್ರೀಯ ಸಮುದಾಯವು ವರ್ಷಗಳಿಂದ ಆಗ್ರಹಿಸುತ್ತಲೇ ಬಂದಿತ್ತು.