ಭಾರೀ ಭೂಕಂಪ ಮತ್ತು ಸುನಾಮಿ ಸಾಧ್ಯತೆ: ತಜ್ಞರ ಎಚ್ಚರಿಕೆ ಬಳಿಕ ಸನ್ನದ್ಧ ಸ್ಥಿತಿಯಲ್ಲಿ ಜಪಾನ್!

ಟೋಕಿಯೋ: ಇಡೀ ವಿಶ್ವ ಮಾರಕ ಕೊರೊನಾ ವೈರಸ್ ವಿರುದ್ಧ ಹೋರಾಡುತ್ತಿದೆ. ಆದರೆ ಜಪಾನ್ ಇದೀಗ ಸುನಾಮಿ ಭೀತಿಯಲ್ಲಿ ಕಾಲ ಕಳೆಯುತ್ತಿದ್ದು, ಯಾವುದೇ ಕ್ಷಣದಲ್ಲಿ ಭಾರೀ ಸುನಾಮಿ ಅಪ್ಪಳಿಸುವ ಸಂಭವನೀಯತೆ ಹೆಚ್ಚು ಎಂದು ತಜ್ಞರು ಎಚ್ಚರಿಸಿದ್ದಾರೆ.

ಕಳೆದ ಏ. 18(ಶನಿವಾರ)ರಂದು ಪೆಸಿಫಿಕ್ ಮಹಾಸಾಗರದಲ್ಲಿ ಭಾರೀ ಭೂಕಂಪ ಸಂಭವಿಸಿತ್ತು. ಆದರೆ ಈ ಭೂಕಂಪ ಜಪಾನ್‌ಗೆ ಹೆಚ್ಚಿನ ಹಾನಿಯನ್ನುಂಟು ಮಾಡಿರಲಿಲ್ಲ. ಇದೀಗ ಮತ್ತೆ ಭೂಕಂಪದ ಜೊತೆಗೆ ಸುನಾಮಿ ಭೀತಿಯೂ ಎದುರಾಗಿದೆ ಎಂದು ತಜ್ಞರು ಅಂದಾಜಿಸಿದ್ದಾರೆ.

ಜಪಾನ್‌ನ ಉತ್ತರ ಭಾಗದಲ್ಲಿ ಕೆಂದ್ರೀಕೃತಗೊಂಡು ಭಾರೀ ಭೂಕಂಪವೊಂದು ಸದ್ಯದಲ್ಲೇ ಸಂಭವಿಸಲಿದ್ದು, ಇದರ ಬೆನ್ನಲ್ಲೇ ಸುನಾಮಿ ಕೂಡ ಅಪ್ಪಳಿಸಲಿದೆ ಎಂದು ತಜ್ಞರು ಸರ್ಕಾರವನ್ನು ಎಚ್ಚರಿಸಿದ್ದಾರೆ.

ರಷ್ಯಾಕ್ಕೆ ಸುನಾಮಿ ಕಂಟಕ, ಅಮೆರಿಕ ಭೂವೈಜ್ಞಾನಿಕ ಸಮೀಕ್ಷೆ ಎಚ್ಚರಿಕೆ!

ಸುಮಾರು 30 ಮೀಟರ್‌ಗೂ ಅಧಿಕ ಎತ್ತರದ ಭಾರೀ ಗಾತ್ರದ ಅಲೆಗಳು ಜಪಾನ್ ದ್ವೀಪಗಳ ದಡವನ್ನು ಅಪ್ಪಳಿಸಲಿವೆ ಎಂದು ಅಂದಾಜಿಸಲಾಗಿದ್ದು, ಈ ಕುರಿತು ಸರ್ಕಾರ ಸನ್ನದ್ಧ ಸ್ಥಿತಿಯಲ್ಲಿ ಇದೆ.

ರಿಕ್ಟರ್ ಮಾಪಕದಲ್ಲಿ 9 ರಷ್ಟು ತೀವ್ರತೆಯುಳ್ಳ ಭೂಕಂಪದ ನಿರೀಕ್ಷೆ ಮಾಡಲಾಗಿದ್ದು, ಇದರೊಂದಿಗೆ ಸುನಾಮಿ ಅಪ್ಪಳಿಸುವ ಭೀತಿಯೂ ಎದುರಾಗಿದೆ. ದೇಶದ ಕುರಿಲ್ ಹಾಗೂ ಈಜೂ ದ್ವೀಪಗಳಲ್ಲಿ ಈ ಭೂಕಂಪದ ಕೇಂದ್ರ ಇರುವ ಸಾಧ್ಯತೆ ಇದೆ ಎಂದು ಅಂದಾಜಿಸಿರುವ ವಿಜ್ಞಾನಿಗಳು, ಇದರೊಂದಿಗೆ ಸುನಾಮಿಯೂ ಅಪ್ಪಳಿಸಿದರೆ ಜಪಾನ್ ಭಾರೀ ಸಂಕಷ್ಟದಲ್ಲಿ ಸಿಲುಕುವ ಸಾಧ್ಯತೆ ಇದೆ ಎಂದಿದ್ದಾರೆ.