ಶ್ರೀಸಾಮಾನ್ಯನನ್ನು ವರಿಸಲು ಪಟ್ಟ ಬಿಟ್ಟ ರಾಣಿ!

ಟೋಕಿಯೊ: ಪ್ರೀತಿಗೆ ಕುರುಡು ಅಂತಾರೆ. ಅದಕ್ಕೆ ಯಾವುದೇ ಜಾತಿ, ಧರ್ಮ, ಅಂತಸ್ತಿನ ಹಂಗಿರೋಲ್ಲ ಎನ್ನುವುದಕ್ಕೆ ಈ ಘಟನೆಯೇ ನಿದರ್ಶನ.

ಹೌದು, ಜಪಾನ್‌ನ ರಾಜಕುಮಾರಿ ತನ್ನ ಪ್ರೀತಿ ಪಡೆದುಕೊಳ್ಳಲು ರಾಜಮನೆತನದ ಪಟ್ಟವನ್ನೇ ಕಳೆದುಕೊಳ್ಳಲು ಸಿದ್ಧಳಾಗಿದ್ದಾಳೆ.

ಜಪಾನ್ ಚಕ್ರವರ್ತಿ ಅಖಿಹಿತೋ ಅವರ ಮೊಮ್ಮಗಳು ಮಾಕೋ (25) ಅವರು ಸಹಪಾಠಿ ಕೈ ಕೊಮುರೋನನ್ನು ಪ್ರೀತಿಸಿದ್ದು, ಆತನನ್ನೇ ವಿವಾಹವಾಗುವುದಾಗಿ ಘೋಷಿಸಿದ್ದಾರೆ ಎಂದು ಡೈಲಿಮೇಲ್ ವರದಿ ಮಾಡಿದೆ.

ಈ ವಿವಾಹಕ್ಕೆ ರಾಜಮನೆತನದ ಸಮ್ಮತಿಯೂ ಇದೆ. ಆದರೆ, ಜಪಾನ್ ಸಂಪ್ರದಾಯದ ಪ್ರಕಾರ ರಾಜಕುಮಾರಿ ರಾಜಮನೆತ ಹೊರತುಪಡಿಸಿ, ಬೇರೆಯವರನ್ನು ವರಿಸಿದರೆ, ರಾಯಲ್ ಸ್ಟೇಟಸ್ ಕಳೆದುಕೊಳ್ಳಬೇಕಾಗುತ್ತದೆ. ತನ್ನ ಪವಿತ್ರ ಪ್ರೀತಿ ಪಡೆಯಲು ರಾಜಕುಮಾರಿ ರಾಜಮನೆತನದ ಪಟ್ಟವನ್ನೇ ಕಳೆದುಕೊಳ್ಳಲು ನಿರ್ಧರಿಸಿದ್ದಾರೆ.


ಪ್ರೇಮಾಂಕುರವಾಗಿದ್ದು ಎಲ್ಲಿ?

ಕಳೆದ ಐದು ವರ್ಷಗಳ ಹಿಂದೆ ಟೋಕಿಯೊದ ಅಂತಾರಾಷ್ಟ್ರೀಯ ಕ್ರಿಶ್ಚಿಯನ್ ವಿಶ್ವವಿದ್ಯಾಲಯದಲ್ಲಿ ವ್ಯಾಸಂಗ ಮಾಡುತ್ತಿದ್ದಾಗ ರಾಜಕುಮಾರಿ ಮಾಕೋ ಹಾಗೂ ಕೈ ಕೊಮುರೋ ನಡುವೆ ಪ್ರೇಮಾಂಕುರವಾಗಿತ್ತು. ಅಂತೆಯೇ ವಿವಾಹವಾಗಲೂ ನಿರ್ಧರಿಸಿದ್ದರು. ರಾಜಮನೆತನದ ಪಟ್ಟ ಹೋದರೇನಂತೆ ಪ್ರೀತಿಸಿದಾತನೊಂದಿಗೆ ನೆಮ್ಮದಿಯ ಜೀವನ ಕಳೆಯಲು ಬಯಸಿದ್ದಾರೆ.

'ನಾನು ಮೊದಲ ಬಾರಿಗೆ ಕೈ ಕೊಮುರೋ ಅವರ ಮುಗುಳುನಗೆ ನೋಡಿ ಫೀದಾ ಆಗಿಬಿಟ್ಟೆ' ಎಂದು ರಾಣಿ ಮಾಕೋ ಪತ್ರಿಕಾಗೋಷ್ಠಿಯಲ್ಲಿ ಹೇಳಿದ್ದಾರೆ.