ಚೀನಾ ಜೊತೆ ಹಗೆತನವಿಲ್ಲ, ಸಂಬಂಧ ಸುಧಾರಣೆಗೆ ಒತ್ತು ಎಂದ ಜೋ ಬಿಡೆನ್‌

ವಾಷಿಂಗ್ಟನ್‌: ಚೀನಾ ಜತೆ ಹಗೆತನ ಸಾಧಿಸುವ ಉದ್ದೇಶ ತಮ್ಮ ಸರಕಾರಕ್ಕೆ ಇರುವುದಿಲ್ಲ. ಆದರೆ ಕಮ್ಯೂನಿಸ್ಟ್‌ ರಾಷ್ಟ್ರವು, ವಿಶ್ವ ಆರೋಗ್ಯ ಸಂಸ್ಥೆಯ ನಿಬಂಧನೆಗಳಿಗೆ ಬದ್ಧವಾಗಿ ನಡೆದುಕೊಳ್ಳಬೇಕು ಎಂಬುದನ್ನು ಅಮೆರಿಕ ಬಯಸುತ್ತದೆ. ಈ ವಿಚಾರದಲ್ಲಿ ವಿಶ್ವ ಸಮುದಾಯಕ್ಕೆ ಅನುಮಾನವೇ ಬೇಡ ಎಂದು ಅಮೆರಿಕದ ನಿಯೋಜಿತ ಅಧ್ಯಕ್ಷ ಜೋ ಬಿಡೆನ್‌ ಸ್ಪಷ್ಟಪಡಿಸಿದ್ದಾರೆ.

ಮಾಧ್ಯಮಗಳ ಜತೆ ಮಾತನಾಡಿದ ಅವರು, ‘‘ಕೊರೊನಾ ಸಾಂಕ್ರಾಮಿಕದಿಂದ ವಿಶ್ವದ ಎಲ್ಲ ರಾಷ್ಟ್ರಗಳೂ ಪಾಠ ಕಲಿತಿವೆ. ಚೀನಾದ ಮೇಲೆ ಆರ್ಥಿಕ ದಿಗ್ಬಂಧನಗಳನ್ನು ಹೇರುವುದು ಸೇರಿ ಕಠಿಣ ಕ್ರಮಗಳನ್ನು ಕೈಗೊಳ್ಳುವ ಬಗ್ಗೆ ನಮ್ಮ ಆಡಳಿತಕ್ಕೆ ಅತೀವ ಆಸಕ್ತಿ ಇಲ್ಲ. ಆದರೆ ಆ ರಾಷ್ಟ್ರವು ವಿಶ್ವ ಆರೋಗ್ಯ ಸಂಸ್ಥೆಯೂ ಸೇರಿದಂತೆ ಅಂತಾರಾಷ್ಟ್ರೀಯ ಸಂಸ್ಥೆಗಳ ನಿಬಂಧನೆಗಳಿಗೆ ಬದ್ಧವಾಗಿ ನಡೆದುಕೊಳ್ಳಬೇಕು. ತಾನು ಆಡಿದ್ದೇ ಆಟ ಎಂಬ ಹಠಮಾರಿ ಧೋರಣೆ ಬಿಡಬೇಕು. ನಮ್ಮ ಆಡಳಿತ ಚೀನಾ ಜತೆಗಿನ ಸಂಬಂಧ ಸುಧಾರಣೆಗೆ ಒತ್ತು ಕೊಡಲಿದೆ. ಇಲ್ಲಿ ದಂಡನೆಗಿಂತಲೂ ಮುಖ್ಯವಾಗಿ ಪರಿಸ್ಥಿತಿ ಸುಧಾರಣೆಯ ಆದ್ಯತೆ ಮುಖ್ಯವಾಗುತ್ತದೆ,’’ ಎಂದು ಹೇಳಿದ್ದಾರೆ.

ನಿರ್ಗಮಿತ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌ ಅಧಿಕಾರವಧಿಯಲ್ಲಿ ಕೊರೊನಾ ಹಾವಳಿ ವಿಚಾರವಾಗಿ ಅಮೆರಿಕವು, ಚೀನಾ ಹಾಗೂ ವಿಶ್ವ ಆರೋಗ್ಯ ಸಂಸ್ಥೆ ಜತೆಗಿನ ಸಂಬಂಧವನ್ನು ಹಳಸಿಕೊಂಡಿದೆ. ಈ ಹಿನ್ನೆಲೆಯಲ್ಲಿ ಬಿಡೆನ್‌ ಅವರ ಹೇಳಿಕೆ ಮಹತ್ವ ಪಡೆದಿದೆ.

ಜೋ ಬಿಡೆನ್‌ ಸಂಪುಟದಲ್ಲಿ ಇಬ್ಬರು ಭಾರತೀಯ ಮೂಲದವರಿಗೆ ಸ್ಥಾನ?
ಪುನಃ ಸೇರುತ್ತೇವೆ

ಅಮೆರಿಕವು ವಿಶ್ವ ಆರೋಗ್ಯ ಸಂಸ್ಥೆಗೆ ಪುನಃ ಸೇರಿಕೊಂಡು ವಿಶ್ವ ಆರೋಗ್ಯ ಕಲ್ಯಾಣ ಸೇವೆಗಳಿಗೆ ಕೊಡುಗೆ ಸಲ್ಲಿಸಲಿದೆ. ಜಾಗತಿಕ ತಾಪಮಾನ ಏರಿಕೆಯನ್ನು 2 ಡಿಗ್ರಿ ಸೆಲ್ಸಿಯಸ್‌ನಷ್ಟು ನಿಯಂತ್ರಿಸುವ ಪ್ಯಾರಿಸ್‌ ಹವಾಮಾನ ಒಪ್ಪಂದಕ್ಕೂ ಅಮೆರಿಕ ಪುನಃ ಸೇರ್ಪಡೆಯಾಗಲಿದೆ ಎಂದು ಬಿಡೆನ್‌ ಪುನರುಚ್ಚರಿಸಿದ್ದಾರೆ.

78ನೇ ವಸಂತಕ್ಕೆ ಕಾಲಿರಿಸಿದ ಬಿಡೆನ್‌

ಜೋ ಬೈಡೆನ್‌ ಶುಕ್ರವಾರ 78ನೇ ವರ್ಷಕ್ಕೆ ಕಾಲಿರಿಸಿದ್ದು, ಚುನಾವಣೆ ಗೆಲುವಿನ ಉತ್ಸಾಹದಲ್ಲಿ ಅವರು ತಮ್ಮ ಹುಟ್ಟುಹಬ್ಬ ಆಚರಿಸಿಕೊಂಡಿದ್ದಾರೆ. ಇನ್ನೂ ಕೆಲವೇ ವಾರಗಳಲ್ಲಿ ಅಧ್ಯಕ್ಷರಾಗಿ ಅಧಿಕಾರ ವಹಿಸಿಕೊಳ್ಳಲಿರುವ ಬಿಡೆನ್‌ ಅಮೆರಿಕದ ಇತಿಹಾಸದಲ್ಲಿಯೇ ಈ ಹುದ್ದೆಗೇರಿದ ಅತಿ ಹಿರಿಯ ವ್ಯಕ್ತಿ ಎನಿಸಿಕೊಳ್ಳಲಿದ್ದಾರೆ. 1989ರಲ್ಲಿ ರೊನಾಲ್ಡ್‌ ರೇಗನ್‌ ಅವರು ಅಧ್ಯಕ್ಷ ಹುದ್ದೆಯಿಂದ ಕೆಳಗಿಳಿದಾಗ ಅವರಿಗೆ 77 ವರ್ಷವಾಗಿತ್ತು.