ಬಿಡೆನ್‌ ಪದಗ್ರಹಣಕ್ಕೆ ಕ್ಷಣಗಣನೆ; ವಾಷಿಂಗ್ಟನ್‌ನಲ್ಲಿ ಅಫ್ಘಾನಿಸ್ತಾನ, ಇರಾಕ್‌ಗಿಂತಲೂ ಹೆಚ್ಚಿನ ಸೇನೆ ಜಮಾವಣೆ

ವಾಷಿಂಗ್ಟನ್‌: ಜನವರಿ 6ರಂದು ಡೊನಾಲ್ಡ್‌ ಟ್ರಂಪ್‌ ಬೆಂಬಲಿಗರು ಅಮೆರಿಕ ಕ್ಯಾಪಿಟಲ್‌ ಮೇಲೆ ದಾಳಿ ನಡೆಸಿರುವ ಹಿನ್ನೆಲೆಯಲ್ಲಿ ನಿಯೋಜಿತ ಅಧ್ಯಕ್ಷ ಜೋ ಬಿಡೆನ್‌ ಪದಗ್ರಹಣಕ್ಕೆ ಭಾರಿ ಭದ್ರತೆಯ ಏರ್ಪಾಡು ಮಾಡಲಾಗಿದೆ.

ಕ್ಯಾಪಿಟಲ್‌ ದಾಳಿಯಲ್ಲಿ ಹಿಂಸಾಚಾರ ಕೂಡ ನಡೆದಿತ್ತು. ಘಟನೆಯಲ್ಲಿ ಐವರು ಸಾವನ್ನಪ್ಪಿ ಹಲವರು ಗಾಯಗೊಂಡಿದ್ದರು. ಈ ಹಿನ್ನೆಲೆಯಲ್ಲಿ ಬಿಡೆನ್‌ ಪ್ರಮಾಣವಚನ ಸ್ವೀಕಾರ ಸಮಾರಂಭದ ವೇಳೆ ಯಾವುದೇ ಅಹಿತಕರ ಘಟನೆಗಳು ನಡೆಯದಂತೆ ಎಚ್ಚರಿಕೆ ವಹಿಸಲಾಗುತ್ತಿದೆ. ವಾಷಿಂಗ್ಟನ್‌ನಾದ್ಯಂತ ಚೆಕ್‌ಪೋಸ್ಟ್‌ಗಳು, ತಡೆಗೋಡೆಗಳು ನಿರ್ಮಾಣವಾಗಿವೆ.

ಯುದ್ಧಪೀಡಿತ ಅಫ್ಘಾನಿಸ್ತಾನ ಮತ್ತು ಇರಾಕ್‌ಗಿಂತಲೂ ಹೆಚ್ಚಿನ ಸೈನಿಕರು ದೇಶದ ರಾಜಧಾನಿಯಲ್ಲಿ ಜಮೆಯಾಗಿದ್ದಾರೆ. ಕನಿಷ್ಠ 25,000 ಸಶಸ್ತ್ರ ಪಡೆಗಳನ್ನು ವಾಷಿಂಗ್ಟನ್‌ಗೆ ಕರೆಸಿಕೊಳ್ಳಲಾಗಿದೆ. ಇದು ಅಫ್ಘಾನಿಸ್ತಾನ ಮತ್ತು ಇರಾಕ್‌ನಲ್ಲಿರುವ ಸೈನಿಕರಿಗಿಂತ 10 ಪಟ್ಟು ಹೆಚ್ಚಾಗಿದೆ. ಈ ಎರಡೂ ದೇಶಗಳಲ್ಲಿ ತಲಾ 2,500 ಅಮೆರಿಕ ಸೈನಿಕರಿದ್ದರೆ, ಸಿರಿಯಾದಲ್ಲಿ 900 ಅಮೆರಿಕ ಸೈನಿಕರಿದ್ದಾರೆ.

ಜ.20ಕ್ಕೆ ಜೋ ಬಿಡೆನ್, ಕಮಲಾ ಹ್ಯಾರಿಸ್ ಪ್ರಮಾಣವಚನ: ಹೊರಳು ಹಾದಿಯಲ್ಲಿ ಅಮೆರಿಕ!
ಅಮೆರಿಕ ಅಧ್ಯಕ್ಷರ ಪದಗ್ರಹಣ ಸಮಾರಂಭದಂದು ಬಿಗಿ ಭದ್ರತೆ ಇರುವುದು ಸಾಮಾನ್ಯ. ಆದರೆ ಅಮೆರಿಕದ ಇತಿಹಾಸದಲ್ಲಿ ಈ ಪರಿಯ ಭದ್ರತೆ ಕೈಗೊಂಡಿರುವುದು ಇದೇ ಮೊದಲು.

2016ರಲ್ಲಿ ಟ್ರಂಪ್‌ ಪದಗ್ರಹಣಕ್ಕೆ 8000 ಸೈನಿಕರನ್ನು ಕರೆಸಿಕೊಳ್ಳಲಾಗಿತ್ತು. ಸಾಮಾನ್ಯ ಗೂಢಚರರು ಮತ್ತು ಪೊಲೀಸರ ಹೊರತಾಗಿ ಇಷ್ಟೊಂದು ಸೈನಿಕರು ಅಂದು ರಾಜಧಾನಿಯಲ್ಲಿ ಬೀಡುಬಿಟ್ಟಿದ್ದರು. ಈ ಬಾರಿ ಅದಕ್ಕಿಂತಲೂ ಹೆಚ್ಚಿನ ಭದ್ರತೆ ಕೈಗೊಳ್ಳಲಾಗಿದ್ದು ಯಾವುದೇ ಅಹಿತಕರ ಘಟನೆಗಳಿಗೆ ಆಸ್ಪದವಿಲ್ಲದೆ ಪದಗ್ರಹಣ ಸಮಾರಂಭ ನಡೆಯಲಿದೆ ಎಂದುಕೊಳ್ಳಲಾಗಿದೆ.

ಭಾರತೀಯ ಕಾಲಮಾನ ಬುಧವಾರ ರಾತ್ರಿ 10.30ಕ್ಕೆ ಅಮೆರಿಕದ ನೂತನ ಅಧ್ಯಕ್ಷರಾಗಿ ಜೋ ಬಿಡೆನ್‌ ಅಧಿಕಾರ ಸ್ವೀಕರಿಸಲಿದ್ದಾರೆ.