ಮೊದಲ ಭಾಷಣದಲ್ಲಿಯೇ ಭಾರತಕ್ಕೆ ಕಮಲಾ ಜೈಹೋ..! ತಾಯ್ನಾಡಿನ ನಂಟು ಸ್ಮರಿಸಿದ ಹ್ಯಾರಿಸ್‌

ವಾಷಿಂಗ್ಟನ್‌: ಮುಂಬರುವ ಚುನಾವಣೆಯಲ್ಲಿ ಉಪಾಧ್ಯಕ್ಷ ಸ್ಥಾನದ ಡೆಮಕ್ರಾಟಿಕ್‌ ಪಕ್ಷದ ಅಭ್ಯರ್ಥಿಯಾಗಿ ಆಯ್ಕೆಯಾಗುವ ಮೂಲಕ ಅಮೆರಿಕ ರಾಜಕಾರಣದ ಆಕರ್ಷಣೆಯ ಕೇಂದ್ರ ವ್ಯಕ್ತಿ ಎನಿಸಿರುವ ಕಮಲಾ ಹ್ಯಾರಿಸ್‌, ಗುರುವಾರ ತಮ್ಮ ಮೊದಲ ಬಹಿರಂಗ ಭಾಷಣದಲ್ಲಿ ಭಾರತದ ನಂಟು ಹಾಗೂ ತಮ್ಮ ಹೆತ್ತವರನ್ನು ಸ್ಮರಿಸಿಕೊಂಡಿದ್ದಾರೆ.

''ನನ್ನ ಅಮ್ಮ ಶ್ಯಾಮಲಾ ಎಂದು ಒಣ ಆದರ್ಶ ಬೋಧಿಸಲಿಲ್ಲ. ಸಮಸ್ಯೆಗಳಿವೆ ಎಂದು ಗೊಣಗುವವರನ್ನು ಅವರು ಸಹಿಸುತ್ತಿರಲಿಲ್ಲ. ಸಂಕಷ್ಟಗಳಿದ್ದಾಗ ಎದ್ದು ನಿಂತು ಹೋರಾಡು ಎಂದು ಹುರಿದುಂಬಿಸುತ್ತಿದ್ದರು. ನನ್ನ ತಂಗಿ ಮಾಯಾ ಕೂಡ ಇದೇ ಆದರ್ಶವನ್ನು ಪಾಲಿಸಿದಳು. ಅಮೆರಿಕದ ಪ್ರತಿ ತಲೆಮಾರು ಕೂಡ ಮುನ್ನಡೆಯ ಹಾದಿ ಕ್ರಮಿಸಬೇಕು. ಇದಕ್ಕಾಗಿ ನಾವು ತ್ಯಾಗ ಮಾಡಬೇಕು,'' ಎಂದು ಕಮಲಾ ಹೇಳಿದರು.

ಉಪಾಧ್ಯಕ್ಷ ಅಭ್ಯರ್ಥಿಯಾಗಿ ಘೋಷಣೆಯಾದ ಬಳಿಕ ಪ್ರಥಮ ಬಾರಿ ವಿಲ್ಮಿಂಗ್‌ಟನ್‌ನ ಡೆಲವೇರ್‌ನಲ್ಲಿ ಅಧ್ಯಕ್ಷ ಅಭ್ಯರ್ಥಿ ಜೋ ಬಿಡೆನ್‌ ಜತೆ ಬಹಿರಂಗ ವೇದಿಕೆಯಲ್ಲಿ ಕಾಣಿಸಿಕೊಂಡ ಕಮಲಾ ಹ್ಯಾರಿಸ್‌, ''ಚೆನ್ನೈ ಮೂಲದ ತನ್ನ ತಾಯಿ ಶ್ಯಾಮಲಾ ಗೋಪಾಲನ್‌ ಅಮೆರಿಕಕ್ಕೆ ಬಂದು ಈ ನಾಡಿನ ಒಳಿತಿಗಾಗಿ ತ್ಯಾಗಮಯಿ ಬದುಕು ನಡೆಸಿದರು,'' ಎಂದು ಸ್ಮರಿಸಿದರು. ಕಮಲಾ ಅವರ ತಂದೆ ಹ್ಯಾರಿಸ್‌ ಅವರು ಜಮೈಕಾ ಮೂಲದವರು. ಕ್ಯಾಲಿಫೋರ್ನಿಯಾ ಸೆನೆಟರ್‌ ಆಗಿರುವ ಕಮಲಾ, ರಾಜತಾಂತ್ರಿಕ ವಿಷಯಗಳಲ್ಲಿ ಅಪಾರ ತಿಳಿವಳಿಕೆ ಹೊಂದಿದ್ದಾರೆ.

ಅಮೆರಿಕದ ಚುನಾವಣೆಯಲ್ಲಿ ಕಮಲ! ಯಾರಿದು ಭಾರತೀಯ ಮೂಲದ ನಾರಿಮಣಿ?

''ನನ್ನ ತಾಯಿ ಮತ್ತು ತಂದೆ ಇಬ್ಬರೂ ತದ್ವಿರುದ್ಧ ದಿಕ್ಕುಗಳಿಂದ ವಿಶ್ವ ದರ್ಜೆಯ ಶಿಕ್ಷಣ ಹುಡುಕಿ ಅಮೆರಿಕಕ್ಕೆ ಬಂದು ನೆಲೆಸಿದವರು. ಇಲ್ಲಿ ಅವರು ಸುಮ್ಮನೆ ಕೂರಲಿಲ್ಲ. ಮಾನವ ಹಕ್ಕುಗಳ ಪರ ಹೋರಾಟಕ್ಕಿಳಿದರು. ಮೊದಲು ಓಕ್‌ಲ್ಯಾಂಡ್‌ ಬೀದಿಗಳಲ್ಲಿ ವಿದ್ಯಾರ್ಥಿಗಳನ್ನು ಸಂಘಟಿಸಿದರು. ಆ ಮೂಲಕ ಪರಸ್ಪರ ಪರಿಚಯಗೊಂಡರು. ಅಂದು ಅವರು ಹುಟ್ಟುಹಾಕಿದ ಹೋರಾಟದ ರಥ ಇಂದಿಗೂ ಮುನ್ನಡೆಯುತ್ತಿದೆ. ಅವರ ಆದರ್ಶವೇ ನನ್ನನ್ನೂ ಮುನ್ನಡೆಸುತ್ತಿದೆ'' ಎಂದು ಹೇಳಿದರು.

ಅಮೆರಿಕ ಉಪಾಧ್ಯಕ್ಷ ಚುನಾವಣೆಗೆ ಭಾರತೀಯ ಮೂಲದ ಕಮಲಾ ಹ್ಯಾರಿಸ್ ಆಯ್ಕೆ: ಡೆಮಾಕ್ರಾಟ್ಸ್ ಜಾಣ ನಡೆ!

ಭಾರತೀಯ ಸಮುದಾಯ ಸಂಭ್ರಮ
ಕಮಲಾ ಹ್ಯಾರಿಸ್‌ ಉಪಾಧ್ಯಕ್ಷ ಸ್ಥಾನದ ಅಭ್ಯರ್ಥಿಯಾಗಿ ಘೋಷಣೆಯಾದ ಬೆನ್ನಿಗೆ ಅಮೆರಿಕದಲ್ಲಿ ನೆಲೆಸಿರುವ ಭಾರತೀಯ ಸಮುದಾಯದಲ್ಲಿ ವ್ಯಾಪಕ ಹರ್ಷ ವ್ಯಕ್ತವಾಗಿದೆ. ''ಉಪಾಧ್ಯಕ್ಷ ಸ್ಥಾನಕ್ಕೆ ಎರಡೂ ಪಕ್ಷಗಳಲ್ಲಿ ಭಾರಿ ಪೈಪೋಟಿ ಇದೆ. ಅದನ್ನು ಎದುರಿಸಿ ಕಮಲಾ ಹ್ಯಾರಿಸ್‌ ಆಯ್ಕೆಯಾಗಿರುವುದು ಅದ್ಭುತ ಸಾಧನೆಯೇ ಸರಿ. ಇದು ಅಮೆರಿಕದಲ್ಲಿರುವ ಭಾರತೀಯ ಸಮುದಾಯಕ್ಕೆ ಸಂದ ಬಹುದೊಡ್ಡ ಮನ್ನಣೆ,'' ಎಂದು ಸಿಖ್‌ ಮತ್ತು ಮುಸ್ಲಿಂ ಸಂಘಟನೆಗಳು ಕೊಂಡಾಡಿವೆ.

ಕಮಲಾ ಹ್ಯಾರಿಸ್‌ಗೂ ಮುನ್ನ ಭಾರತದ ನಮ್ಮ ತಾಯಿ ಬಗ್ಗೆ ತಿಳಿಯಿರಿ: ಸಹೋದರಿ ಮಾಯಾ ಭಾವನಾತ್ಮಕ ಟ್ವೀಟ್‌

26 ದಶಲಕ್ಷ ಡಾಲರ್‌ ಸಂಗ್ರಹಕಮಲಾ ಹ್ಯಾರಿಸ್‌ ಅವರನ್ನು ಉಪಾಧ್ಯಕ್ಷ ಅಭ್ಯರ್ಥಿಯಾಗಿ ಘೋಷಣೆ ಮಾಡಿದ 24 ಗಂಟೆಗಳಲ್ಲಿ ಅಧ್ಯಕ್ಷೀಯ ಅಭ್ಯರ್ಥಿ ಜೋ ಬಿಡೆನ್‌ ಅವರಿಗೆ ಚುನಾವಣಾ ಪ್ರಚಾರಕ್ಕಾಗಿ 26 ದಶಲಕ್ಷ ಡಾಲರ್‌ ದೇಣಿಗೆ ಸಂದಾಯವಾಗಿದೆ.