ಭಾರತ ಮೂಲದ ಕಾರ್ತಿಕ್‌ ನೆಮ್ಮಾನಿಗೆ ‘ಸ್ಪೆಲ್ಲಿಂಗ್‌ ಬೀ’ ಪ್ರಶಸ್ತಿ

ಹ್ಯೂಸ್ಟನ್‌: ಭಾರತೀಯ ಮೂಲದ 14 ವರ್ಷದ ಅಮೆರಿಕದ ವಿದ್ಯಾರ್ಥಿ ಕಾರ್ತಿಕ್‌ ನೆಮ್ಮಾನಿ ಶುಕ್ರವಾರ 'koinonia' ಶಬ್ದದ ಸ್ಪೆಲ್ಲಿಂಗನ್ನು ಸರಿಯಾಗಿ ಉಚ್ಚರಿಸುವ ಮೂಲಕ 'ಸ್ಕ್ರಿಫ್ಸ್‌ ನ್ಯಾಷನಲ್‌ ಸ್ಪೆಲ್ಲಿಂಗ್‌ ಬೀ' ಪ್ರಶಸ್ತಿ ಗಿಟ್ಟಿಸಿದರು. ಇದರೊಂದಿಗೆ ಭಾರತೀಯ ಸಮುದಾಯ ಸತತ 11ನೇ ವರ್ಷ ಪ್ರತಿಷ್ಠಿತ ಸ್ಪರ್ಧೆಯಲ್ಲಿ ಪಾರುಪತ್ಯ ಸಾಧಿಸಿದಂತಾಗಿದೆ.

ಟೆಕ್ಸಸ್‌ನ ಮೆಕಿನ್ನೆಯ 8ನೇ ತರಗತಿ ವಿದ್ಯಾರ್ಥಿ ಕಾರ್ತಿಕ್‌ಗೆ ಫೈನಲ್ಸ್‌ನಲ್ಲಿ ಎದುರಾಗಿದ್ದು ಭಾರತೀಯ ಮೂಲದ ನೈಸಾ ಮೋದಿ. ಒಟ್ಟು 516 ಮಂದಿ ಸ್ಪರ್ಧಿಗಳಿದ್ದರು. ಕಾರ್ತಿಕ್‌ಗೆ ಸ್ಕ್ರಿಫ್ಸ್‌ ಬಿಯಿಂದ 40 ಸಾವಿರ ಡಾಲರ್‌, ಟ್ರೋಫಿ, ಮೆರಿಯಾಮ್‌ ವೆಬ್‌ಸ್ಟರ್‌ನಿಂದ 2,500 ಡಾಲರ್‌ ನಗದು ಬಹುಮಾನ ದೊರೆತಿದೆ.