ವಾಷಿಂಗ್ಟನ್‌: ಅಮೆರಿಕ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌ ಉತ್ತರ ಕೋರಿಯಾದ ಸರ್ವಾಧಿಕಾರಿ ಕಿಮ್‌ ಜಾಂಗ್‌ ಉನ್‌ಗೆ ಖಡಕ್‌ಎಚ್ಚರಿಕೆ ನೀಡಿದ್ದು, ನಮ್ಮ ಹಾಗೂ ನಮ್ಮ ಮಿತ್ರ ಪಡೆಗಳ ತಂಟೆಗೆ ಬಂದರೆ ಅದರಿಂದ ಸಾಕಷ್ಟು ಪಶ್ಚಾತಾಪಕ್ಕೆ ಒಳಗಾಗಬೇಕಾಗುತ್ತದೆ ಎಂದು ಗುಡುಗಿದ್ದಾರೆ.
ಈ ಮುಂಚೆ ಅಮೆರಿಕ ಉತ್ತರ ಕೊರಿಯಾದ ಅಣ್ವಸ್ತ್ರ ದಾಹಕ್ಕೆ ಬ್ರೇಕ್‌ ಹಾಕುವ ನಿಟ್ಟಿನಲ್ಲಿ ಹಣಕಾಸು ನೆರವಿನ ಮೇಲೆ ನಿರ್ಬಂಧನೆಗಳನ್ನು ಹೇರಿದ ಬಳಿಕ ಹತಾಶರಾದ ಕಿಮ್‌ ತಾವು ಅಮೆರಿಕದ ಗ್ವಾಮ್‌ ಪ್ರದೇಶದ ಮೇಲೆ ದಾಳಿ ಮಾಡುವಷ್ಟು ಸಶಕ್ತರು ಎಂದು ಬೆದರಿಕೆ ಹಾಕಿದ್ದರು. ಕಿಮ್‌ ಅವರ ಉದ್ದಟತನಕ್ಕೆ ಕೆಂಡಾಮಂಡಲರಾದ ಟ್ರಂಪ್‌, ಗ್ವಾಮ್‌ಗೆ ಹಾನಿ ಮಾಡಿದಲ್ಲಿ, ಅಥವಾ ಅಮೆರಿಕದ ಭೂಪ್ರದೇಶ ಹಾಗೂ ಮಿತ್ರರಾಷ್ಟ್ರಗಳ ತಂಟೆಗೆ ಬಂದಲ್ಲಿ 'ಪಶ್ಚಾತಾಪ ನಿಶ್ಚಿತ' ಎಂದಿದ್ದಾರೆ.
''ಒಂದುವೇಳೆ ಉತ್ತರ ಕೊರಿಯಾ ಎಲ್ಲೆ ಮೀರಿದರೆ ಅದನ್ನು ಎದುರಿಸಲು ನಮ್ಮ ಸೇನಾಪಡೆಗಳು ಸರ್ವ ಸನ್ನದ್ಧವಾಗಿವೆ. ನಾಯಕ ಕಿಮ್‌ ಬೇರೆ ದಾರಿ ಕಂಡುಕೊಳ್ಳಲಿ ಎನ್ನುವುದು ನನ್ನ ಆಶಯ,'' ಎಂದು ಟ್ರಂಪ್‌ ಟ್ವೀಟ್‌ ಮಾಡಿದ್ದು, ಉತ್ತರದ ಸರ್ವಾಧಿಕಾರಿಯನ್ನು ಸೆದೆಬಡೆಯಲು ತಾವು ಸನ್ನದ್ಧ ಎಂದು ಪರೋಕ್ಷವಾಗಿ ಹೇಳಿದ್ದಾರೆ. ಪೆಂಟಗಾನ್‌ ಅಧಿಕಾರಿಗಳು ಕೂಡ, ಯಾವುದೇ ಕ್ಷಣದಲ್ಲೂ ಕೊರಿಯಾ ದ್ವೀಪಕಲ್ಪದ ಮೇಲೆ ದಾಳಿಗೆ ಸಿದ್ಧ ಅಮೆರಿಕ ಸೇನೆ ಸಿದ್ಧ ಎಂದು 'ಫಾಕ್ಸ್‌ ನ್ಯೂಸ್‌' ಸುದ್ದಿ ಮಾಧ್ಯಮಕ್ಕೆ ತಿಳಿಸಿದ್ದಾರೆ.