ಅಮೆರಿಕ ದಾಳಿಯ ರೂವಾರಿ ಮಗಳ ವರಿಸಿದ ಲಾಡೆನ್‌ ಮಗ

ಲಂಡನ್‌: ಒಸಾಮಾ ಬಿನ್‌ ಲಾಡೆನ್‌ನ ಮಗ ಹಮ್ಜಾ ಬಿನ್‌ ಲಾಡೆನ್‌, ಸೆಪ್ಟೆಂಬರ್‌ 2001ರ ಅಮೆರಿಕ ದಾಳಿಯ ಹಿಂದಿನ ಪ್ರಮುಖ ನಾಯಕರಲ್ಲಿ ಒಬ್ಬನಾದ ಮಹಮದ್‌ ಅಟಾನ ಮಗಳನ್ನು ಮದುವೆಯಾಗಿದ್ದಾನೆ! ಸುದ್ದಿವಾಹಿನಿಗೆ ನೀಡಿದ ಸಂದರ್ಶನದಲ್ಲಿ ಒಸಾಮಾ ಬಿನ್‌ ಲಾಡೆನ್‌ನ ಮಲಸಹೋದರರಾದ ಅಹ್ಮದ್‌ ಮತ್ತು ಹಸನ್‌ ಅಲ್‌-ಅಟ್ಟಾಸ್‌, ಮದುವೆಯನ್ನು ಖಚಿತಪಡಿಸಿದ್ದಾರೆ.

''ನಮಗೆ ಹಮ್ಜಾ ಎಲ್ಲಿದ್ದಾನೆ ಎಂಬ ಬಗ್ಗೆ ಖಚಿತ ಮಾಹಿತಿ ಇಲ್ಲ. ಬಹುಶಃ ಅಫಘಾನಿಸ್ತಾನದಲ್ಲಿ ಇರಬಹುದು. ಹಮ್ಜಾ ಅಲ್‌ಖೈದಾದಲ್ಲಿ ಪ್ರಮುಖ ಜವಾಬ್ದಾರಿಯನ್ನು ಹೊತ್ತಿದ್ದಾನೆ. ಆತ ತನ್ನ ತಂದೆಯ ಸಾವಿನ ಸೇಡನ್ನು ತೀರಿಸಿಕೊಳ್ಳಲು ಯೋಜಿಸಿದ್ದಾನೆ,'' ಎಂದು ತಿಳಿಸಿದ್ದಾರೆ.

ಪಾಕಿಸ್ತಾನದ ಅಬ್ಬೊಟಾಬಾದ್‌ ಪಟ್ಟಣದಲ್ಲಿ ಮೇ 2,2011ರಲ್ಲಿ ಅಮೆರಿಕ ಸೇನೆಯಿಂದ ನಡೆದ ರಹಸ್ಯ ಕಾರ್ಯಾಚರಣೆಯಲ್ಲಿ ಒಸಾಮಾ ಬಿನ್‌ ಲಾಡೆನ್‌ನನ್ನು ಹತ್ಯೆ ಮಾಡಲಾಗಿತ್ತು. ಒಸಾಮಾ ಬಿನ್‌ ಲಾಡೆನ್‌ನ, ಬದುಕಿರುವ ಮೂವರು ಪತ್ನಿಯರಲ್ಲಿ ಒಬ್ಬರಾದ ಖೈರಾಯ ಸಬಾರ್‌ಳ ಮಗನಾಗಿದ್ದಾನೆ ಹಮ್ಜಾ. ಲಾಡೆನ್‌ ಹತ್ಯೆ ಸಮಯದಲ್ಲಿ ಅಬ್ಬೊಟಾಬಾದ್‌ನಲ್ಲಿ ಈಕೆ ಆತನ ಜತೆಗಿದ್ದಳು. ಅಮೆರಿಕ, ಬ್ರಿಟನ್‌, ಫ್ರಾನ್ಸ್‌ ಮತ್ತು ಇಸ್ರೇಲ್‌ ವಿರುದ್ಧ ಯುದ್ಧ ಸಾರುವಂತೆ ಅನೇಕ ಬಾರಿ ಹಮ್ಜಾ ಬಹಿರಂಗವಾಗಿ ಕರೆ ನೀಡಿದ್ದಾನೆ. ಅಲ್‌ಖೈದಾ ಉಗ್ರ ಸಂಘನೆಯಲ್ಲಿ ಮುಖ್ಯ ನಾಯಕ ಅಯ್ಯನ್‌ ಅಲ್‌ ಜವಾರಿಯ ನಂತರದ ಸ್ಥಾನದಲ್ಲಿ ಹಮ್ಜಾ ಕಾರ್ಯ ನಿರ್ವಹಿಸುತ್ತಿದ್ದಾನೆ.