ಲಾಸ್‌ವೇಗಾಸ್‌ ಶೂಟೌಟ್: ದಾಳಿ ಹೊಣೆ ಹೊತ್ತ ಐಸಿಸ್‌

ಲಾಸ್‌ವೇಗಾಸ್‌: ಅಮೆರಿಕದಲ್ಲಿ ನಡೆದ ಗುಂಡಿನ ದಾಳಿ ರಾಷ್ಟ್ರದ ಇತಿಹಾಸದಲ್ಲೇ ಅತ್ಯಂತ ಭೀಕರ ಶೂಟೌಟ್ ಪ್ರಕರಣವೆನಿಸಿದೆ. ವರದಿಗಳ ಪ್ರಕಾರ ಈ ದಾಳಿಯ ಹೊಣೆಯನ್ನು ಇಸ್ಲಾಮಿಕ್‌ ಸ್ಟೇಟ್‌ ಹೊತ್ತುಕೊಂಡಿದೆ.

ಭಾನುವಾರ ಮಧ್ಯರಾತ್ರಿ ನಡೆದ ಘಟನೆಯಲ್ಲಿ 50 ಮಂದಿ ಮೃತಪಟ್ಟರೆ 400ಕ್ಕೂ ಅಧಿಕ ಮಂದಿಯನ್ನು ಆಸ್ಪತ್ರೆಗೆ ದಾಖಲಿಸಲಾಗುತ್ತಿದೆ. ಕಳೆದ ವರ್ಷ ಆರ್ಲಾಂಡೋದ ನೈಟ್‌ಕ್ಲಬ್‌ನಲ್ಲಿ ನಡೆದ ಶೂಟೌಟ್‌ನಲ್ಲಿ 49 ಜನರು ಬಲಿಯಾಗಿದ್ದರು.

1949ರ ನಂತರ ಇದೇ ಮೊದಲ ಬಾರಿಗೆ ಭೀಕರ ನರಮೇಧಕ್ಕೆ ಅಮೆರಿಕಾ ಸಾಕ್ಷಿಯಾಗಿದೆ. ಮಾಹಿತಿಗಳ ಪ್ರಕಾರ ಸತ್ತವರಲ್ಲಿ ಲಾಸ್ ವೆಗಾಸ್ ಮೆಟ್ರೋಪಾಲಿಟನ್ ಪೋಲಿಸ್ ಡಿಪಾರ್ಟ್‌ಮೆಂಟ್‌ನ ಅಧಿಕಾರಿಯು ಇದ್ದರು ಎನ್ನಲಾಗಿದೆ. ಲಾಸ್‌ವೇಗಾಸ್‌ನ ಕ್ಯಾಸಿನೊ ಬಳಿ ಸಂಗೀತ ಕಾರ್ಯಕ್ರಮ ನಡೆಯುತ್ತಿದ್ದ ವೇಳೆ ದುಷ್ಕರ್ಮಿ ಸ್ಟೀಫನ್ ಪ್ಯಾಡೋಕ್ ಗುಂಡಿನ ಸುರಿಮಳೆ ಗೈದಿದ್ದಾನೆ.

ಪೊಲೀಸ್‌ ಮಾಹಿತಿಗಳ ಪ್ರಕಾರ ಆರೋಪಿ ಸ್ಟೀಫನ್ ಪ್ಯಾಡೋಕ್ ಜೊತೆ ಮಹಿಳೆಯೂ ಇದ್ದಳು, ಈತ 32 ಅಂತಸ್ಥಿನ ಹೋಟೆಲ್‌ ಮೇಲಿಂದ ಗುಂಡಿನ ದಾಳಿ ನಡೆಸಿದ್ದಾನೆ. ಈ ವೇಳೆ ದುಷ್ಕರ್ಮಿ ಬಳಿ ಕನಿಷ್ಠ ಪಕ್ಷ ಎಂಟು ಗನ್‌ಗಳಿದ್ದವು ಎಂದು ಅಧಿಕಾರಿಗಳು ಊಹಿಸಿದ್ದಾರೆ. ಸ್ವಾಟ್‌ ಟೀಂ ಈಗಾಗಲೇ ಹೋಟೆಲ್‌ ಸುತ್ತುವರಿದು ತನಿಖೆ ನಡೆಸುತ್ತಿದ್ದಾರೆ.

ಪ್ಯಾಡೊಕ್‌ ಕುರಿತು ಮಾಹಿತಿ ಹೊರ ಬೀಳುತ್ತಿದ್ದಂತಯೇ ಪೊಲೀಸರು ಆತನ ಮನೆ ಮೇಲೂ ದಾಳಿ ನಡೆಸಿದ್ದಾರೆ. ಈತನ ಕೃತ್ಯದಿಂದ ಕುಟಂಬಕ್ಕೆ ಆಘಾತವಾಗಿದ್ದು, 'ವಿಷಯ ತಿಳಿಯುತ್ತಿದ್ದಂತೆ ನಮಗೆಲ್ಲರಿಗೂ ದಿಗ್ಬ್ರಮೆಯಾಗಿದೆ. ಮೃತರ ಆತ್ಮಕ್ಕೆ ಶಾಂತಿ ಕೋರುತ್ತೇವೆ' ಎಂದು ಪ್ಯಾಡೊಕ್‌ ಅಣ್ಣ ಎರಿಕ್‌ ಪ್ಯಾಡೋಕ್‌ ಮಾಧ್ಯಮಕ್ಕೆ ಹೇಳಿದ್ದಾರೆ.

ಘಟನೆಗೆ ಸಂಬಂಧಿಸಿದಂತೆ ಟ್ವೀಟ್ ಮಾಡಿರುವ ಅಮೆರಿಕದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ಮೃತರ ಕುಟುಂಬಕ್ಕೆ ತೀವ್ರ ಸಂತಾಪ ಸೂಚಿಸಿದ್ದಾರೆ.

ಈ ಎಲ್ಲದರ ಮಧ್ಯೆ ಅಮೆರಿಕದ ಕಸಿನೋ ಶೇರು ಮಾರುಕಟ್ಟೆಯಲ್ಲೂ ಕುಸಿತ ಕಾಣಿಸಿಕೊಂಡಿದ್ದು, ಶೂಟೌಟ್‌ ಬಳಿಕ ಶೇರ್ಸ್‌ ಆಫ್‌ ಲಾಸ್‌ ವೇಗಸ್‌ ಕ್ಯಾಸಿನೋದ ಶೇರು ಮಾರುಕಟ್ಟೆ ಶೇ.5ರಷ್ಟು ಇಳಿಕೆ ಕಂಡಿದೆ.

Las Vegas attack deadliest in US history: ISIS claims responsibility for deadliest attack