300 ಮಿಲಿಯನ್‌ ಆಸ್ತಿ ತೊರೆದು ಪ್ರೀತಿಸಿದವನನ್ನು ಕಟ್ಟಿಕೊಂಡಳು!

ಮಲೇಷಿಯಾ: Love is Blind ಎಂಬ ಮಾತಿದೆ, ಇದಕ್ಕೆ ಪೂರಕವವಾಗುವಂತೆ ಮಲೇಷಿಯಾದ ಕೋಟ್ಯಾಧಿಪತಿಯ ಮಗಳು ನಿರೂಪಿಸಿದ್ದು, ಈಕೆಯ ನಿರ್ಧಾರ ಸಾಮಾಜಿಕ ಜಾಲತಾಣದಲ್ಲಿ ಭಾರೀ ಚರ್ಚೆಗೆ ಗ್ರಾಸವಾಗಿದೆ.

ಪ್ರೀತಿಸಿದ ಹುಡುಗನಿಗಾಗಿ ಯುವತಿಯರು ಕೋಟ್ಯಾಧಿಪತಿ ಅಪ್ಪ ಹಾಗೂ ಆತನ ಆಸ್ತಿಯನ್ನೇ ತೊರೆದಿರುವುದನ್ನು ಹಲವು ಚಿತ್ರಗಳಲ್ಲಿ ನೋಡಿದ್ದೇವೆ. ಆದರೆ ಮಲೇಷಿಯಾದ ಖೂ ಕೆ ಪೆಂಗ್ ಅವರ ಮಗಳು ಈ ಕಥೆಯನ್ನು ನಿಜರೂಪಕ್ಕೆ ತಂದಿದ್ದು, ಇವರ ಐವರು ಮಕ್ಕಳಲ್ಲಿ ಏಂಜನಿಲ್‌ ಖೂ ಎಂಬಾಕೆ ತಾನು ಪ್ರೀತಿಸಿದ ಯುವಕನ್ನು ಮದುವೆಯಾಗಲು ತಂದೆ ಹಾಗೂ ಕುಟುಂಬವನ್ನೇ ತ್ಯಜಿಸಿದ್ದಾಳೆ.



ಮುನ್ನೂರು ಮಿಲಿಯನ್ ಡಾಲರ್ ಆಸ್ತಿ ಹೊಂದಿರುವ ಸಿರಿವಂತ ಖೂ ಕೆ ಪೆಂಗ್‌ ಮಗಳಾದ ಏಂಜೇಲಿನ್‌, ಆಕ್ಸಫರ್ಡ್‌ ವಿವಿಯಲ್ಲಿ ವ್ಯಾಸಂಗ ಮಾಡುತ್ತಿದ್ದ ವೇಳೆ ಕೆರಿಬಿಯನ್ ಮೂಲದ ಡಾಟಾ ವಿಜ್ಞಾನಿ ಜೆಡಿಡಾಯ್‌ ಫ್ರಾನ್ಸಿಸ್‌ ಎಂಬಾತನನ್ನು ಪ್ರೀತಿಸುತ್ತಿದ್ದಳು. ಅಂತೆಯೇ ಇಬ್ಬರೂ ಮದುವೆಯಾಗಲೂ ಕೂಡ ನಿರ್ಧರಿಸಿದ್ದರು.

'ಆದರೆ ತಂದೆ ಮಾತ್ರ ಇಬ್ಬರ ಮದುವೆಗೆ ಒಪ್ಪಿಗೆ ನೀಡಿರಲಿಲ್ಲ, ತಂದೆಯ ನಿರ್ಧಾರ ತಪ್ಪೆಂದು ನನಗೆ ತಿಳಿದಿತ್ತು. ನನ್ನ ನಿರ್ಧಾರವನ್ನು ಬದಲಾಯಿಸಲು ನಾನು ಯೋಚಿಸಲಿಲ್ಲ' ಎಂದು ಏಂಜೆಲಿನ್‌ ಡೇಲಿ ಮೇಲ್‌ಗೆ ನೀಡಿದ ಸಂದರ್ಶನದಲ್ಲಿ ಬಹಿರಂಗಪಡಿಸಿದ್ದಾಳೆ.



'ಹಣದಿಂದ ಋಣಾತ್ಮಕ ವಿಚಾರಗಳು ಹೆಚ್ಚು ನಮ್ಮನ್ನು ಆವರಿಸಿಕೊಳ್ಳುತ್ತದೆ, ಇದರಿಂದ ಸಮಸ್ಯೆಗಳು ಉಂಟಾಗುತ್ತವೆ ಎಂಬುದನ್ನು ಅರಿತಿದ್ದೆ. ಆದ್ದರಿಂದ ಅಪ್ಪನ ಆಸ್ತಿಯನ್ನು ಬಿಟ್ಟು ಹೋಗುವುದು ಸುಲಭವಾಯಿತು' ಎಂದು ಏಂಜೇಲಿನ್ ಸಂದರ್ಶನದಲ್ಲಿ ತಿಳಿಸಿದ್ದಾಳೆ.

ಅಂತಿಮವಾಗಿ ತನ್ನ ಪ್ರಿಯಕರನೊಂದಿಗೆ ಹೊರ ನಡೆದ ಏಂಜೆಲಿನಾ ಇದೀಗ ಫ್ಯಾಷನ್‌ ಡಿಸೈನರ್‌ ಆಗಿ ಕಾರ್ಯ ನಿರ್ವಹಿಸುತ್ತಿದ್ದಾಳೆ.

ಸುಮಾರು 30 ಮಂದಿಯ ನೇತೃತ್ವದಲ್ಲಿ ಫ್ರಾನ್ಸಿಸ್‌ನನ್ನು ವರಿಸಿದ ಏಂಜೆಲಿನ್‌ ಮುಂದೊಂದು ದಿನ ತಂದೆ ತನ್ನ ತಪ್ಪನ್ನು ತಿದ್ದಿ ನಮ್ಮನ್ನು ಮತ್ತೆ ಮನೆಗೆ ಕರೆದುಕೊಳ್ಳಬಹುದು ಎಂದು ಅಭಿಪ್ರಾಯಪಟ್ಟಿದ್ದಾಳೆ.