ಅರ್ಧಕ್ಕೆ ಓಡಿಸಿದವರು ಮತ್ತೆ ಹುಡುಕಿಕೊಂಡು ಬಂದರು

ಫೇಸ್‌ಬುಕ್‌ ಸಂಸ್ಥಾಪಕ ಮಾರ್ಕ್‌ ಜುಕರ್ಬರ್ಗ್‌ ತಮ್ಮ ಪದವಿ ಶಿಕ್ಷಣವನ್ನು ಅರ್ಧಕ್ಕೆ ಮೊಟಕುಗೊಳಿಸಿದವರು. ಇದನ್ನು ಸ್ವತಃ ಜುಕರ್ಬರ್ಗ್‌ ಹಲವಾರು ಸಂದರ್ಭಗಳಲ್ಲಿ ಬಹಿರಂಗವಾಗಿ ಹೇಳಿಕೊಂಡಿದ್ದಾರೆ. ಆದರೆ ಈಗ 12 ವರ್ಷಗಳ ನಂತರ ಅದೇ ಪದವಿ ಅವರನ್ನು ಹುಡುಕಿಕೊಂಡು ಬಂದಿದೆ.

ಅರೇ, ಇದೇನಪ್ಪಾ ಜುಕರ್ಬರ್ಗ್‌ ಮತ್ತೆ ಪದವಿ ವ್ಯಾಸಂಗಕ್ಕೆ ಮುಂದಾಗಿದ್ದಾರಾ ಎಂಬ ಪ್ರಶ್ನೆ ಬರಬಹುದು. ಖಂಡಿತ ಇಲ್ಲ. ಫೇಸ್‌ಬುಕ್‌ ಸೈಟ್‌ನ್ನು ಹುಟ್ಟುಹಾಕಿ, ತಮ್ಮ ಎಲ್ಲ ಗಮನವನ್ನು ಫೇಸ್‌ಬುಕ್‌ ಕಡೆಗೆ ಹರಿಸಿ ವಿದ್ಯಾಭ್ಯಾಸವನ್ನು ನಿರ್ಲಕ್ಷಿಸಿದ ಜುಕರ್ಬರ್ಗ್‌ ಅವರನ್ನ ಹಾರ್ವರ್ಡ್‌ ವಿಶ್ವವಿದ್ಯಾಲಯ ಪದವಿಯ ಅರ್ಧದಲ್ಲೇ ಮನೆಗೆ ಕಳುಹಿಸಿತ್ತು. ಈಗ ಅದೇ ಹಾರ್ವರ್ಡ್‌ ವಿಶ್ವವಿದ್ಯಾಲಯ 12 ವರ್ಷಗಳ ನಂತರ ಮಾರ್ಕ್‌ ಜುಕರ್ಬರ್ಗ್‌ ಅವರಿಗೆ ಪದವಿ ಸಮಾರಂಭಕ್ಕೆ ಆಹ್ವಾನಿಸುವುದಲ್ಲದೇ ಪ್ರಮಾಣಪತ್ರವನ್ನೂ ನೀಡಲು ಮುಂದಾಗಿದೆ.

ತಮ್ಮ ಫೇಸ್‌ಬುಕ್‌ ಅಕೌಂಟ್‌ ಮೂಲಕ ಈ ಕುರಿತು ವಿಡಿಯೋ ಶೇರ್‌ ಮಾಡಿದ್ದಾರೆ ಮಾರ್ಕ್‌ ಜುಕರ್ಬರ್ಗ್‌. ಶೇರ್‌ ಮಾಡಿದ ವಿಡಿಯೋದಲ್ಲಿ ಮತ್ತೊಬ್ಬ ದಿಗ್ಗಜ ಬಿಲ್‌ ಗೇಟ್ಸ್‌ ಸಹ ಜುಕರ್ಬರ್ಗ್‌ ಜತೆ ಇದ್ದಾರೆ. ಮತ್ತೊಂದು ಕುತೂಹಲಕರ ಸಂಗತಿ ಎಂದರೆ ಖ್ಯಾತ ಉದ್ಯಮಿ ಬಿಲ್‌ ಗೇಟ್ಸ್‌ ಸಹ ಪದವಿಯನ್ನು ಅರ್ಧಕ್ಕೇ ಮೊಟಕುಗೊಳಿಸಿದವರು.



ಮೇ ತಿಂಗಳಲ್ಲಿ ನಡೆಯುವ ಹಾರ್ವರ್ಡ್‌ನ ಪದವಿ ಸಮಾರಂಭದಲ್ಲಿ ಮಾರ್ಕ್‌ ಜುಕರ್ಬರ್ಗ್‌ ಪಾಲ್ಗೊಳ್ಳಲಿದ್ದಾರೆ. ಅಷ್ಟೇ ಅಲ್ಲದೆ ಆರಂಭಿಕ ಭಾಷಣವನ್ನೂ ಮಾಡಲಿದ್ದಾರೆ. 2004ರ ಆಸುಪಾಸಿನಲ್ಲಿ ಮಾರ್ಕ್‌ ಜುಕರ್ಬರ್ಗ್‌ ಫೇಸ್‌ಬುಕ್‌ ಎಂಬ ಸಾಮಾಜಿಕ ಜಾಲತಾಣವನ್ನು ಹುಟ್ಟುಹಾಕಿದ್ದರು. ಇದೀಗ ಅದೇ ಫೇಸ್‌ಬುಕ್‌ 2 ಬಿಲಿಯನ್‌ಗೂ ಅಧಿಕ ಬಳಕೆದಾರರನ್ನು ಹೊಂದಿದೆ.