ವಸುಧೆಗೆ ಸಮೀಪದಲ್ಲಿರಲಿದ್ದಾನೆ ಅಂಗಾರಕ: ಶುಚಿಯಾಗಿದೆ ಖಗೋಳಪ್ರಿಯರ ಕನ್ನಡಕ!

ವಾಷಿಂಗ್ಟನ್: ಖಗೋಳಪ್ರಿಯರ ಅತ್ಯಂತ ನೆಚ್ಚಿನ ಗ್ರಹಗಳಲ್ಲಿ ಮಂಗಳ ಗ್ರಹಕ್ಕೆ ಪ್ರಥಮ ಸ್ಥಾನ. ರಾತ್ರಿ ಆಕಾಶದಲ್ಲಿ ಕೆಂಪು ಬಣ್ಣದ ಈ ಉಂಡೆಯನ್ನು ನೋಡುವುದು ಎಂದರೆ ಖಗೋಳಪ್ರಿಯರಿಗೆ ಎಲ್ಲಿಲ್ಲದ ಖುಷಿ.

ಭೂಮಿಯ ಸಮೀಪದ ಈ ಕೆಂಪು ಗ್ರಹದಲ್ಲಿ ಏನುಂಟು, ಏನಿಲ್ಲ ಎಂಬುದನ್ನು ಅರಿಯಲು ಅನಾದಿ ಕಾಲದಿಂದಲೂ ಮಾನವ ಪ್ರಯತ್ನ ನಡೆಸುತ್ತಲೇ ಇದ್ದಾನೆ.

ವಿಜ್ಞಾನ ಬೆಳೆದಂತೆಲ್ಲಾ ತಂತ್ರಜ್ಞಾನದ ಸಹಾಯದಿಂದ ಮಾನವ ಅಂಗಾರಕನ ಒಡಲು ಬಗೆಯುವಲ್ಲಿ ಬಹುತೇಕವಾಗಿ ಯಶಸ್ವಿಯಾಗಿದ್ದಾನೆ. ಹತ್ತು ಹಲವು ಬಾಹ್ಯಾಕಾಶ ನೌಕೆಗಳು ಅಂಗಾರಕನ ನೆಲಕ್ಕೆ ಈಗಾಗಲೇ ಮುತ್ತಿಕ್ಕಿವೆ. ಜಗತ್ತಿನ ಪ್ರಬಲ ರಾಷ್ಟ್ರಗಳ 'ಮಂಗಳಯಾನ' ಭವಿಷ್ಯದಲ್ಲಿ ಮತ್ತಷ್ಡು ವೇಗವನ್ನೂ ಪಡೆಯಲಿದೆ.

ಮಂಗಳನಲ್ಲಿ ಉಪ್ಪುನೀರಿನ ಸರೋವರಗಳ ಜಾಡು ಹಿಡಿದ ಸಂಶೋಧಕರು!

ಇದೆಲ್ಲದರ ಮಧ್ಯೆ ಖಗೋಳಪ್ರಿಯರಿಗೆ ಖುದ್ದು ಅಂಗಾರಕನೇ ಸಿಹಿ ಸುದ್ದಿಯನ್ನು ಹೊತ್ತು ಬಂದಿದ್ದಾನೆ. ಮಂಗಳ ಗ್ರಹದಿಂದ ಬಂದಿರುವ ಈ ಸುದ್ದಿಯಾದರೂ ಏನು ಎಂಬ ಕುತೂಹಲ ನಿಮಗೂ ಇದೆಯೇ?.

ಅ.06ರಿಂದ ಅ.13ರವರೆಗೆ ಮಂಗಳ ಗ್ರಹ ಭೂಮಿಗೆ ಅತ್ಯಂತ ಸಮೀಪದಲ್ಲಿರಲಿದ್ದು. ಈ ಅವಧಿಯಲ್ಲಿ ಮಂಗಳ ಗ್ರಹ ಭೂಮಿಯಿಂದ ಕೇವಲ 38.6 ಮಿಲಿಯನ್ ಮೈಲಿ(62.7 ಮಿಲಿಯನ್ ಕಿ.ಮೀ) ದೂರದಲ್ಲಿರಲಿದೆ.

ಅಕ್ಟೋಬರ್ 6ರಿಂದಲೇ ಭೂಮಿಗೆ ಸಮೀಪ ಬಂದಿರುವ ಮಂಗಳ ಗ್ರಹ, ಅಕ್ಟೋಬರ್ 13ರಂದು ಅತ್ಯಂತ ಸಮೀಪಕ್ಕೆ ಬರಲಿದೆ. ಮಂಗಳ ಗ್ರಹ ಮತ್ತೆ ಭೂಮಿಗೆ ಇಷ್ಟು ಸಮೀಪ ಬರಲು 2035ರವೆರೆಗೆ ಕಾಯಬೇಕು.


ಈ ಕುರಿತು ಮಾಹಿತಿ ನೀಡಿರುವ ನಾಸಾ, ಭೂಮಿಯ ದಕ್ಷಿಣ ಭಾಗದ ರಾತ್ರಿ ಆಕಾಶದಲ್ಲಿ ಮಂಗಳ ಗ್ರಹ ಅತ್ಯಂತ ಸ್ಪಷ್ಟವಾಗಿ ಗೋಚರವಾಗಲಿದೆ ಎಂದು ಸ್ಪಷ್ಟಪಡಿಸಿದೆ.

ಖಗೋಳಾಸ್ತಕರಿಗೆ ಕಚಗುಳಿಯ ಸುದ್ದಿ, ಅ.13ರಂದು ಭೂಮಿಗೆ ಸಮೀಪ ಬರಲಿದೆ ಮಂಗಳ ಗ್ರಹ

ಆದರೆ ಈ ಅಕ್ಟೋಬರ್ ತಿಂಗಳಲ್ಲಿ ಮಾತ್ರ ಮಂಗಳ ಗ್ರಹ ಅತ್ಯಂತ ಸ್ಪಷ್ಟವಾಗಿ ಕಾಣಲಿದೆ. ಕಾರಣ ಅಕ್ಟೋಬರ್ ನಂತರ ಮಂಗಳ ಮತ್ತು ಭೂಮಿಯು ಸೂರ್ಯನ ಸುತ್ತ ತಮ್ಮ ತಮ್ಮ ಕಕ್ಷೆಗಳಲ್ಲಿ ಪರಸ್ಪರ ದೂರ ಸರಿಯಲಿವೆ.

ಕಳೆದ ಬಾರಿ 2018ರಲ್ಲಿ ಮಂಗಳ ಗ್ರಹ ಭೂಮಿಗೆ ಅತ್ಯಂತ ಸಮೀಪಕ್ಕೆ ಬಂದಿತ್ತು. ಆದರೆ 2003ರಲ್ಲಿ ಮಂಗಳ ಗ್ರಹ ಭೂಮಿಗೆ ಐತಿಹಾಸಿಕವಾಗಿ ಸಮೀಪಕ್ಕೆ ಬಂದಿತ್ತು. 2003ರಲ್ಲಿ 55,758,006 ಕೀ.ಮಿ (34,646,418 ಮೈಲು) ಹತ್ತಿರಕ್ಕೆ ಬಂದಿತ್ತು.

ಅದರಂತೆ ಮುಂದಿನ 2022ರಲ್ಲಿ ಮಂಗಳ ಗ್ರಹ ಮತ್ತೆ ಭೂಮಿಗೆ ಹತ್ತಿರ ಬರಲಿದೆ. ಈ ವೇಳೆ ಮಂಗಳ ಗ್ರಹ ಮತ್ತು ಭೂಮಿಯ ಅಂತರ ಕೇವಲ 38.6 ಮಿಲಿಯನ್ ಮೈಲು (62.7 ಮಿಲಿಯನ್ ಕಿ.ಮೀ.) ಇರಲಿದೆ ಎಂದು ನಾಸಾ ಹೇಳಿದೆ.

ಜೀವಿಗಳ ಹುಡುಕಾಟಕ್ಕೆ ನಾಸಾದಿಂದ ಐತಿಹಾಸಿಕ ಮಂಗಳಯಾನ, ಅಂಗಾರಕನ ಅಂಗಳದಲ್ಲಿ ಹಾರಲಿದೆ ಹೆಲಿಕಾಪ್ಟರ್!

ಇನ್ನು ನಾಸಾ ಮಂಗಳ ಗ್ರಹ ಕುರಿತಾದ ತನ್ನ ಸಂಶೋಧನೆಗಳನ್ನು ಹೆಚ್ಚಿಸಲಿದೆ. ಅಲ್ಲದೇ ಮಂಗಳ ಗ್ರಹಕ್ಕೆ ಮಾನವರನ್ನೂ ಕಳುಹಿಸುವ ತನ್ನ ಯೋಜನೆಯನ್ನು ಕಾರ್ಯಗತಗೊಳಸಲು ನಾಸಾ ಸಜ್ಜಾಗಿದೆ.