ಬ್ರೆಕ್ಸಿಟ್‌ಗೆ ಅನುಮೋದನೆ ನೀಡದೇ ಇದ್ದರೆ ಭಾರಿ ಪರಿಣಾಮ: ಸಂಸದರಿಗೆ ಮೇ ಎಚ್ಚರಿಕೆ

ಲಂಡನ್‌: ಐರೋಪ್ಯ ಒಕ್ಕೂಟದಿಂದ ಬ್ರಿಟನ್‌ ಹೊರಬರುವ ಬ್ರೆಕ್ಸಿಟ್‌ ಒಪ್ಪಂದದ ವಿರುದ್ಧ ಮತ ಚಲಾಯಿಸಲು ನಿರ್ಧರಿಸಿರುವ ಸಂಸದರಿಗೆ ಎಚ್ಚರಿಕೆ ನೀಡಿರುವ ಬ್ರಿಟನ್‌ ಪ್ರಧಾನಿ ಥೆರಾಸಾ ಮೇ, ''ಒಂದು ವೇಳೆ ಬ್ರೆಕ್ಸಿಟ್‌ ಒಪ್ಪಂದಕ್ಕೆ ಸಂಸತ್‌ನಲ್ಲಿ ಅನುಮೋದನೆ ದೊರೆಯದಿದ್ದರೆ ಅದು ನಮ್ಮ ಪ್ರಜಾಪ್ರಭುತ್ವದ ದೊಡ್ಡ ದುರಂತ ಮತ್ತು ಕ್ಷಮಿಸಲಾಗದ ನಂಬಿಕೆ ದ್ರೋಹ ಆಗಲಿದೆ,'' ಎಂದು ಹೇಳಿದ್ದಾರೆ.

ಬ್ರಿಟನ್‌ ಸಂಸತ್‌ನಲ್ಲಿ ಬ್ರೆಕ್ಸಿಟ್‌ ಒಪ್ಪಂದದ ಕುರಿತಾದ ವಿಧೇಯಕವನ್ನು ಮಂಗಳವಾರ ಮತಕ್ಕೆ ಹಾಕಲಾಗುತ್ತದೆ. ಒಪ್ಪಂದದ ಪರವಾಗಿ ಸಂಸದರಲ್ಲಿ ಒಮ್ಮತ ಮೂಡಿಸಲು ಮೇ ಕಳೆದ 18 ತಿಂಗಳಿನಿಂದ ಪ್ರಯತ್ನಿಸುತ್ತಿದ್ದು, ಹಲವು ಸುತ್ತಿನ ಮಾತುಕತೆ ನಡೆಸಿದ್ದಾರೆ. ''ಬ್ರಿಟನ್‌ ಸಂಸದರಿಗೆ ನನ್ನ ವಿನಂತಿ. ಬೇರೆ ಎಲ್ಲವನ್ನೂ ಮರೆತು, ದೇಶಕ್ಕೆ ಯಾವುದು ಸೂಕ್ತವೋ ಆ ನಿರ್ಧಾರವನ್ನು ತೆಗೆದುಕೊಳ್ಳೊಣ,'' ಎಂದು ಮೇ ಕರೆ ನೀಡಿದ್ದಾರೆ.

ಐರೋಪ್ಯ ಒಕ್ಕೂಟದಿಂದ ಬ್ರಿಟನ್‌ ಹೊರಬರುವ ತೀರ್ಮಾನವನ್ನು ಕಳೆದ ವರ್ಷ ಮಾರ್ಚ್‌ 29ರಂದು ತೆಗೆದುಕೊಳ್ಳಲಾಗಿದೆ. ಆದರೆ ಇದಕ್ಕೆ ಬ್ರಿಟನ್‌ ಸಂಸತ್ತು ಇದುವರೆಗೂ ಅಂಗೀಕಾರದ ಮುದ್ರೆ ಒತ್ತಿಲ್ಲ. ಮೇ ಅವರ ಕನ್ಸರ್‌ವೇಟಿವ್‌ ಪಕ್ಷದ ಕೆಲವು ಸಂಸದರು ಹಾಗೂ ಪ್ರತಿಪಕ್ಷ ಲೇಬರ್‌ ಪಾರ್ಟಿಯ ಸಂಸದರು ಒಪ್ಪಂದ ವಿರೋಧಿಸುತ್ತಿದ್ದಾರೆ. ಕಳೆದ ಡಿಸೆಂಬರ್‌ನಲ್ಲಿಯೇ ಈ ವಿಧೇಯಕವನ್ನು ಮತಕ್ಕೆ ಹಾಕಬೇಕಿತ್ತು. ಸೋಲಾಗುವ ಭೀತಿಯಿಂದ ಮೇ ಅದನ್ನು ಮುಂದಕ್ಕೆ ಹಾಕಿದ್ದರು. ಒಂದೊಮ್ಮೆ ಸಂಸತ್ತಿನ ಅಂಗೀಕಾರ ಸಿಗದೇ ಹೋದಲ್ಲಿ ಪ್ರಧಾನಿ ಪರ್ಯಾಯ ಕಾರ್ಯತಂತ್ರಗಳ ಬಗ್ಗೆ ಯೋಚಿಸಬೇಕಾಗುತ್ತದೆ.