ಚುನಾವಣೆ ಸೋಲಿನ ಬಳಿಕ ಟ್ರಂಪ್‌ಗೆ ಮತ್ತೊಂದು ಶಾಕ್‌?: ವಿಚ್ಛೇದನಕ್ಕೆ ಪತ್ನಿ ಮೆಲಾನಿಯಾ ಟ್ರಂಪ್ ಸಿದ್ಧತೆ‌?

ವಾಷಿಂಗ್ಟನ್‌: ಸೋಲಿನ ಆಘಾತದಲ್ಲಿರುವ ನಿರ್ಗಮಿತ ಅಮೆರಿಕ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌ ಅವರಿಗೆ ಪತ್ನಿ ಮೆಲಾನಿಯಾ ಟ್ರಂಪ್‌ ವಿಚ್ಛೇದನ ನೀಡಲು ತುದಿಗಾಲಲ್ಲಿ ನಿಂತಿರುವ ಸುದ್ದಿಗಳು ಹರಿದಾಡತೊಡಗಿವೆ. ಶ್ವೇತಭವನದಲ್ಲಿ ನಾಲ್ಕು ವರ್ಷ 'ಫಸ್ಟ್‌ ಲೇಡಿಯಾಗಿ ಮಿಂಚಿದ ಮೆಲಾನಿಯಾ ಅವರು ಟ್ರಂಪ್‌ ಅವರ ಒರಟು ವರ್ತನೆಯಿಂದ ಬೇಸತ್ತಿದ್ದು, ಶ್ವೇತಭವನದಿಂದ ನಿರ್ಗಮಿಸಿದ ಬಳಿಕ ಪ್ರತ್ಯೇಕವಾಗಿ ಬದುಕಲು ನಿರ್ಧರಿಸಿದ್ದಾರೆ ಎಂದು ಶ್ವೇತಭವನದಲ್ಲಿ ಟ್ರಂಪ್‌ ಅಧಿಕಾರ ಅವಧಿಯಲ್ಲಿದ್ದ ಮೂಲಗಳನ್ನು ಉಲ್ಲೇಖಿಸಿ ಮಾಧ್ಯಮಗಳು ವರದಿ ಮಾಡಿವೆ.

''15 ವರ್ಷ ಟ್ರಂಪ್‌ ಜತೆ ಬದುಕು ಸವೆಸಿದ್ದು ಸಾಕಾಗಿದೆ ಎಂಬುದಾಗಿ ಖಾಸಗಿ ಮಾತುಕತೆಯಲ್ಲಿ ಮೆಲಾನಿಯಾ ಹೇಳಿಕೊಂಡಿದ್ದಾರೆ. ಒಂದೂವರೆ ವರ್ಷ ಹಿಂದೆಯೇ ಅವರ ಸಂಬಂಧದಲ್ಲಿ ಬಿರುಕು ಕಾಣಿಸಿಕೊಂಡಿದೆ. ಆರು ತಿಂಗಳ ಹಿಂದೆಯೇ ಟ್ರಂಪ್‌ಗೆ ಗುಡ್‌ ಬೈ ಹೇಳಿ ನಿರ್ಗಮಿಸಲು ಮೆಲಾನಿಯಾ ಮುಂದಾಗಿದ್ದರು.

ಆದರೆ, ಅಧ್ಯಕ್ಷಗಿರಿಯಲ್ಲಿದ್ದ ಅವರು ಅವಮಾನ ಸಹಿಸದೇ ಪ್ರಯೋಗಿಸಬಹುದಾದ ದಂಡನಾ ಕ್ರಮಕ್ಕೆ ಬೆದರಿ ಇದುವರೆಗೆ ಸುಮ್ಮನಿದ್ದರು. ಈ ಚುನಾವಣೆ ಪ್ರಚಾರ ಸಂದರ್ಭದಲ್ಲಿ ಎಲ್ಲಿಯೂ ಕಾಣಿಸಿಕೊಳ್ಳದೇ ತೆರೆಮರೆಗೆ ಸರಿದಿದ್ದರು,'' ಎಂದು ಇಂಗ್ಲೆಂಡಿನ 'ಡೈಲಿ ಮೇಲ್‌' ವರದಿ ಮಾಡಿದೆ. 2005ರಲ್ಲಿ ಮದುವೆಯಾಗಿದ್ದ ಟ್ರಂಪ್‌-ಮೆಲಾನಿಯಾ ದಂಪತಿಗೆ ಒಬ್ಬ ಮಗ (ಬ್ಯಾರನ್‌ ಟ್ರಂಪ್‌) ಜನಿಸಿದ್ದಾನೆ. ಮೊದಲ ಪತ್ನಿ ಇವಾನಾ ಟ್ರಂಪ್‌ ಅವರಿಗೆ ಡೊನಾಲ್ಡ್‌ ಟ್ರಂಪ್‌ ಜ್ಯೂನಿಯರ್‌ ಮತ್ತು ಇವಾಂಕಾ ಟ್ರಂಪ್‌ ಇಬ್ಬರು ಮಕ್ಕಳಿದ್ದಾರೆ.

ಭಾರತ-ಅಮೆರಿಕದ್ದು ಈ ಶತಮಾನದ ಮಾದರಿ ಬಾಂಧವ್ಯ..! ನಿಯೋಜಿತ ಅಧ್ಯಕ್ಷ ಜೋ ಬಿಡೆನ್‌ ವಿಶ್ವಾಸ

ಮುಂದಿನ ಹಾದಿ ಏನು?
ಅಧ್ಯಕ್ಷ ಪದವಿಯಿಂದ ನಿರ್ಗಮಿಸಿದ ಬಳಿಕ ಡೊನಾಲ್ಡ್‌ ಟ್ರಂಪ್‌ ಅವರ ಮುಂದಿನ ನಡೆ ಏನು ಎನ್ನುವ ಕುತೂಹಲದ ಚರ್ಚೆ ಅಮೆರಿಕದಲ್ಲಿಆರಂಭವಾಗಿದೆ. ಟ್ರಂಪ್‌ ಉದ್ಯಮದತ್ತ ಹೆಚ್ಚಿನ ಗಮನ ಹರಿಸಬಹುದು ಎಂದು ಕೆಲವರು ಹೇಳತೊಡಗಿದ್ದರೆ, 2024ರ ಚುನಾವಣೆಯಲ್ಲಿ ಮತ್ತೊಮ್ಮೆ ಅದೃಷ್ಟ ಪರೀಕ್ಷೆಗೆ ಮುಂದಾಗಬಹುದು ಎಂದು ರಿಪಬ್ಲಿಕನ್‌ ಪಕ್ಷದಲ್ಲಿನ ಟ್ರಂಪ್‌ ಬೆಂಬಲಿಗರು ಹೇಳುತ್ತಿದ್ದಾರೆ.