ಕ್ಷಿಪಣಿ ರವಾನಿಸಿದ ಉತ್ತರ ಕೊರಿಯ: ಯುದ್ಧ ಸಿದ್ಧತೆ?

ಸಿಯೋಲ್‌: ಉತ್ತರ ಕೊರಿಯಾದ ರಕ್ಷಣಾ ಸಂಶೋಧನಾ ಕೇಂದ್ರಗಳಲ್ಲಿದ್ದ ಕ್ಷಿಪಣಿಗಳನ್ನು ಬೇರೆಡೆಗೆ ರವಾನೆ ಮಾಡಲಾಗುತ್ತಿದೆ ಎಂದು ದಕ್ಷಿಣ ಕೊರಿಯಾದ ಕೊರಿಯನ್‌ ಬ್ರಾಡ್‌ಕಾಸ್ಟಿಂಗ್‌ ಸಿಸ್ಟಮ್‌(ಕೆಬಿಎಸ್‌) ಶುಕ್ರವಾರ ಮಾಡಿದ್ದ ವರದಿ ಉತ್ತರ ಕೊರಿಯಾ ಮತ್ತೊಂದು ಯುದ್ಧಕ್ಕೆ ಸಿದ್ಧತೆ ನಡೆಸಿದೆ ಎಂಬ ಊಹಾಪೋಹ ಸೃಷ್ಟಿಗೆ ಕಾರಣವಾಗಿದೆ.

ವರದಿಗಳ ಪ್ರಕಾರ, ದಕ್ಷಿಣ ಕೊರಿಯಾ ಹಾಗೂ ಅಮೆರಿಕ ಗುಪ್ತಚರ ಇಲಾಖೆಗಳ ಅಧಿಕಾರಿಗಳು ಉತ್ತರ ಕೊರಿಯಾದ ರಕ್ಷಣಾ ಸಂಶೋಧನಾ ಕೇಂದ್ರಗಳಲ್ಲಿದ್ದ ಕ್ಷಿಪಣಿಗಳನ್ನು ಬೇರೆಡೆಗೆ ಸಾಗಿಸುವುದನ್ನು ಪತ್ತೆ ಹಚ್ಚಿದ್ದಾರೆ. ಆದರೆ ವರದಿಯಲ್ಲಿ ಈ ಘಟನೆ ಎಂದು ಮತ್ತು ಯಾವಾಗ ನಡೆಯಿತೆಂಬುದರ ಕುರಿತು ಮಾಹಿತಿಯಿಲ್ಲ.

ಸನಮ್-ಡಾಂಗ್‌ನಲ್ಲಿರುವ ಕ್ಷಿಪಣಿ ಕೇಂದ್ರದಲ್ಲಿ ತಯಾರಾಗುವ ಹೆಚ್ಚಿನ ಕ್ಷಿಪಣಿಗಳು ಖಂಡಾಂತರ ಕ್ಷಿಪಣಿಗಳಾಗಿದ್ದು, ಸಾಗಾಟಗೊಂಡ ಕ್ಷಿಪಣಿಗಳು ಹ್ವಾಸಾಂಗ್ -12 ಅಥವಾ ಖಂಡಾಂತರ ಹ್ವಾಸಾಂಗ್ -14 ಕ್ಷಿಪಣಿಯಾಗಿರಬಹುದು ಎಂದು ಊಹಿಸಲಾಗಿದೆ.

ಈ ಹಿಂದೆ ಅಮೆರಿಕಕ್ಕೆ ಎಚ್ಚರಿಕೆ ನೀಡಿದ್ದ ಉತ್ತರ ಕೊರಿಯಾ ತನ್ನ ರಕ್ಷಣಾ ಸಂಶೋಧನಾ ಕೇಂದ್ರಗಳಲ್ಲಿದ್ದ ಅತ್ಯಾಧುನಿಕ ಕ್ಷಿಪಣಿಗಳನ್ನು ರವಾನೆ ಮಾಡುತ್ತಿದೆ ಎಂದು ದಕ್ಷಿಣ ಕೊರಿಯಾದ ಗುಪ್ತಚರ ಇಲಾಖೆ ಮಾಹಿತಿ ನೀಡಿದೆ.

ಉತ್ತರ ಕೊರಿಯಾದ ಅಣ್ವಸ್ತ್ರ ಪರೀಕ್ಷೆಯನ್ನು ಖಂಡಿಸಿದ್ದ ಅಮೆರಿಕ, ಕೆಲದಿನಗಳ ಹಿಂದೆ ದಕ್ಷಿಣ ಕೊರಿಯಾದ ವಾಯುಪಡೆಯೊಂದಿಗೆ ರಕ್ಷಣ ತರಬೇತಿ ಅಭ್ಯಾಸ ನಡೆಸಿತ್ತು.ಈ ವೇಳೆ ಉತ್ತರ ಕೊರಿಯಾ ಗಡಿಯಲ್ಲಿ ತನ್ನ ಬಾಂಬರ್‌ಜೆಟ್‌ಗಳ ಹಾರಾಟ ನಡೆಸಿತ್ತು.

ಆದರೆ ಈ ಆರೋಪಗಳಿಗೆ ಸಂಬಂಧಿಸಿದಂತೆ ಉತ್ತರ ಕೊರಿಯಾ ಸರ್ಕಾರ ಯಾವುದೇ ರೀತಿಯ ಸ್ಪಷ್ಟನೆ ನೀಡಿಲ್ಲ. ಅಲ್ಲದೆ ಈ ವರದಿಗಳು ತನ್ನ ಗಮನಕ್ಕೆ ಬಂದಿಲ್ಲ ಎಂದು ಜಾರಿಕೊಳ್ಳುವ ಪ್ರಯತ್ನ ಮಾಡುತ್ತಿದೆ.