ಮೋದಿ ವಿಶ್ವದ ಅತ್ಯಂತ ಪ್ರಭಾವಿ ನಾಯಕ

ಲಂಡನ್‌: ಬಿಜೆಪಿಯ ಪ್ರಚಂಡ ಬಹುಮತದೊಂದಿಗೆ ಸತತ ಎರಡನೇ ಅವಧಿಗೆ ಪ್ರಧಾನಿಯಾದ ನರೇಂದ್ರ ಮೋದಿ ಅವರು 2019ನೇ ಸಾಲಿನ ವಿಶ್ವದ ಅತ್ಯಂತ ಪ್ರಭಾವಿ ನಾಯಕರಾಗಿ ಹೊರಹೊಮ್ಮಿದ್ದಾರೆ.

'ಬ್ರಿಟಿಷ್‌ ಹೆರಾಲ್ಡ್‌ ' ನಿಯತಕಾಲಿಕೆ ನಡೆಸಿದ ವಿಶ್ವದ ಅತ್ಯಂತ ಪ್ರಭಾವಿ ನಾಯಕರ ಸಮೀಕ್ಷೆಯಲ್ಲಿ ಮೋದಿ ಅವರು, ರಷ್ಯಾ ಅಧ್ಯಕ್ಷ ವ್ಲಾಡಿಮಿರ್‌ ಪುಟಿನ್‌, ಅಮೆರಿಕ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌ ಹಾಗೂ ಚೀನಾ ಅಧ್ಯಕ್ಷ ಕ್ಸಿ ಜಿನ್‌ಪಿಂಗ್‌ ಸೇರಿದಂತೆ 25 ವಿಶ್ವ ನಾಯಕರನ್ನು ಹಿಮ್ಮೆಟ್ಟಿ ಜಗತ್ತಿನ ಅತಿ ಪ್ರಭಾವಿ ನಾಯಕ ಎಂಬ ಸ್ಥಾನಗಳಿಸಿದ್ದಾರೆ. ಬ್ರಿಟಿಷ್‌ ಹೆರಾಲ್ಡ್‌ ಪತ್ರಿಕೆ ನಡೆಸಿದ ಓದುಗರ ಸಮೀಕ್ಷೆಯಲ್ಲಿ ಮೋದಿ ಅವರಿಗೆ ಶೇಕಡ 30.9ರಷ್ಟು ಮತಗಳು ಬಂದಿವೆ.

ಸಮೀಕ್ಷೆಯಲ್ಲಿ ಪಾಲ್ಗೊಂಡಿದ್ದ ಓದುಗರು 'ಒನ್‌ ಟೈಮ್‌ ಪಾಸ್‌ವರ್ಡ್‌' ಬಳಸಿ, ನಾಯಕರ ಆಡಳಿತ ವೈಖರಿ, ವಿದೇಶಿ ನೀತಿ ಅನುಸರಣೆ ಸೇರಿ ಇತ್ಯಾದಿ ಅಂಶಗಳನ್ನು ಮಾನದಂಡವಾಗಿರಿಸಿಕೊಂಡು ತಮ್ಮ ನೆಚ್ಚಿನ ನಾಯಕನಿಗೆ ಮತ ಚಲಾಯಿಸಿದ್ದರು. ಮೋದಿ ವಿಶ್ವ ನಾಯಕರಾಗಿ ಹೊರಹೊಮ್ಮಿರುವುದರ ಕುರಿತು ನಿಯತಕಾಲಿಕೆ ಜುಲೈ 15ರ ಸಂಚಿಕೆಯಲ್ಲಿ ಮುಖಪುಟದಲ್ಲಿ ವರದಿ ಪ್ರಕಟಿಸುವುದಾಗಿ ಹೇಳಿದೆ. ಸುಮಾರು 25 ಲಕ್ಷ ಜನ ಮತ ಚಲಾಯಿಸಿದ್ದಾರೆ.

ಆಯುಷ್ಮಾನ್‌ ಭಾರತ್‌, ಉಜ್ವಲಾ ಯೋಜನೆ, ಸ್ವಚ್ಛ ಭಾರತ್‌ ಯೋಜನೆಗಳ ಜತೆಗೆ ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಅವರ ಕಾರ್ಯವೈಖರಿ ಸಮೀಕ್ಷೆಯಲ್ಲಿ ಪಾಲ್ಗೊಂಡಿದ್ದ ಓದುಗರನ್ನು ಬಲವಾಗಿ ಪ್ರಭಾವಿಸಿದೆ ಎಂದೂ ಪತ್ರಿಕೆ ಹೇಳಿದೆ.

ಯಾರಿಗೆ ಎಷ್ಟು ಮತ

ನರೇಂದ್ರ ಮೋದಿ 30.9%

ವ್ಲಾಡಿಮಿರ್‌ ಪುಟಿನ್‌ 29.9%

ಡೊನಾಲ್ಡ್‌ ಟ್ರಂಪ್‌ 21.9%

ಕ್ಸಿ ಜಿನ್‌ಪಿಂಗ್‌ 18.1%

ಪ್ರಧಾನಿಗೆ ಸಂದ ಪ್ರಮುಖ ವಿದೇಶಿ ಪುರಸ್ಕಾರಗಳು

1. ಜಾಯೇದ್‌ ಮೆಡಲ್‌ ಆಫ್‌ ಯುಎಇ (ಯುಎಇ)

2. ಸೋಲ್‌ ಶಾಂತಿ ಪ್ರಶಸ್ತಿ 2018 (ದಕ್ಷಿಣ ಕೊರಿಯಾ)

3. ಯುಎನ್‌ ಚಾಂಪಿಯನ್ಸ್‌ ಆಫ್‌ ಅರ್ಥ್‌ ಅವಾರ್ಡ್‌ 2018 (ವಿಶ್ವಸಂಸ್ಥೆ)

4. ಗ್ರ್ಯಾಂಡ್‌ ಕಾಲರ್‌ ಆಫ್‌ ದಿ ಸ್ಟೇಟ್‌ ಪ್ಯಾಲೆಸ್ತೀನ್‌ (ಪ್ಯಾಲೆಸ್ತೀನ್‌)

5. ಅಮೀರ್‌ ಅಬ್ದುಲ್ಲಾ ಖಾನ್‌ ಅವಾರ್ಡ್‌ ಆಫ್‌ ಅಫಘಾನಿಸ್ತಾನ್‌ (ಅಫಘಾನಿಸ್ತಾನ)

6. ಕಿಂಗ್‌ ಅಬ್ದುಲ್ಲಾಜೀಜ್‌ ಸಾಶ್‌ ಅವಾರ್ಡ್‌ ಆಫ್‌ ಸೌದಿ ಅರೇಬಿಯಾ (ಸೌದಿ ಅರೇಬಿಯಾ)

7. ಆರ್ಡರ್‌ ಆಫ್‌ ಸೇಂಟ್‌ ಆ್ಯಂಡ್ರೂ ದಿ ಅಪೋಸ್ಟೆಲ್‌ (ರಷ್ಯಾ)