ತಿಂಗಳಾಂತ್ಯಕ್ಕೆ ಮೋದಿ-ಷರೀಫ್ ಭೇಟಿ?

ವಾಷಿಂಗ್ಟನ್: ಅಮೆರಿಕದಲ್ಲಿ ಮಾರ್ಚ್ 31ರಿಂದ ಆರಂಭವಾಗಲಿರುವ ‘ಪರಮಾಣು ಭದ್ರತಾ ಶೃಂಗಸಭೆಯ’ ವೇಳೆ, ಪಾಕ್ ಪಿಎಂ ನವಾಜ್ ಷರೀಫ್ ಅವರು ಪ್ರಧಾನಿ ನರೇಂದ್ರ ಮೋದಿಯವರನ್ನು ಭೇಟಿ ಮಾಡುವ ಸಾಧ್ಯತೆಯಿದೆ.

‘‘ಶೃಂಗಸಭೆಯ ನೇಪಥ್ಯದಲ್ಲಿ ಉಭಯ ನಾಯಕರೂ ಭೇಟಿ ಮಾಡುವ ಸಾಧ್ಯತೆ ಇದೆ. ಅವರಿಬ್ಬರೂ ಪರಸ್ಪರ ಚರ್ಚೆ ನಡೆಸುವ ಸಂಭವವೂ ಇದೆ. ಆದರೆ, ಪೂರ್ವ ನಿಗದಿತ ಸಮಾಲೋಚನೆ ಬಗ್ಗೆ ಖಾತರಿಪಡಿಸಲು ಸಾಧ್ಯವಿಲ್ಲ. ಪರಿಸ್ಥಿತಿಗಳನ್ನು ಆಧರಿಸಿ ಅದು ತೀರ್ಮಾನವಾಗಲಿದೆ,’’ ಎಂದು ಪಾಕ್ ಪ್ರಧಾನಿಯ ಭದ್ರತಾ ಸಲಹೆಗಾರ ಸರ್ತಾಜ್ ಅಜೀಜ್ ಹೇಳಿದ್ದಾರೆ.

ಪ್ರಸ್ತುತ ಅಜೀಜ್ ಅವರು 6ನೇ ‘ಅಮೆರಿಕ-ಪಾಕ್ ರಕ್ಷಣಾ ಮಾತುಕತೆ’ಯಲ್ಲಿ ವಾಷಿಂಗ್ಟನ್ ಪ್ರವಾಸದಲ್ಲಿದ್ದಾರೆ.

ಒಬಾಮಾ ಅವರ ಆಹ್ವಾನದ ಮೇರೆಗೆ ಪಾಕ್ ಪ್ರಧಾನಿ ಷರೀಫ್ ಮಾರ್ಚ್ 31 ಹಾಗೂ ಏಪ್ರಿಲ್ 1ರಂದು ನಡೆಯಲಿರುವ ‘ಪರಮಾಣು ಭದ್ರತಾ ಶೃಂಗಸಭೆ’ಯಲ್ಲಿ ಭಾಗವಹಿಸಲಿದ್ದಾರೆ.

ಈ ಶೃಂಗಸಭೆಗೆ ಭಾರತದ ಪ್ರಧಾನಿ ಮೋದಿ ಅವರಿಗೂ ಆಹ್ವಾನ ನೀಡಲಾಗಿದ್ದು, ಇನ್ನೂ ಅಧಿಕೃತ ಪ್ರಕಟಣೆ ಹೊರಬೀಳಬೇಕಿದೆ.