ಮೊಜಾಂಬಿಕ್‌ನಲ್ಲಿ ಸಿಕ್ಕ ಭಗ್ನಾವಶೇಷ ಎಂಎಚ್ 370ಯದ್ದೇ

ಸಿಡ್ನಿ: ಪೂರ್ವ ಮೊಜಾಂಬಿಕ್‌ನಲ್ಲಿರುವ ಹಿಂದೂ ಮಹಾ ಸಾಗರದ ದ್ವೀಪದ ತೀರವೊಂದರಲ್ಲಿ ದೊರೆತ ಭಗ್ನಾವಶೇಷಗಳು ಎರಡು ವರ್ಷಗಳ ಹಿಂದೆ ನಿಗೂಢವಾಗಿ ಕಾಣೆಯಾದ ಎಂಎಚ್ 370 ವಿಮಾನದ್ದೇ ಎಂಬುದು ಬಹುತೇಕ ಖಚಿತ ಎಂದು ಆಸ್ಟ್ರೇಲಿಯಾ ಹಾಗೂ ಮಲೇಷ್ಯಾ ಗುರುವಾರ ಹೇಳಿಕೆ ನೀಡಿವೆ. ಅಲ್ಲಿಗೆ ವಿಮಾನದ ನಿಗೂಢ ಕಣ್ಮರೆಯ ಹಿಂದೆ ಎದ್ದಿದ್ದ ಹಲವು ಊಹಾಪೋಹಗಳಿಗೆ ತೆರೆ ಬಿದ್ದಿದ್ದು, ವಿಮಾನವು ದುರಂತ ಅಂತ್ಯ ಕಂಡಿರುವುದು ಸ್ಪಷ್ಟವಾಗಿದೆ.

ಮಾ.8, 2014ರಂದು ಕೌಲಾಲಂಪುರದಿಂದ ಬೀಜಿಂಗ್‌ಗೆ ತೆರಳುತ್ತಿದ್ದ ಮಲೇಷ್ಯಾ ಏರ್‌ಲೈನ್ಸ್‌ಗೆ ಸೇರಿದ, 239 ಪ್ರಯಾಣಿಕರನ್ನು ಹೊತ್ತಿದ್ದ ವಿಮಾನವು ಹೇಳಹೆಸರಿಲ್ಲದಂತೆ ಕಣ್ಮರೆಯಾಗಿತ್ತು. ಮಲೇಷ್ಯಾವು ಹಲವು ದೇಶಗಳ ಸಹಕಾರದೊಂದಿಗೆ ಆಧುನಿಕ ತಂತ್ರಜ್ಞಾನಗಳೆಲ್ಲವನ್ನು ಬಳಸಿ ಕಳೆದು ಹೋದ ವಿಮಾನಕ್ಕಾಗಿ ಹುಡುಕಾಟ ನಡೆಸಿದ್ದರೂ ತನ್ನ ಯತ್ನದಲ್ಲಿ ವಿಫಲವಾಗಿತ್ತು.

ಇತ್ತೀಚೆಗಷ್ಟೇ ‘ನೋ ಸ್ಟೆಪ್’ ಎಂದು ಬರೆದ ಬೂದು ಬಣ್ಣದ ಎರಡು ಮೆಟಲ್ ತುಣುಕುಗಳು ಹಾಗೂ 1 ಮೀ. ಉದ್ದದ ಮತ್ತೊಂದು ಮೆಟಲ್ ತುಂಡು ಮೊಜಾಂಬಿಕ್‌ನಲ್ಲಿರುವ ಹಿಂದೂ ಮಹಾ ಸಾಗರದ ಲಾ ರಿಯೂನಿಯನ್ ದ್ವೀಪದ ತೀರದಲ್ಲಿ ಪ್ರವಾಸಿಗರೊಬ್ಬರಿಗೆ ದೊರೆತಿತ್ತು. ಇವುಗಳನ್ನು ಆಸ್ಟ್ರೇಲಿಯಾದ ರಾಜಧಾನಿ ಕ್ಯಾನ್‌ಬೆರಾದಲ್ಲಿ ಮಾ.21ರಿಂದ 23ರವರೆಗೆ ಪರೀಕ್ಷೆಗೆ ಒಳಪಡಿಸಲಾಗಿತ್ತು.

ಇದೀಗ ಆಸ್ಟ್ರೇಲಿಯಾ ಹಾಗೂ ಬೋಯಿಂಗ್ ಏರ್‌ಕ್ರಾಫ್ಟ್‌ನ ತಂತ್ರಜ್ಞರು ನಡೆಸಿದ ಅವಶೇಷಗಳ ತಂತ್ರಜ್ಞಾನ ವಿಶ್ಲೇಷಣೆಯಲ್ಲಿ, ‘‘ಅವಶೇಷವು ಎಂಎಚ್ 370 ವಿಮಾನದ್ದೇ ಎಂಬುದು ಖಚಿತಪಟ್ಟಿದೆ’’ ಎಂದು ಇಲ್ಲಿನ ಸಾರಿಗೆ ಸಚಿವ ಡಾರೆನ್ ಚೆಸ್ಟರ್ ತಿಳಿಸಿದ್ದಾರೆ.